VOV4.K’ho- Tơngai do, ƀòn dờng Buôn Ma Thuột, càr Dăk Lăk tơrgùm lơh pràn ngui măy mok yal tơngĭt jơnau, wèt tus bơ̆t bơtàu gơnoar ătbồ điện tử. Tam gơl sồ tàm ƀòn dờng neh pơgồp bơnah tơnguh uă cồng nha lơh broă bơh anih lơh broă dà lơgar dê, tơnguh uă bơta niam nùs bơh làng bol mờ mpồl lơh sa kă bro dê.

Ala tài pal tus uă mpồng, uă anih lơh broă nàng lơh ală sră pơ àr dà lơgar bè lài do den tŭ do, uă làng bol ƀòn dờng Buôn Ma Thuột neh kwèng mờ mpồl lơh broă dùl mpồng tàm tơl xã, sơnah ƀòn, halà Mpồl dờp sră pơ àr mờ jàu cồng nha bơsong sră pơ àr dà lơgar ƀòn dờng Buôn Ma Thuột tàm hìu sồ 27, gùng Trường Chinh, ƀòn dờng Buôn Ma Thuột, càr Dăk Lăk dê. Dùl nă cau dùl nơm sồ rơndăp tăp sèng, tơl anih dùl sră pơ àr geh cih loh tềng rùp ti vi. Làng bol tŭ tus geh bơto pơlam mờ yal tơngĭt loh làng ală broă lơh, sră pơ àr. Cồng nha bơsong sră pơ àr geh hơ ngai loh làng, bơh hơ̆, lơh broă đah kwang bàng mờ làng bol geh ƀươn ƀoài, mờ lờih lờm rlau. Bi Trần Văn Nguyên là cau lơh broă tàm ngân hàng tàm sơnah ƀòn Thống Nhất, ƀòn dờng Buôn Ma Thuột, càr Dăk Lăk sùm tus lơh broă tàm mpồl lơh broă dùl mpồng, đơs: Tàm tơngai kòp bơtờp, đah ngân hàng lòt lơh broă geh lơh niam, kơnờm măy mok sồ mờ pơgồp bal mờ lơh sră pơ àr mờ rơndăp tŭ jiơ gĭt sră pơ àr neh tus dơ̆ lơi nàng rơndăp tŭ jiơ lòt ai sồ mờ dờp sră pơ àr.

Gĭt nền ngui măy mok sồ, tơnguh uă sơñio khà niam nùs bơh làng bol dê, mpồl lơh sa kă bro dê bè drơng broă sră pơ àr dà lơgar là bơta tờm tàm ală broă lơh bơ̆t bơtàu tiah drà ngăc ngar, ƀòn dờng Buôn Ma Thuột neh sùm tam gơl pa nùs nhơm lơh broă, tam gơl tàm broă lơh ătbồ, đơng lam, lam lơh tơl làm ală kơnòl broă bơh anih lơh broă sră pơ àr dà lơgar dê. Gĭt wă kơnòl bơh kwang bàng, kông cứk dê tàm tŭ lơh jăt kơrnoăt boh lam, broă dà lơgar geh tơnguh tai. Cồng nha broă lơh dờp mờ bơsong sră pơ àr, sră nggal dà lơgar geh tơnguh uă, tŭ tơngai lơh sră pơ àr geh tơn rŭc lơyah mờ gàr niam, kwơmàng geh uă sră nggal jàu lài mờ tơngai hơ mờ ờ geh sră pơ àr lơh jŏ rlau ir mờ tơngai neh hơ. Bơh hơ̆, pơgồp bơnah kwơmàng tàm broă tơnguh uă cồng nha lơh broă bơh anih lơh broă sră pơ àr dà lơgar dê. Bi Ninh Thị Thanh Thảo, Kwang bàng Cơldŭ lơh broă priă jền broă rơndăp lơh, ƀòn dờng Buôn Ma Thuột, càr Dăk Lăk pà gĭt: Phan ngui khà 3, 4 nă làng bol mìng geh broă ơm tàm hìu pơyua tàm online tơnơ̆ hơ̆ pơyua tàm pang web dùl mpồng, kwang bàng ngui măy mok yal tơngĭt jơnau dờp sră pơ àr tơnơ̆ hơ̆ lơh bơsong di pơgăp 3 ngai tơnơ̆ he jàu wơl ai làng bol in bơh drơng broă pơyua phan lơh broă kwơ dà lơgar, ƀưu điện nàng jun pơyua làng bol in.

