VOV4.K’ho- Ală anih nhơl ñŏ geh bơka rơlip rơlìl bal mờ uă bơta nhơl ñŏ geh ơn tềng bồ đap ƀlàng hìu bơsram halà tàm tiah tàm gùl ală ƀòn lơh ală oh dềt kờñ ngan. Mờ jơnau kờñ dong ală oh dềt geh tai anih nàng nhơl ñŏ dùl bă niam bơnĕ, uă anih nhơl ñŏ oh in neh geh lơh tàm ală ƀòn tiah sar lơgar ngài tàm càr Dăk Lăk lài mờ sơnam pa tơn.

Ală ngai ơm rlô sa tềp bơhiàn Ñâm Zần, bulah trồ tơngai duh ngan, ală oh dềttàm ƀòn Krũe, xã Vụ Bổn, kơnhoàl Krông Păk, càr Dăk Lăk kung gam tơrgùm tềng bồ đăp ƀlàng hìu bơsram kấp 1 Phan Bội Châu nàng nhơl tàm anih nhơl ñŏ pa geh crăp lơh. Pa lài hơ̆ 2 poh, tàm do geh rơndap lơh uă ngan bơta nhơl ñŏ bè rbàng ntiar, ơyun cah, lòt rbàng yồng zích zắc,,, lơh ală oh kờñ ngan, tàm pơn jat gơp tus bal. Oh Lê Trần Linh Chi, kòn cau Tày, hìu ơm rềp anih nhơl ñŏ kờñ ngan pà git: “Lài do ờ hềt geh anih nhơl ñŏ, tŭ do kòn ưn ngài ngan ală wa, ală mơi neh lơh ƀlàng nhơl ñŏ, ƀlàng coh plai, rƀàng ntiar bol kòn in, bol kòn chờ hờp ngan, ưn ngài uă ngan. Oh geh sùm tàm jà bơyô lòt nhơl tàm do.”

Ală oh dềt kờñ ngan mờ ală phan nhơl

Kung kờñ ală phan nhơl pa sơl, oh Vi Y Quyền, kòn cau Rơđê, kơnòm bơsram ơdŭ 5B, hìu bơsram kấp 1 Phan Bội Châu yal, hìu ơm ngài hìu bơsram mờr 1 kơi sồ, mơya bơh tŭ geh anih nhơl ñŏ pa geh crăp lơh tàm hìu bơsram, bulah gam geh rlô sa tềp, mơya ndrờm bè ngai lơi oh kung lòt nhơl tàm do mờ ală bơyô: “Ngai do kòn chờ hờp ngan, lài do ờ hềt geh nhơl bè do den tàng tŭ do kòn chờ hờp ngan. Geh ală wa, ală mơi mờ ală pơgru cèng tus ală phan nhơl geh kuơ bè do, oh hơ pơrgon geh lơh ngan bơsram jak”.

Jat pơgru Trần Hải Đường, atbồ hìu bơsram kấp 1 Phan Bội Châu yal, hìu bơsram ƀòn Krũe tŭ do geh 5 ơdŭ bal mờ 100 nă kơnòm bơsram, jơh ală ndrờm là cau jơi bơtiàn kòn cau dùl êt nă cau. Do là dùl tàm ală hìu bơsram kal ke ngan rlau jơh bơh xã Vụ Bổn dê. Lài do, bơdìh mờ tŭ jơ bơsram den kơnòm bơsram tàm do uă ngan là lòt jat mè bèp tàm mìr, ê kơnrồ, pañ sềm halà tơrgùm gơp coh plai tàm ƀlàng nhơt. Bơh tŭ anih nhơl ñŏ geh lơh tàm hìu bơsram, ală kơnòm bơsram mờ oh dềt gùt dar tiah do sùm tus ndo nàng nhơl ñŏ: “Geh anih nhơl ñŏ bè do den lài ngan ală oh geh sùm tus hìu bơsram rlau, dơ̆ 2 là sơlơ tơnguh rlau tai broă bơsram tàp pràn să jan, tơnguh bơta pràn kơldăng să jan ală oh in. Tơnơ̆ tŭ dờp lơh broă do, jàu broă lơh den mpồl đơng lam hìu bơsram bal mờ mpồl ơruh pơnu hìu bơsram mờ đoàn ơruh pơnu thôn geh pơrjum wơl nàng lơh bè lơi sền gàr niam ngan rlau jơh nàng geh cồng nha ngan rlau jơh ai ală oh in”.

