VOV4.K’ho - Tàm dơ̆ lơh jăt broă tam dră mờ kòp kovid-19 tàm càr Dăk Lăk, bal mờ broă lơh ngan bơh mpồl cau lơh sơnơm gam geh broă pơgồp bal uă ngan bơh ală cau lơh broă nùs nhơm dong kờl gah jăt yàng dê. 4 nhai do, ală cau do geh tus tàm hìu sơnơm ing mờ tiah sơm kòp cau kòp kovid-19 jroă tàm hìu sơnơm tiah Tây Nguyên nàng dong kờl ală y, ƀák sĩ pơn dờm, sền gàr ală cau F0 sơrlèt mờ kòp gơtờp.

            Ală Sơ tàm mpồl nữ vương Hoà Bình lơh broă nùs nhơm dong kờl cau gơtìp kòp kovid-19

Rào jùt să jan ală cau kòp kovid-19 tàm tiah sơm kòp cau kòp jroă tàm hìu sơnơm tiah Tây Nguyên là broă lơh pah ngai bơh mpồl cau lơh broă nùs nhơm dong kờl tus bơh mpồl Sơ nữ vương Hoà Bình, ƀòn dờng Buôn Ma Thuột, càr Dăk Lăk tàm 4 nhai do. Sơ Nguyễn Thị Thanh Huyền pà git, bal mờ broă sền gàr broă sào sa, bơtơl phan bơkah, dong kờl cau kòp rào, jùt să jan..., ală cau lơh broă nùs nhơm dong kờl kung sùm pơn điang, pơn dờm nùs nhơm, dong kờl ală cau kòp pơ-rài bồ tơngoh. “Gŏ broă lơh do geh kwơ màng, gŏ gơlơh chờ tai, bŭ lah soh phan sền gàr să jan do glar ngan, mơya gŏ să tờm geh lơh broă lơi ai cau kòp in, he pơn dờm, pơn điang. Ală cau kòp mŭt tàm do gơlơh wah rơwời ngan, ờ geh cau pròc mhàm, pal chơ̆t is, ală cau geh nùs nhơm kơlôi bè hơ̆, mơya geh he rềp bal, he pơn dờm, pơn điang, sền gàr den ală cau do geh nùs nhơm chờ tài kung gam geh cau sền gròi tus mờ ală cau do. Ală Sơ lơh broă geh nùs nhơm bè cau pròc mhàm tờm sơl, lơh broă den geh nùs nhơm niam mờ ờ gơtìp glar bòl”.

                                       Pơn dờm pơn điang cau gơtìp kòp kovid-19

Den gơwèt mờ Sơ Lê Thị Thịnh, ală ngai lơh broă tàm hìu sơm kòp cau kòp kovid-19 neh dong kờl ală cau lơh broă nùs nhơm dong kờl in gơ̆ bơta kal ke, glar bòl bè nùs nhơm bơh cau kòp mùl màl ngan. Broă cèng geh nùs nhơm chờ hờp, lơngăp lơngai ai ală cau gam ngai pah ngai lơh ngan tam dră mờ kòp tê jê să mùl màl geh kwơ màng ngan gơwèt mờ ală cau lơh broă nùs nhơm dong kờl dê. “Geh kwơ màng ngan, tài he gŏ gơlơh he geh dong kờl uă cau gơtìp kal ke mờ ală cau do kờñ ngan tus mờ he. Gơlơh do là ală cau oh mi pròc mhàm tờm mờ ală cau do gơtìp ờ bơtoah rơlao mờ he den tàng he geh bơta pràn kơl dang să jan nàng dong kờl ală cau do jơh nùs, jơh pràn di lah gơtùi”.

