Tàm dơ̆ lơh broă, Ủy ƀan Ñân zân càr Dăk Lăk neh đơs tus 18 broă gơ rềng tus kal ke, kòl yan tàm broă lơh atbồ dà lơgar bè phan kuơ geh is mờ tiah ơm kis. Tàm hơ̆, kòl yan uă ngan rlau jơh là atbồ ù tiah geh bơh anih lơh sa suơn dờng lơh broă sa suơn sre brê bơnơm. Mpồl lơh broă, anih yal jơnau tơnggit khà kờp bè broă tam sền gàr brê ờ hềt lơh sir, ờ hềt ndrờm bal mờ jơnau yal tơnggit bè ù tiah. Uă ngan bă ù geh bơh anih lơh sa suơn dờng lơh broiă sa suơn sre jàu rê hờ kâp hơ đơm in tŭ do kung gam bơh Ủy ƀan Ñân zân xã atbồ, ờ hềt geh cau tờm atbồ ngan ngồn, uă bă ù gơtìp sơ gràm tam phan, sơ gràm ai. Bơh hơ̆, lơh gơbàn kal ke xã in tàm broă ai ù tiah tàm broă ngui jat rơndap ù tiah, jat broă rơndap lơh. Ủy ƀan Ñân zân càr Dăk Lăk neh lơh broă rơndap lơh bal atbồ, ngui ù geh bơh ù tam sền gàr brê, yal Ƀộ Tài nguyên mờ Môi trường in mờ ală anih lơh broă dà lơgar in, mơya tus tŭ do kung ờ hềt geh sền sơ wì, sồr lơh tơl. Ồng Nguyễn Thiên Văn, Phó Củ tịc Ủy ƀan Ñân zân càr Dăk Lăk đơs bơta geh ngan: “Bơta tam pìt tam phà, yal yă, ờ ring bal bè ù tiah tàm ală rơndap broă lơh lơh broă sa suơn sre brê bơnơm mờ ală kông ty lơh broă sa suơn sre brê bơnơm tàm càr kung gam gơlik geh kal ke. Broă bơsong bơta tam pìt tam phà, yal yă ù tiah mờ ai wơl ù tam sền gàr brê gơtìp sơ gràm gơbàn uă ngan kal ke, ờ hềt geh broă lơh geh cồng nha nàng bơsong jơh bơta do”.

Bal mờ kal ke, kòl yan gơ rềng tus atbồ ù tiah geh bơh anih lơh sa suơn dờng lơh broă sa suơn sre brê bơnơm, Ủy ƀan Ñân zân càr Dăk Lăk kung neh đơs tus uă broă pal geh Ƀộ Tài nguyên mờ Môi truờng bal mờ ală anih lơh broă dà lơgar sền sơ wì, bơsong. Pơn rơ là tŭ Adat Ù tiah nam 2024 ờ hềt geh ai lơh jat ngan ngồn, broă ngui ală jơnau cih Adat Ù tiah nam 2013 mờ ală sră nggal pơlam lơh jat jơnau cih adat boh lam gam geh 2, 3 bơta ờ niam, ờ ring bal, pal geh sền sơ wì, pơlam lơh, bơsong. Broă jàu ngui ù bơh càr Dăk Lăk dê tus nam 2025 geh Thủ tướng Cíñ phủ tam pà tàm Kơrnuat sồ 326 nam 2022 ờ hềt lơh jat jơnau kờñ ngan ngồn. Adat Phan kuơ tàm ù mờ ală sră nggal pơlam lơh jat bè rơndap tap sèng sră nggal lơh sră ai gơnoar lơh broă phan kuơ tàm ù gam kal ke, jŏ jòng, ờ hềt dipal mờ uă bơta phan kuơ tàm ù lơh phan bơt bơtàu ờs mờng, ngan là tờ ù nàng bồr tơnring.

