Tàm cơldŭ ơnàng rlau 30 thơk vuông tàm thôn Phước Hoà 1, xã Ea Kuang, kơnhoàl Krông Păch, càr Dăk Lăk dê, pơgăp mờr 10 nă oh mi cau ùr gam ơm nggui jơh nùs jơh tồr ngan bơka niam sră jà rùp niam chài mờ rùp pơ àr rơklồn. Bơh bàr nơm mpàng tê bơh ală bi dê, ală pang pơ àr dềt uă rùp dà sơng geh rơklồn pồt wơl mờ phan ngui dềt geh crăp mô tơ dềt, pơn jăt hơ̆ geh mòn gơs rùp mờ tĕp tàm ală bơdìh phan, phan ngui lơh krơi is nàng lơh gơlik phan bơna. Bơta chài lơh rùp pơ àr rơklồn dà Mỹ hòi là Quiling ngui nàng lơh gơlik gơs ală phan bơna phan ngui lơh bơka, lơh phan lời kir, bơh ală phan ngui ƀalhiă ngan bè mok cê khuă tus sră pơyua lơh mờ tê, pang rùp yồng tềng kơlik hìu halà ală phan ngui lơh bơka ndai. Broă lơh tồn lah bè ƀươn soh ngan mơya kờñ ngan bơta jơh nùs jơh tồr, tê lơh rơlĕ rơlùn mờ kèr chài ngan tê bơh ală cau chài lơh pang rùp dê. Bi Nguyễn Thị Bích Thuận ơm tàm xã Ea Phê, kơnhoàl Krông Păch, càr Dăk Lăk neh lơh broă ndo rlau 2 nam do, pà gĭt: Bơh chờm pa bơtê lơh den là kal ke ngan gơ, đơs bal là dùl ngai mờ ngan ngồn là geh uă tŭ là he lơh ờ hềt geh dùl nơm sră pơyua tơn, mơya mờ he bơtê dàr dàr den kung kwèng sơl tê. Bơta do he pal geh bồ tơngoh kơlôi bơceh lơh tai ih. Bal mờ he kung bơto, he kung geh sền gròi sơl dùl êt den gơ geh lơh geh phan bơna gơ dê. Mờ dùl nă cau chài lơh den bi Mùi kung bơto pơlam sơl jơh nùs ngan mơya bơta do kwơmàng là he kờñ pal bơceh lơh tai.

Anih lơh gơlik mờ kă bro pang rùp pơ àr rơklồn neh dong lơh geh broă lơh ai uă oh mi cau ùr tàm tiah do in

Cau să tờm tơn bơto pơlam ală bi là bi Lê Thị Mùi, cau tờm anih kă bro rùp pơ àr rơklồn. Tàm mờr 5 nam do, bi Mùi neh să tờm tơn bơto broă lơh mờ ai broă lơh ai mờr 30 nă cau ùr geh rài kis kal ke in tàm xã Ea Kuang mờ ală xã rềp bal in. Tàm hơ̆ geh 3 nă bi kwĕt kơlte mờ dùl nă bi gam pal kham kòp leh rlau 10 nam do. Ală bi gơtùi tus lơh tơn tàm anih kă bro halà dờp phan rê lơh pang rùp tàm ală tŭ jiơ ru tàm hìu mờ priă lơh geh bơh 2 tus 5 tơlak đong pah nhai. Bi Mó May ơm tàm thôn Tân Lập, xã Ea Kuang, kơnhoàl Krông Păch, yal: broă ờ gŏ kơn jơ̆ ir ờ mờ gơtùi lơh tai tàm tŭ ru broă tàm hìu, tŭ jiơ gơtùi lơh rơcăng lài den tàng dipal mờ rài kis gam ròng kòn dềt bơh bi dê. Bi Mó May pà gĭt tai: Oh ơm tàm hìu den kung ờ gŏ lơh broă lơi gơlik priă jền ờ den tàng oh lòt ndo nàng lơh den kung jòi geh tai đau priă jền ai hìu bơnhă in. Bal mờ oh den geh kòn dềt tai den tàng broă do kung di đau dùl bơnah lơi.

