Mut ơm tàm hìu pa dờng niam, bi Nguyễn Thị Diệu Linh, lơh broă tàm Mpồl đơng lam ling klàng kơnhoàl Krông Bông chờ hờp yal,  bơta kơp kờñ geh dùl nơm hìu kơ̆ kơljap bơh uă nam do neh gơ gơs ngan ngồn, hìu bơnhă kal ke tŭ bơklau lòt lơh broă ngài, dùl nă bi ơm tàm hìu ờ mìng pal lòt lơh broă mờ gam ròng 2 nă kòn dềt, tàm hơ̆ geh 1 nă sau gơtìp kòp tự kỷ. Dilah ờ geh bơta dong kờl bơh gơp bơyô, cau lơh broă bal dê mờ 50 tơlak đông bơh Kes priă tềm pềr lơh jat jơnau bơto Bác Hồ dê bơh Huyện ủy Krông Bông jàu pà den ờ hềt git tus tŭ lơi hìu bơnhă bi hơ̆ sồng gơtùi lơh hìu: “Añ gŏ chờ hờp ngan tài geh bơta dong kờl bơh ală kâp, ală gơp bơyô gùt anih lơh broă dê, lơh geh hìu ơm cau ling bal bè tŭ do nàng iang nùs lơh broă. Añ gŏ broă lơh do geh kuơ ngan, dong añ pin dờn rlau, tơrmù ƀà kal ke bơh jŏ, dong añ sơrlèt gan kal ke nàng iang nùs ròng siam oh kòn”.

Kung chờ hờp tŭ geh dờp 20 tơlak đông bơh Kes priă tềm pềr lơh jat jơnau bơto Bác Hồ, bi Trần Thị Vân ơm tàm thôn 2, xã Hòa Thành, kơnhoàl Krông Bông neh lơh rơkàng jơm kềng gah hìu, lơh gơlik anih nhơl ñŏ ai kòn klau dềt in alà mờ pal ơm tàm bơrnŏ dềt mờ hat. Kòn klau bi dê gơtìp jơnau gơ lời wơl tài bơh duh să lơng tơngoh, neh 7 sơnam mơya bồ tơngoh git wă mìng bè kơnòm dềt 2, 3 nhai: “Uă nam do kung lòt sơm sau in tàm uă tiah den tàng priă jền ờ huan geh, pa do geh bơta dong kờl bơh broă lơh dê ngan là chờ hờp ờ git lơh, nàng lơh kềng bồ đap hìu mờ lơh tai kơlik jơnhua nàng sau in nhơl bơdìh, sền ală phan gùt dar. Tài sau ơm sùm tàm hìu, pah tŭ mè lòt lơh broă rê sền gŏ cau khai chờ hờp ngan, hìu bơnhă ưn ngài uă ngan”.

Bi Linh mờ bi Vân mìng là 2 tàm khà git nđờ rhiang nă đảng viên, làng bol geh dờp dong kờl bơh Kes priă tềm pềr lơh jat jơnau bơto Bác Hồ tàm kơnhoàl Krông Bông. Do là kes priă bơh Huyện ủy Krông Bông lam lơh bơh nam 2016. Jat hơ̆, tơl anih lơh broă, mpồl cau, ci ƀộ hòi jà kwang bàng, đảng viên, làng bol lam lơh tềm pềr êt ngan rlau jơh là bơh 2 rbô tus 20 rbô đông pah nhai nàng tă pơgồp tàm kes priă, dong kờla lă cau uă kal ke tàm kơnhoàl. Mờ broă lơh do, broă lơh neh hòi jà tă pơgồp geh mờr 4 tơmàn đông.

Tus tŭ do, Huyện ủy Krông Bông neh jàu pà 100 nơm kơnrồ me deh kòn, dong kờl lơh 14 nơm hìu, lơh 1 nơm hìu ơm cau lơh broă in tàm hìu bơsram Ea Rớt, xã Cư Pui, dong kờl ală hìu bơnhă gơtìp hoàc huơr kơn jơ̆ tài bơh trồ tiah lơh aniai, cau geh rài kis uă kal ke, cau gơbàn kòp ngòt rơngơt… Mò Hồ Thị Thảo, Phó Kwang atbồ Ƀan Tuyên giáo Huyện ủy Krông Bông pà git, broă lơh là broă ngan ngồn bơsram mờ lơh jat krơh niam Hồ Chí mInh, pơgồp bơnah lơh gơ rề Jơnau sồr sồ 5 bơh Ƀộ Cíñ trị dê tus ală rơnàng làng bol. Tàm tŭ lam lơh, gơ jat tàm tơl tŭ tơngai, Ƀan Thường vụ Huyện ủy git nền tơl mpồl cau geh dong kờl jal mhar nàng ai priă dong kờl. Kes priă geh ngui dùl bă ngac ngar, loh làng, song dơpă, cau geh dong kờl sơlơ geh rề ơnàng mờ tam gơl dipal. Kơnờm bơh hơ̆, broă lơh neh geh gal ngan làng bol, kwang bàng, đảng viên jơh nùs lơh jat, tus bal: “Tàm tơngai tus, kơlôi sơnơng broă lơh nền nòn rlau nàng gơtùi là dùl bơnah lơi dong ală cau kal ke tàm kơnhoàl. Kờp dŭ tơnơ̆ tŭ ai jơh jes priă do den bồ nhai 7 nam 2023, Ƀan Tuyên giáo rơp pơn jat tai tă pơgồp jơnau đơs Đảng ƀộ in lam lơh 1 broă lơh tềm pềr pa nàng gờm chờ pơrjum dờng Đảng ală kâp, tơngai lơh broă bơh nam 2025 tus nam 2030”.

Ờ mìng pơgồp bơnah lơh jat ngan ngồn Jơnau sồr sồ 5 bơh Ƀộ Cíñ trị dê tus ală rơnàng làng bol, broă lơh Tềm pềr lơh jat jơnau bơto Bác Hồ tàm kơnhoàl Krông Bông neh cèng wơl ală cồng nha ngan ngồn, dong uă cau geh dờp kuơ. Do là broă lơh geh kuơ nàng tơl nă làng bol ndrờm gơtùi at tê bal, lơh gơ rề broă lơh niam tàm bơsram mờ lơh jat krơh niam Hồ Chí Minh, lơh rài kis sơlơ niam rlau.