Ală oh ndai den kờñ nhơl ơyun cah

Anih nhơl ñŏ tàm ƀòn Krũe là broă lơh dơ̆ 3 gơ wèt rơndap broă Anih nhơl ñŏ ai oh in bơh mpồl lơh broă dong kờl is tàm tơrbŏ bal bơta kờñ gơboh Buôn Ma Thuột hòi jà bơta tă pơgồp bơh mpồl bơtiàn nàng lơh, bal mờ priă tă lơh mờr 30 tơlak đông. Bi Lê Như Huyền Trâm, atbồ mpồl lơh broă niam dong kờl cau tàm tơrbŏ bal bơta kờñ gơboh Buôn Ma Thuột pà git, tàm tŭ lòt sền ngan ngồn tàm ală tiah kal ke, ală ƀòn tiah sar lơgar ngài, bi gŏ ală oh dềt tàm do ndrờm kal ke ngan, ơm kis tàm tiah ngài, ờ geh tus tàm ală anih nhơl ñŏ. Bơdìh mờ tŭ jơ bơsram, ală oh sùm tàm jà gơp lòt pañ sềm, lòt tàm dà dờng, dà croh, tơnau dà nàng nhơl den tàng ƀuơn ngan pơhìn gơlik geh bŭ dà. Tềng đap bơta geh ngan do, mpồl neh pơgồp bal mờ ƀòn, hòi jà ală bơta tă pơgồp nàng dong kờl lơh anih nhơl ñŏ ală oh in. Bal mờ hơ̆, tàm ală anih nhơl ñŏ geh lơh, ală mpồl lòt bal kung tàm tơrbŏ bal ală bơta tă pơgồp nàng dong kờl pà phan, phan ngui sa pal geh ai làng bol in halà àu mpha răm, phan ngui bơsram ai kơnòm dềt kal ke in. Do là rơndap broă jŏ jòng mờ geh pơn jat tai lam lơh tơnơ̆ sa tềp bơhiàn Ñâm Zần. Bi Lê Như Huyền Trâm đơs: “Tàm nam 2022 geh 10 rơndap broă lơh anih nhơl ñŏ ai ală kơnhoàl, xã rƀah ờ hềt geh anih nhơl ñŏ tàm càr Dăk Lăk in. Mpồl geh hòi jà ală cau geh nùs nhơm niam, dilah priă tă lơh ờ tơl den cau tàm mpồl geh tă pơgồp tai nàng pơn jat tai lam lơh broă lơh anih nhơl ñŏ ai ală oh in”.

Ờ uă oh dềt den kờñ sơng dà, wăc bơka rùp

Mờ bơta at tê bal bơh ală mpồl lòt bal, mpồl dong kờl dê, tàm 5 nam do, bơh ală mpồl bơh đoàn ơruh pơnu, càr Dăk Lăk neh lơh geh mờr 200 anih nhơl ñŏ ai kơnòm dềt in, kờp jơh priă tă lơh mờr 10 tơmàn đông. Tơl anih nhơl ñŏ geh lơh gơs mờ jàu ai ngui ndrờm geh ală mpồl dờp mờ sền gàr, lơh gơlik bơta niam nàng ală oh dềt in geh ngui, nhơl ñŏ. Bơh hơ̆, dong ală oh geh tai anih nhơl ñŏ, lơh gơlik bơta chờ hờp pah tŭ tus hìu bơsram.

Cau mblàng K’Duẩn