VOV4.K’ho- Nàng ală kơnòm dềt tiah nhàr lơgar in geh sa tềp Trung thu chờ hờp chờ hờñ mờ geh kwơ, mang ngai 09/09, Ủy ƀan Ñân zân càr Dăk Lăk bơyai lơh broă lơh Mang chờ àng kơnhai ndar me nam 2022 tàm kơnhoàl tiah nhàr lơgar Buôn Đôn.

Mpồl bơyai lơh jàu priă dong kờl bơsram ai kơnòm bơsram rƀah sơrlèt gan kal ke in

Tàm dơ̆ lơh broă do, rlau 2 rbô nă kơnòm dềt tàm ù tiah kơnhoàl Buôn Đôn dê geh iăt Sră pơyua gờm chờ sa tềp Trung thu ai kơnòm dềt mờ kơnòm pa tàu bơh Củ tịc lơgar dê, lơh bal ală broă lơh lòt rò đèng, tam ya đăng grài, đơs crih tam ya, lơh lèu Wa Cuội- Bi Hằng, sa ƀañ Trung thu.

Tam ya đăng grài

Di tàm dơ̆ do, mpồl bơyai lơh neh jàu 64 bơnah priă dong kờl bơsram ai kơnòm dềt rƀah sơrlèt gan kal ke in; 30 nơm rơndeh coh lời ai ală kơnòm bơsram kal ke ờ hềt geh rơndeh lòt bơsram in. Broă lơh nàng kờñ ai tơl bơta ai ală kơnòm dềt tiah nhàr lơgar Buôn Đôn in geh sa tềp Trung thu niam bơnĕ mờ lơngăp lơngai; pơndờm pơnđiang, hòi jà ală oh lơh ngan pơđơl pràn pràn bơsram sră, lơh geh cồng nha jơnhoa tàm nam bơsram pa.

Cau mblàng Lơ Mu K’Yến