VOV4.K’ho- Mho ngai 19/07, Ủy ƀan Ñân zân kơnhoàl Krông Pach, càr Dăk Lăk bơyai lơh pơrjum ƀăo yal tơngĭt broă lơh “Dơ̆ lơh chờ plai sầu riêng kơnhoàl Krông Pach” dơ̆ dùl nam 2022, nàng kờñ tơnguh bơngă bơta chi tam tờm ngan bơh tiah do dê. Mờ tơngume “Tơnguh bơngă plai sầu riêng Krông Pack”, dơ̆ lơh chờ geh lơh bơh ngai 01/09 tus ngai 03/09 nam do bal mờ dùl ròt ală broă lơh: Pơrjum hòi jà bơcri priă mờ bơtàu tơnguh phan lơh geh bơh sươn sre, lơh broă sa sươn sre kơ̆ kơl jăp jŏ jòng kơnhoàl Krông Pack; Dơ̆ lơh chờ gùng drà; Pơrlòng đơs pơnđik mờ nhơl đờng gòng kòn cau kơnhoàl Krông Pach; Lòt còp tiah tềl lời wơl kah yau sươn CaDa; Săc rwah “Sươn sầu riêng niam- rềp mềl mờ tiah ơm kis” mờ sa plai sầu riêng tàm sươn, lơh drà ràng tơlik yal tơngĭt ală phan bơna OCOP....

Cau kă phan tus blơi sầu riêng làng bol lơh broă sa dê tàm kơnhoàl Krông Pach

Là kơnhoàl geh bă ù tam tờm sầu riêng tus dùl bơnah puan bă ù tam tờm sầu riêng bơh jơh gùt càr Dăk Lăk dê, sầu riêng neh gơ gơs là tờm chi tam tờm cèng wơl priă lơh geh tờm ai làng bol in mờ pơgồp bơnah bơtàu tơnguh lơh sa tàm tiah do. Dơ̆ lơh chờ plai sầu riêng kơnhoàl Krông Pack là tŭ nàng jờng rơ cau tam tờm sầu riêng mờ ală bơta kwơ lơh sa bơh bơta plai chi do dê cèng wơl. Mơkung bơh dơ̆ lơh chờ nàng kờñ tàm tơrbŏ, yal tơngĭt bơta pràn, bơta ƀươn, tŭ niam bơcri priă tàm broă tam, lơh gơlik mờ tăc bro plai sầu riêng gơ jăt bal mờ bơtàu tơnguh niam chài, nhơl chờ tiah do dê tus mờ drà kă bro tàm lơgar mờ dunia.

Cau mblàng Lơ Mu K’Yến