Jăt ồng Vũ Văn Hưng, Củ tịc Ủy ƀan Ñân zân ƀòn dờng Buôn Ma Thuột, càr Dăk Lăk yal, uă nam do, ƀòn dờng neh bơcri priă jền lơh pa jơh Mpồl dờp mờ jàu cồng nha lơh bơsong sră pơ àr dà lơgar lơh geh bơnàng jă nàng drơng broă làng bol in, lơh gơlik bơta ƀươn ai gơnoar ătbồ in lơh jăt tam gơl sồ tơl làm. Cồng nha sền swì sơñio khà tam gơl sồ càr Dăk Lăk nam 2020 bơh Ủy ƀan Ñân zân càr dê yal pà gŏ, sơñio khà tam gơl sồ bơh ƀòn dờng Buôn Ma Thuột dê lơh geh kờp jơh điềm là 187,67 (tàm hơ̆, gơnoar ătbồ sồ geh 113,66 điềm; lơh sa sồ geh 27,15 điềm; mpồl bơtiàn sồ geh 46,86 điềm) ơm tàm mpồl điềm sồ jơnhoa pơndrờm mờ ală tiah tàm càr. Do là cơng tàng nàng gơnoar ătbồ ƀòn dờng Buôn Ma Thuột pơn jăt tai bơcri priă lơh tam gơl wơl sơñio khà lơh geh jơnau kờñ neh ai tơlik. Ồng Vũ Văn Hưng pà gĭt: Ƀòn dờng gam pơn jăt tai ngui tam gơl sồ gơwèt mờ ală drơng broă dà lơgar nàng rơhời lơh geh niam rlau jơnau kờñ bơh làng bol mờ mpồl lơh sa kă bro dê tàm tŭ tơngai tam gơl sồ pơgồp bơnah dong lơh bơtàu tơnguh tiah drà jăt gùng dà pa tŭ do. Ồng Vũ Văn Hưng, đơs: Phan bơna bè măy mok yal tơngĭt jơnau bơh ƀòn dờng dê tŭ do neh geh bơcri priă lơh, sền bal lơh geh ală jơnau sồr gơ ai tơlik. Ală broă lơh ƀươn geh kwơ ai làng bol in kung geh lơh sơl. Kwơmàng, mpồl lơh broă dùl mpồng bơh ƀòn dờng dê mờ bơh 21 xã, sơnah ƀòn dê neh geh ai pà ală măy mok nàng geh bơta tus bal sền swì bơh làng bol dê gơrềng tus lơh bơsong sră pơ àr. Gùng dà tus nam 2025, bol añ sền bal lơh sir gơnoar ătbồ sồ.

Buôn Ma Thuột mờ ală bơta ƀươn neh geh gĭt nền gơ gơs là tiah drà tờm bơh tiah Tây Nguyên dê, ƀòn dờng Buôn Ma Thuột hòi jà ală kâp ủy Đảng, gơnoar ătbồ ngan là cau lam bồ rơcăng lài lơh pràn ngui măy mok yal tơngĭt jơnau, lơh geh bơta tam gơl pràn kơldang bơh bơ̆t bơtàu gơnoar ătbồ điện tử lơh geh bơnàng jă ai tiah drà ngac ngar in; tơnguh uă bơta gĭt wă ai kông cứk, viên cứk, ală anih lơh broă, mpồl lơh sa kă bro mờ làng bol in bè bơta ƀươn bơh broă ngui măy mok yal tơngĭt jơnau tàm broă lơh ătbồ, đơng lam mờ bơtàu tơnguh lơh sa- mpồl bơtiàn.

Cau cih Hương Lý- Cau mblàng Lơ Mu K’Yến