Bi Lê Thị Mùi pà gĭt, bơh nam 2018, bi lơh gơtùi mờ broă lơh rùp pơ àr rơklồn. Geh Mpồl Cau ùr xã Ea Kuang pà càn priă 20 tơlak đong, kờp tai priă càn 50 tơlak đong bơh Ngân hàng Cíñ săc Xã hội dê bi sơnđờm mŭt lơh tơn broă rơndăp lơh lơh gơlik mờ kă bro phan. Nam 2020, mờ bơta lòt bal bơh ală kâp Mpồl Cau ùr càr Dăk Lăk dê, bi Mùi khin cha lòt pơrlòng sơnđờm mŭt lơh broă bơh càr dê bơyai lơh mờ pơrlòng geh khà bàr, geh bơta dong kờl bè priă bơcri lơh nàng pơn jăt tai lơh jăt ală broă rơndăp lơh jŏ jòng rlau gơwèt mờ broă lơh rùp pơ àr rơklồn. Tus tàm nam 2021, rơndăp broă lơh sơnđờm mŭt lơh broă mờ bơta chài lơh pang rùp pơ àr rơklồn bơh bi dê pơn jăt tai pơrlòng gơmŭt tàm dar dŭt ndơl bơh dơ̆ pơrlòng Cau ùr sơnđờm mŭt lơh broă gùt lơgar dơ̆ 4 mờ lơh geh khà kơ̆p kơnờm. Ală cồng nha lơh geh do là bơta gơn kơnờm nàng dong bi geh tai priă bơcri lơh, geh tai bơta mờng chài mờ geh tŭ niam yal tơngĭt, ràng tơlik phan bơna nàng pờ ơnàng drà kă bro, jòi cau tam klăc lơh broă bal. Bi Lê Thị Mùi pà gĭt: Tŭ do, là geh 30 nă cau lơh apah, bơtàu tơnguh tàm càr Dăk Lăk dùl anih lơh mờ tàm Kon Tum, Gia Lai dùl anih lơh. Broă rơcăng lơh tàm tơngai mờr tus bơh añ dê là pơn jăt tai kung gam dờp sơl ală sră dan blơi phan bơh năc blơi phan dê mờ lơh gơlik geh ală phan bơna rùp să bơka, geh ală bơta krơi is bơh kơnhoàl ù tiah ƀòn lơgar mờ rài kis niam chài is bơh jơi bơtiàn Việt Nam he dê nàng yal tơngĭt, ràng tơlik mờ gơ̆p bơyô in tàm lơgar mờ bơdìh lơgar, kwơmàng là gah nhơl chờ mờ geh pờ ơnàng mờ bơto tai tàm ală kơnhoàl ù tiah rềp bal in.

Bi Lê Thị Mùi kềng cơldŭ ràng tơlik Rùp niam chài pơ àr rơklồn

Tŭ do, pah nhai anih lơh gơlik mờ kă bro pang rùp pơ àr rơklồn bơh bi Mùi dê lơh gơlik pơgăp 5 rbô phan ală bơta, bơh ală sră pơyua sră jà ƀươn ƀoài ngan geh tăc mờ giă pơgăp bơh bàr pe jơ̆t rbô đong tus ală pang rùp ù tiah ƀòn lơgar, pang rùp kòn bơnus geh lơh dờng mờ giă tăc gơguh dùl tơlak đong. Ală phan bơna bơh anih bi dê lơh gơlik neh geh tăc tàm bàr pe siêu thị, hìu ràng tăc phan tàm càr mờ bơdìh càr. Bal mờ hơ̆, bi Mùi gam dờp rơndăp lơh mờ lơh dùl êt phan ai ală kông ty dờng in.

Phan bơna đòm lơh bơh rùp niam chài pơ àr rơklồn

Mò H’Yer Knul, Kwang ătbồ Mpồl Tam klăc Cau ùr kơnhoàl Krông Păch đơs: Broă lơh sơnđờm mŭt lơh broă bơh pang rùp pơ àr rơklồn bơh bi Lê Thị Mùi dê gơcèng bơta niam chài kòn bơnus uă ngan, lơh geh broă lơh mờ priă lơh geh ai uă oh mi cau ùr in, geh bal ală cau gơtìp kwĕt kơltê tàm ƀòn lơgar. Mpồl neh dan jơnau đơs bơh Ủy ƀan Ñân zân kơnhoàl dê nàng rơhời lơh, dong kờl ù tiah lơh, anih pờ ơnàng broă lơh do, kwơmàng dong kờl drà tăc ai phan bơna in. Mò H’Yer Knul, đơs nền: Bulah tàm bơta kal ke ngan mơya mờ bơta kờñ ngan kung bè là bơta jơh nùs jơh tồr nàng tam pà bal, dong kờl bal di tŭ ală rài kis kal ke den bi Lê Thị Mùi jơh nùs ngan mờ rơcăng lài mờ bơh jơh ală bơta là lơh gơtùi. Mìng is bè broă lơh do là geh Huyện ủy cih dờp ngan mờ jờng rơ ngan mờ sền gròi ngan mờ tơngai tus den sồr Mpồl Cau ùr là geh gùng dà broă lơh, bơta dong kờl lơi ai lài, ai pà ai broă lơh in. Bol añ sền gròi ngan mờ pơn jờng ngan, ngan là bol añ rề ơnàng lơh uă nàng lơh gơrề broă lơh do.

Pang rùp pơ àr rơklồn mờ rùp să uă ngan

Mờ pơlam gùng dà pờ ơnàng drà kă bro, broă tờm wèt tus drà phan bơna nhơl chờ mờ drà lơgar ndai. Bi Lê Thị Mùi gam rơhời lơh uă phan bơna mờ rùp bơka bơta phan pang rùp pơ àr rơklồn. Bal mờ hơ̆ là lơh mờng chài tàm broă yal tơngĭt phan bơna, sac rwah mpồl cau lơh broă tàm drà, tus bal tăc tàm drà internet mờ ală drà kă bro điện tử. Gùng dà do geh dong anih lơh gơlik mờ kă bro pang rùp pơ àr rơklồn bơh bi Mùi dê rơhời đơs nền mat kă bro mờ lơh geh drà kă bro dờng ơnàng rlau bơh tŭ hơ̆ dong ală oh mi cau ùr geh tai priă jền, kơ̆ kơl jăp rài kis ngai sơlơ niam rlau tai.