Bal mờ ală broă sơm kòp pràn bơh mpồl y, bác sĩ, broă dong kờl jơh nùs bơh ală cau lơh broă nùs nhơm dong kờl neh dong kờl cau kòp kovid-19 mờ cau pròc mhàm cau kòp iang nùs. Ồng Nguyễn Xuân Tưởng, kis tàm xã Ea Nam, kơnhòl Ea H’ Leo pà git, 10 ngai ơm sền gàr bèp gơtìp kòp, sền ală broă lơh geh kwơ màng bơh ală sơ, ồng gơlơh ngoh rơngăc ngan. Ală sơ neh lơh broă ala cau pròc mhàm cau kòp, jơh nùs tàm broă sền gàr, pơn dờm, pơn điang nùs nhơm cau kòp in: “Tàm do neh geh ală sơ rào, jùt bloh, bơsoh phan bal mờ ală broă lơh ndai tai, đơs ngan là lơh kloh să jan cau kòp in, cau lơi kung bè hơ̆ lơm”.

Jăt ƀák sĩ Nguyễn Văn Tính, Chuyên khoa hồi sức kấp kứu yal, broă dong kờl bơh ală cau lơh broă nùs nhơm dong kờl là geh kwơ ngan, dong kờl hìu sơnơm tơmù kal ke bè cau lơh broă. Ală cau lơh broă nùs nhơm dong kờl neh mờ gam dờp kơnòl bơnah lơi broă bơh ală điều dưỡng, hộ lý tàm tiah sơnrờp tam dră mờ kòp kovid-19, dong kờl gah lơh sơnơm lơh niam rơlao tai broă sơm kòp. Ƀák sĩ Nguyễn Văn Tính đơs là, bơdìh mờ broă sơm kòp mờ sơnơm, den broă sơm mờ nùs nhơm gơboh, mờ nùs nhơm là kwơ màng ngan gơwèt mờ cau kòp kovid-19. “Geh dong kờl uă ngan broă. Lài ngan ală sơ sền gàr cau kòp bơh broă sào sa tu mờ broă rào jùt să jan do, hơ̆ sồng pơn dờm, pơn điang cau kòp tai. Broă nùs nhơm cau kòp geh kwơ màng ngan, cau kòp sền tàm ti vi gŏ geh uă ngan cau gơtìp chơ̆t bloh, cau kòp kung ờ git tus tŭ lơi hơ̆ sồng tus să tờm tai den tàng ngòt ngan, geh ală sơ pơn dờm pơn điang ală cau kòp”.

Tàm broă lơh ngan nàng sơrlèt mờ kòp bơh ală cau kòp kovid-19 dê tàm hìu sơnơm tiah Tây Nguyên, bơdìh mờ ală broă lơh bal bơh ală y, ƀák sĩ, gam geh broă tam pà bal, nùs nhơm gơboh bal bơh ală sơ. Nùs nhơm gơboh bal hơ̆ neh lơh gơs bơta niam gơwèt mờ uă cau kòp kovid-19.

Lài mờ hơ̆, tŭ bơta kòp kovid-19 gam gơtìp kal ke ngan mờ ngòt rơngơ̆t, cau jăt yàng bàp tàm càr Dăk Lăk kung geh uă broă lơh nùs nhơm dong kờl, dong kờl ală hìu cau kòp. Mục sư Lemous Philemol, Kwang atbồ ala măt đah jăt yàng Tin Lành càr Dăk Lak pà git: bơdìh mờ ală phan pà ai ală làng bol tàm tiah gơtìp kòp, mpồl ala măt gah jăt yàng Tin Lành Việt Nam đah jum dà lơgar gam pà ală hìu nhă cau jăt yàng là F0, F1 tàm càr Dăk Lăk là ală phan pà bè phe geh 300 tơlăk đong mờ dong kờl ală cau F0, F1 mờr 400 tơlăk đong. Mpồl ala măt sùm bơto bơtê ală mpồl jăt yàng Tin Lành gùt càr lơh jăt nền nòn 5K bơh Ƀộ Y tế mờ ală broă tam dră mờ kòp gơtờp. Mờ crơng gơs mpồl “Bák sĩ Luca” bơto pơlam bơta pràn kơl dang să jan tàm internet ai ală cau gơtìp kòp kovid-19 in.

Cau mblàng Ndong Brawl