Xã tiah nhàr dà lơgar Ia Lốp geh crơng gơs tàm nam 2006 jat gùng dà ntrờn làng bol bơtàu tơnguh lơh sa pa bơh Ƀiñ đoàn 16- Ƀộ Quôk phòng dê, tŭ do là Đoàn Lơh sa Quôk phòng 737, Quân khu 5; khà kờp làng bol tŭ do bơh xã dê mờr 6 rbô 600 nă cau, mờ 15 jơi bơtiàn kòn cau ơm kis bal. Tàm ală nam do, xã Ia Lốp neh pơgồp bal jơh nùs mờ ală anih lơh broă, mpồl, gah broă lơh, mpồl cau, ală mpồl lơh kơnòl broă tàm xã, kuơmàng là Pôs ling sền gàr tiah nhàr dà lơgar 735, Đoàn Lơh sa Quôk phòng 737 mờ Kwang àng kơnhoàl Ea Súp lơh niam broă lơh sền gàr lơngăp lơngai, ring lơngai, srơh jơh gùt làng bol tus bal sền gàr gơnoar tờm ù tiah, lơngap lơngai tiah nhàr dà lơgar.

Tàm dơ̆ bơyai lơh “Ngai chờ sền gàr tiah nhàr dà lơgar jơh gùt làng bol”, tàm xã Ia Lốp neh geh lơh uă broă lơh geh kuơ, bè: bơyai lơh kham kòp, pà sơnơm ờ sa priă, sền gàr pràn kơldăng să jan ai rlau 500 nă làng bol in, pà 1 nơm hìu “hìu ơm tiah nhàr dà lơgar”, pà 10 nơm rơndeh coh ai ală kơnòm bơsram geh rài kis kal ke in; mờr 30 bơnah phan pà ai Ƀí thư, kwang atbồ mpồl atbồ is, cau geh bơngă pin dờn, geh pơn rơ gơguh jak tàm srơh jơh gùt làng bol tus bal sền gàr gơnoar tờm ù tiah, lơngăp lơngai tiah nhàr dà lơgar.