VOV4.K’ho - Ală ngai do, ƀòn bơkào bồt tàm thị trấn Buôn Trấp, kơnhoàl Krông Ana, càr Dăk Lăk neh gal cau rơlao. Jăt ală cau tờm suơn yal, nam do, uă cau tờm suơn neh tơnguh bă suơn tam bơkào satềp pơn drờm mờ ală nam. Trồ tiah ƀuơn niam, khà priă ring niam mờ gơguh di mơ den tàng cau tam chờ hờp ngan.

Lam cau năc tus sền suơn bơkào satềp, ồng Hoàng Yên, kis tàm mpồl ƀòn 7, thị trấn Buôn Trấp, kơnhoàl Krông Ana, càr Dăk Lăk pà git, jơh ală àr bơkào ndrờm neh geh cau dan blơi lài, 2, 3 ngai tai geh jào jơh.

                                      Cau năc tus tơn tàm suơn bơkào nàng blơi bơkào satềp

Kàl tam bơkào satềp nam do, ồng Yên tam 3 sào bơkào kúk mờ lay-ơn ală bơta, gơguh uă rơlao nggùl pơn drờm mờ ală nam. Bŭ lah tàm bơta kòp Kovid-19 gơtờp kal ke, mơya mờ broă blơi tŭ do, ồng Yên kung gam chờ bè broă kờñ tàm drà kă bro bơkào di satềp nam do. “Đơs ngan nam do, trồ tiah niam rơlao mờ ală nam, den tàng nam do bol añ lơh uă rơlao mờ ală nam. Lài ngan là bơh nhai 10 mờ nhai 11 jăt tơngai àng kơnhai den khà priă bơkào tàm di pơgăp uă, bol añ kung chờ den jăt añ kờp dŭ lài satềp khà priă bơkào kung gơguh sơl”.

Kung tơnguh khà bă ù tam bơkào satềp pơn drờm mờ ală nam, ồng Trần Đình Sang, kwang atbồ Mpồl lơh broă bal tam bơkào thị trấn Buôn Trấp pà git, bơh 1 nhai lài, uă cau blơi neh tus dan blơi lài tàm suơn, khà priă kung gơguh đao sơl di lah pơn drờm mờ ală nam. Ờ mìng hìu nhă ồng, uă cau tàm mpồl ndai tàm mpồl lơh broă bal kung neh tơnguh khà bă ù tam bơkào satềp nàng di pal mờ broă kờñ tàm drà kă bro. Tŭ do, ƀòn bơkào tiah bồt, tàm mpồl ƀòn 7, thị trấn Buôn Trấp geh sền là “tiah tờm tam bơkào” uă ngan kơnhoàl Krông Ana dê. Bao mờ broă tơnguh bơtàu broă tam bơkào, ală suơn gam pơgồp bal lơh broă “ƀòn bơkào sinh thái” nàng ai làng bol, cau năc in tus nhơl, sền bơkào mờ kŭp rùp, lơh gơs tiah nhơl chờ, dong kờl làng bol geh tai priă di tàm satềp. Ồng Trần Đình Sang đơs: “Tŭ do, tàm hìu añ tam 4 sào, mìng là bơkào kúk ală bơta mờ bơkào lay-ơn ală bơta tơn. Tŭ do, satềp den mpồl lơh broă bal bol añ neh geh blơi lài tàm satềp uă ngan, den tàng di tàm satềp tus do geh tăc jơh tài tàm dơ̆ lài do tài kòp gơtờp uă, den tàng làng bol tàm ală tiah ndai ờ tam uă bơkào, mơya mpồl lơh broă bol añ ờ ngòt mờ tơnguh bă ù tam mờ tŭ do den hìu lơi kung tơnguh tai bă ù tam”.

                                                       Tơnhào bơkào ai cau blơi uă in

Crơng gơs bơh lồi nam 2018, Mpồl lơh broă tam bơkào thị trấn Buôn Trấp tŭ do geh 14 nă cau, kờp jơh bă ù tam bơkào mờr 3 lồ. Ờ mìng tam bơkào satềp, ală cau tàm mpồl gam tam bơkào drơng tàm drà kă bro ală ngai àng kơnhai ndar me, ngai chờ, mờ uă bơta bơkào bè kẩm cướng, kúk, lay-ơn, đồng tiền. Jăt ồng Nguyễn Xuân Hậu, Củ tịc Mpồl cau lơh broă sa thị trấn Buôn Trấp yal, broă tam bơkào neh dong kờl uă hìu geh priă ring niam, tơnguh bơta pràn tàm tiah do dê tàm broă tơnguh bơtàu lơh sa kă bro. Broă geh mpồl lơh broă bal tam bơkào kung ai geh bơta ƀuơn rơlao ai làng bol in tàm broă geh priă, tus bal ală ơdŭ bơsram kỹ thuật, bơh tŭ hơ̆ geh ngui khoa học kông nghệ tàm broă lơh sa, kă bro. “Den bol añ kung tơrgùm bơ̆t bơtàu mpồl lơh broă bal mờ tă priă ai broă lơh làng bol kis tàm do in mờ kung kơnờm mờ mpồl cau lơh broă sa ală kấp ai tơl bơta niam tàm pah tŭ nam pa tus den bol añ chồl pràn broă yal ală phan geh lơh tàm internet kung bè tàm ală anih yal tơngit nàng lơh bè lơi dong kờl tăc geh phan ai làng bol in”.

Tơnơ̆ mờ tŭ gơmù tài bơh kòp gơtờp, ală bơta tơngŏ niam bơh drà kă bro bơkào satềp neh dong kờl cauu tam bơkào ttàm thị trấn Buôn Trấp, kơnhoàl Krông Ana, càr Dăk Lăk geh tai bơta chờ. Trồ tiah ƀuơn niam, khà priă ring niam neh cèng wơl bơta niam ai làng bol in kơ̆p kờñ bè kàl bơkào satềp geh tơnhào uă mờ geh priă tăc.

Cau cih H’ Xíu-Cau mblàng Ndong Brawl