VOV4.K’ho- Mờ broă pah ngai gŏ bơh 800 tus 1 rbô nă cau kòp Kovid-19, lơh ală hìu sơnơm xã, sơnah ƀòn bơh ƀòn dờng Buôn Ma Thuột, càr Dăk Lăk dê gơ ơm tàm bơta hat hal ngan cau kòp. Ƀòn dờng Buôn Ma Thuột gam lơh ngan geh ală broă lơh ngăc ngar, dipal nàng broă lơh dong kờl sơm kòp F0 tàm hìu lơh geh cồng nha.

Bi Võ Thị Thủy là cau lơh broă tàm Hìu sơnơm sơnah ƀòn Ea Tam, ƀòn dờng Buôn Ma Thuột, càr Dăk Lăk pà gĭt, ală ngai do, mpồl cau lơh sơnơm tàm xã, sơnah ƀòn ai jơh pràn mờ broă lơh tŭ pal dờp lơh uă kơnòl broă. Ờ kờp trồ ngai hala trồ mang, pah tŭ geh điện thoại hòi kờñ geh lòt tus hờ hìu dong kờl là ală cau lơh broă tàm Hìu sơnơm sơnah ƀòn Ea Tam dê mhar ngan tus tơn. Bi Võ Thị Thủy, yal: Tŭ lơi khi geh bơta gơ tơngŏ kòp, SPO2 hơđơm 96 den he soh phan cau lơh sơnơm dê lòt tus dong kờl tơmŭt oxi tơnơ̆ hơ̆ ai tă nhơm mờ oxi dùl tŭ, den hơ̆ sồng pơlam cau hìu bơnhă tam gơl is oxi. Tŭ do mờ nggui tàm hơ̆ jơh nđờ jiơ tơn den ờ geh cau lơh broă nàng nggui ờ, khăt tŭ jiơ lơi kung lòt lơm, 2- 3 jiơ àng drim gờñ kung lòt sơl. Tŭ lơi F0 geh jơnau kờñ dong kờl là dong kờl mhar mờ dong kờl tơn. Khà F0 bơh sơnah ƀòn dê gơguh uă, den añ gŏ là kơn jơ̆ ngan gơwèt mờ cau lơh sơnơm tàm hìu sơnơm xã, sơnah ƀòn tàm tơngai tŭ do.

Bi Thủy gam bơto pơlam cau kòp F0 sơm kòp tàm hìu in

Jăt ồng Ngô Mạnh Cường, Kwang ătbồ Hìu sơnơm sơnah ƀòn Ea Tam, ƀòn dờng Buôn Ma Thuột yal, Ea Tam là sơnah ƀòn geh khà cau tơrgùm gal mờ rlau 36 rbô nă cau mơkung là sơnah ƀòn gŏ khà cau bơtờp kòp Kovid-19 uă. Bơh tŭ lam lơh jăt broă lơh sơm kòp F0 tàm hìu den tus tŭ do, sơnah ƀòn neh dong kờl sơm kòp ai rlau 1 rbô 300 nă cau F0 in, tàm hơ̆ geh mờr 400 nă cau neh sơm bời kòp, mìng geh 6 nă cau pal jun tus hìu sơnơm dờng. Hìu sơnơm sơnah ƀòn Ea Tam neh crơng gơs mpồl Zalo dong kờl, bơto pơlam ală làng bol bơtờp kòp tàm sơnah ƀòn. Bơh hơ̆, sùm sùm pah ngai, làng bol geh kwang bàng lơh sơnơm bơto pơlam broă sền gàr, jăt sền, sơm kòp tàm hìu. Tŭ geh khăt dùl tềl tơngŏ lơi ờ bè ờs, den mìng kờñ làng bol yal lơm là mpồl cau lơh sơnơm bơh sơnah ƀòn dê sơrbac mhar tơn geh mat nàng dong kờl di tŭ. Ồng Ngô Mạnh Cường đơs: Jơh ală cau bơtờp kòp ndrờm pal ngui mờ mŭt bal tàm mpồl cau hơ̆, dilah gŏ gơbàn kơn jơ̆ ngòt rơngơ̆t là pờ tơn tàm mpồl geh bơta kwơ ƀươn uă ngan bè hơ̆ den he ătbồ geh niam ngan. Pơnyơu bè bơto yal, video pơlam tă nhơm do geh mpồl cau F0 he mìng kờñ sồr làng bol tàp jăt video hơ̆, tàp tă nhơm den làng bol bè hơ̆ mờ lơh jăt gời, hơ̆ là broă mblàng yal niam ngan rlau jơh mờ ờ gơtùi lòt tus tơl hìu pơlam tàp tă nhơm ờ. Mŭt tàm mpồl nàng làng bol sền broă bal, bơsiă, duh să, kal ke tă nhơm là bơta gơ tơngŏ ờs mờng, cau lơi kung duh să lơm, bơsiă mờ kal ke tă nhơm lơm den tàng cau gơlơh iang nùs bè đah nùs nhơm. Tŭ do, pal ngui măy mok, dilah ờ geh măy mok den là ờ gơtùi.

