VOV4.K’ho- Jơnau yal bơh Pôs đồng ling sền gàr tiah nhàr lơgar kơnhoàl Ea H’Leo, gơwèt Mpồl ling sền gàr tiah nhàr lơgar càr Dăk Lăk dê tàm drim ngai 20/03, ală kwang bàng, cau ling bơh pôs đồng dê gam pơgồp bal mờ mpồl lơh broă geh gơnoar lam lơh jăt broă lơh dong kờl làng bol xã tiah nhàr lơgar Ia Lốp, kơnhoàl Ea Súp, càr Dăk Lăk bơsong jơnau gơlời wơl bơh trồ tiah lơh aniai tơnơ̆ dơ̆ mìu dờng geh bal càl walbong gơpồt pràn bal mờ kơnàs còng lơh aniai.

Mìu càl dờng lơh aniai tàm Ia Lôp, Ea Súp, càr Dăk Lăk

Lài hơ̆, tàm mang ngai 18/03, tàm ù tiah thôn Chiềng mờ thôn Đóng, xã Ia Lốp, nisơna geh dơ̆ mìu dờng geh bal kơnàs còng, càl walbong gơ pồt pràn ngan, lơh 10 hìu làng bol tàm 2 thôn do gơtìp hoàc hươr bè hìu đam mờ phan tam, jơtài. 2 hìu bơsram là Hìu bơsram Kâp dùl Cầm Bá Thước mờ Hìu bơsram Mầm non Hoa Lan kung gơtìp càl dờng mờ mìu dờng lơh gơ pồ rơkàng mờ lơh aniai jơh uă ngan phan bơna jơtài. Tơnơ̆ tŭ trồ tiah lơh aniai, Pôs đồng ling sền gàr tiah nhàr lơgar Ea H’Leo neh di tŭ lam mpồl ling bal mờ gơnoar ătbồ tiah do dong kờl làng bol ntrờn phan bơna tus anih ơm ờdo ơdă. Mơkung bơyai lơh lam lòt còp, pơndờm pơnđiang ală hìu bơnhă gơtìp hoàc hươr; ai kwang bàng, cau ling dong làng bol lơh niam wơl hìu đam, hìu bơsram, mhar bè ờs wơl rài kis.

Cau mblàng Lơ Mu K’Yến