Đơs pơn dut dơ̆ lơh broă, Ƀộ trưởng Ƀộ Tài nguyên mờ Môi trường ồng Đặng Quốc Khánh pà git, mpồl kwang bàng bơh Ƀộ dê lơh broă mờ ală càr nàng kờñ tă bơsong ală kal ke, kòl yan càr in. Mờ kung ai jơnau đơs bơh ală tiah dê nàng gờñ cih, lơh sir Nghị địñ ai Adat Ù tiah nam 2024 tàm rài kis. Do là adat boh lam geh gơtha dờng ngan gơ wèt mờ rài kis, mpồl bơtiàn. Tàm hơ̆, Ƀộ trưởng tơngkah càr Dăk Lăk pal rơcang lài, jơh nùs lam lơh gờñ broă cih giă ù, jơnau yal tơnggit ù tiah nàng tŭ Adat geh ai ngui den gơtùi ngui mơ tơn. Bal mờ hơ̆, càr kung pal sền gròi tus bơsong ală bơta kòl yan mờ Sở Tài nguyên mờ Môi trường gơtùi lơh mơ hơ̆ là lơh sră ngui ù ai làng bol in ơm kơ̆ kơljap, ờ tam pìt tam phà, ờ lơh tìs adat boh lam.

Mìng is gơ wèt mờ broă geh sền gròi uă ngan rlau jơh là ù geh bơh anih lơh sa suơn dờng lơh broă sa suơn sre brê bơnơm, Ƀộ trưởng ồng Đặng Quốc Khánh sồr càr Dăk Lăk pal kờp sền jơh mờ sac rơ wah nàng tŭ Adat Ù tiah nam 2024 geh ai ngui ngan ngồn den gơtùi bơsong uă bă ù. Ƀộ trưởng đơs sùm tus broă ring bal bơta kuơ bơh làng bol mờ mpồl lơh sa kă bro dê tàm broă ù geh bơh anih lơh sa suơn dờng lơh broă sa suơn sre brê bơnơm: “Sồr Ủy ƀan Ñân zân càr, Duh broă sùm Tỉñ ủy càr đơng lam kờp sền jơh ù tiah geh bơh anih lơh sa suơn dờng lơh broă sa suơn sre brê bơnơm. Rài yau gam ai ù làng bol dê tơmut tàm anih lơh sa suơn dờng, tŭ do tam gơl gơs kổ phần den làng bol mờ anih lơh sa suơn dờng, kông ty tam pìt mờ gơp. Bè hơ̆ den tàng tŭ tam gơl gơs kổ phần, tŭ lơh rơndap broă tam gơl ù ờ nền nòn, ờ geh bơta đo was, wac sềr rùp ù tiah, ờ geh bă ù, ơning ơnàng den hơ̆ sồng sơn đờm tàm sơ gràm bal mờ gơp. Añ sồr pal kờp sền mờ sac rơ wah. Cau lơh phan den kung là làng bol he dê, khi ơm tàm hơ̆ neh nđờ jơt nam, ñchi bơh tài pal lơh kal ke. Bol he pal gàr ring bơta kuơ bơh làng bol dê, bơh mpồl lơh sa kă bro mờ kah yau dê. Adat geh ngui, ù geh bơh anih lơh sa suơn dờng lơh broă sa suơn sre brê bơnơm dê mơya làng bol kung neh ơm sùm bơh nam 2004, jơh bal ù lơh sa, jơh bal ù ơm pà làng bol in. Ai bă ù gam tam pìt den pal mblàng lơh loh wơl, sền lài do gơ bè lơi. Bơta lơi gơtùi lơh jat adat boh lam den ală oh mi lơh lài tĕ”.

Ƀộ trưởng Ƀộ Tài nguyên mờ Môi trường kung sồr càr Dăk Lăk sơlơ tơnguh tai broă lơh atbồ dà lơgar bè phan kuơ tàm ù, phan kuơ dà, lơh niam phan sang, sồ siă; cau lơh broă ai gah phan kuơ geh is mờ tiah ơm kis in, tŭ tus do rơp tam pà kâp tus 70% broă bơh kâp ƀộ aỉê càr in. Ƀộ trưởng kung sồr càr Dăk Lăk sền gròi tus broă lơh rơcang sơndră ồs sa brê tàm kàl prang do, tŭ geh ală tềl tơnggŏ trồ tiah kàl prang duh nam do ờ niam ngan.