Lòt kham kòp ai cau F0 sơm kòp tàm hìu in

Jăt ƀák sĩ ồng Võ Minh Hùng, Kwang ătbồ Hìu sơnơm ƀòn dờng Buôn Ma Thuột yal, kờp tus tŭ tơngai do, tàm ù tiah ƀòn dờng Buôn Ma Thuột gam pal ai ơm yah ngài, sơm kòp tàm hìu ai mờr 7 rbô nă cau bơtờp kòp Kovid-19 in. Geh ală sơnah ƀòn geh mờr 1 rbô nă cau F0 gam sơm kòp tàm hìu. Bulah ală hìu sơnơm xã, sơnah ƀòn neh geh bơtơl tai cau lơh broă là ală cau lơh broă dong kờl is mơya mpồl cau lơh broă kung gam dùl êt ngan sơl tềng đap bơta gơguh tai bơh ală cau kòp dê lơh broă lơh gơ gơs kơn jơ̆ ir, hat hal ngan ir. Ƀák sĩ Võ Minh Hùng, đơs: Mùl màl den broă cau lơh broă bơh Hìu sơnơm xã dê, oh mi lơh sơnơm bơh ală xã, sơnah ƀòn dê, bulah neh geh bơta tus bal bơh bàr pe nă cau lơh broă dong kờl is dê mơya kung hat hal ngan cau kòp kung kơp kờñ sơl là làng bol tŭ gŏ là F0 den pal yal tàm tiah hơ̆ in, lơh jăt jơnau sồr 5k mờ lơh jăt broă jăt sền is pràn kơldang să jan tàm hìu. Tŭ geh broă lơi bè pràn kơldang să jan halà geh bơta gơbàn ờ bè ờs den yal tơn mờ ală hìu sơnơm xã, sơnah ƀòn in nàng bol añ bơto pơlam nàng lơh jăt niam broă sền gàr pràn kơldang să jan ai ală cau F0 gam sơm kòp tàm hìu in. Bol añ kung neh sồr jơh ală cau lơh sơnơm tàm jơh gùt ƀòn dờng sền gròi tàm yal tơngĭt mờ bơto pơlam bal di tŭ ai ală cau F0 in mờ ờ gŏ di lời cau F0 lơi ờ gơtùi lùp geh mờ hìu sơnơm xã.       

Kờp tus ngai 02/03 pa do, ƀòn dờng Buôn Ma Thuột gŏ rlau 15 rbô nă cau kòp Kovid-19, tàm hơ̆ mờr 8 rbô 500 nă cau sơm bời kòp, 36 nă cau chơ̆t. Ƀòn dờng Buôn Ma Thuột kung là tiah geh khà cau kòp uă ngan rlau jơh bơh càr Dăk Lăk dê.

Tềng đăp bơta do, Hìu sơnơm ƀòn dờng Buôn Ma Thuột neh rơcăng lài sồr ală Hìu sơnơm xã, sơnah ƀòn tơnguh tai broă lơh jăt sền, sền swì, lơh xét nghiệm test mhar kháng nguyên gơwèt mờ ală cau geh pơhìn uă nàng gŏ ală cau F0 nàng sơm kòp di tŭ mờ pleh lơh bơtờp tàm mpồl bơtiàn; ai ală kơnòm bơsram mầm non ơm rlô bơsram mờ ơm ing broă bơsram tơn tàm hìu bơsram gơwèt mờ kơnòl bơsram kâp dùl, kâp bàr, kâp pe; mơkung lơh pràn broă lơh mblàng yal ai làng bol in bè broă lơh rơcăng sơndră kòp bè lơh jăt niam jơnau sồr 5k.

Mìng is gơwèt mờ gah lơh sơnơm, nàng geh tơl mpồl cau lơh broă ai ală hìu sơnơm xã, sơnah ƀòn in tŭ khà cau kòp gơguh mhar, khà cau F0 sơm kòp tàm hìu uă, Hìu sơnơm ƀòn dờng Buôn Ma Thuột neh ai tai cau lơh broă ai ală Hìu sơnơm xã, sơnah ƀòn in, sồr ală xã, sơnah ƀòn pồ tơl cau lơh broă ală hìu sơnơm xã ntrờn làm bă tiah. Mùl màl, tơl hìu sơnơm geh bơtơl bơh 4 tus 6 nă cau lơh sơnơm là ală cau lơh broă dong kờl is, ală kwang bàng lơh sơnơm jơh sơnam lơh broă halà cau lơh sơnơm is tàm tiah he dê.

            Cau cih Vũ Nam Trang- Cau mblàng Lơ Mu K’Yến