VOV4.K’ho- Dong kờl ơruh pơnu geh càn priă, lơh ală mpồl nàng bal mờ gơ̆p tàm cribơyai bơta mờng chài, tam pà bal bơta gĭt wă bè sơnđờm mŭt lơh broă halà bơyai lơh ală dơ̆ pơrlòng bè sơnđờm mŭt lơh broă là broă mờ càr Dăk Lăk gam lơh nàng dong kờl, lòt bal mờ ơruh pơnu, ngan là ơruh pơnu ƀòn lơgar tàm tŭ sơnđờm mŭt lơh broă, jòi broă lơh broă sa.

Tơnơ̆ 03 nam ròng kuăt mơl, bi Huỳnh Ngọc Hội ơm tàm thôn 10, xã Ea Bar, kơnhoàl Buôn Đôn, càr Dăk Lăk neh geh drà tăc kuăt sùm. Pơgăp dùl nam rê hờ ndo, bi Hội rề ơnàng tơnau ròng kuăt bơh 350 thơk vuông tus 2 sàu. Kờp bal pah nhai, bi tăc bơh 20 tus 30 rbô nơm kuăt sơntìl mờ giă tăc 300 đong dùl nơm kuăt sơntìl, mờ 4 nhai dùl dơ̆ tăc dùl tấn kuăt sa puăc mờ giă kờp bal 65 rbô đong dùl kĭ.

Bi Hội kung lơh mờ lơh cau ătbồ Mpồl lơh broă bal ơruh pơnu ròng kuăt mơl kơnhoàl Buôn Đôn bal mờ 25 nă cau tàm mpồl. Bal mờ bơto pơlam bơta chài, ai pà kòn sơntìl ai cau tàm mpồl in, bi Hội să tờm tơn blơi kuăt sa puăc mờ jòi broă lơh gơs biăp sa bơh kuăt nàng tơnguh cồng nha mờ priă jền phan bơna in. Bi Huỳnh Ngọc Hội pà gĭt, tàm ală tŭ sơnđờm mŭt lơh broă, bi neh geh huyện đoàn dong kờl mờ bơto pơlam ală sră pơ àr, kung bè yal tơngĭt anih blơi phan. Kơnờm bơh hơ̆ mờ bi rơhời sơrlèt gan ală kal ke nàng bơtàu tơnguh broă lơh he dê. Bi Huỳnh Ngọc Hội yal: Huyện đoàn kung dong kờl sơl mờ nàng oh mi tơrgùm bơtàu tơnguh mờ yal tơngĭt he mờ bàr pe anih blơi, dong kờl bè priă jền lơh broă halà bè sră pơ àr nàng phan bơna geh tăc ƀươn rlau. Geh bơta dong kờl bơh Huyện đoàn dê kung bè ală ƀan ngàñ tàm kơnhoàl dê den broă lơh bơh he dê geh bơtàu tơnguh rề ơnàng lơh uă, bal mờ lơh bơta phan bơna kơ̆t mrềt nàng blơi jơh phan bơna ai làng bol in drà tăc phan geh sùm rlau, phan bơna geh giă jơnhoa rlau.

Bi Huỳnh Ngọc Hội cau soh àu jù sơnđờm mŭt lơh broă geh cồng nha bơh broă lơh ròng kuăt mơl sa puăc

Jăt bi Nguyễn Quang Trung, Ƀí thư Huyện đoàn Buôn Đôn yal, Mpồl lơh broă bal ơruh pơu ròng kuăt mơl kơnhoàl Buôn Đôn là mpồl lơh broă bal bơh sơnrờp bơh ơruh pơnu dê geh lơh tàm kơnhoàl gơwèt Huyện đoàn. Bal mờ hơ̆, Huyện đoàn kung lơh Mpồl sơnđờm mŭt lơh broă ơruh pơnu gơhòi gơ jà gal ngan đoàn viên ơruh pơnu lơh bal. Nàng ai tơl bơta ai ơruh pơnu ƀòn lơgar in tàm ù tiah kơnhoàl dê sơnđờm mŭt lơh broă, jòi broă lơh broă sa, mpồl đơng lam đoàn neh dong kờl nàng ơruh pơnu geh càn ală bơnah priă càn sa priă cồng ờ uă, lơh ală mpồl lơh sa, mpồl tă pơgồp priă jền. Tus tơngai do, ală kâp mpồl đoàn Huyện đoàn Buôn Đôn gam ătbồ mờr 67 tơmàn đong priă càn ala măt. Geh 33 nă cau mờ broă lơh geh dờp priă sơnđờm mŭt lơh broă bơh Kes priă dà lơgar jòi broă lơh mờ ală priă jền kes priă tiah do dê. Kơnhoàl kung sền gròi ngan bơ̆t bơtàu mờ bơtàu tơnguh ală broă lơh tơrlòng lài, broă lơh pa geh cồng nha lơh sa nàng rề ơnàng lơh uă tàm ơruh pơnu. Kơnờm bè hơ̆ mờ tàm 3 nam do, srơh sơnđờm mŭt lơh broă, jòi broă lơh broă sa tàm Buôn Đôn geh uă bơta tam gơl pa mờ gơ lòt mŭt ngan ngồn tàm uă broă, lơh geh jơnau sồr mờ bơta kơ̆p kờñ bơh ơruh pơnu dê. Ồng Nguyễn Quang Trung, đơs: Ală broă lơh bơh ơruh pơnu dê, ală cau dùl nă să is neh geh uă cồng nha, ngan là ală bơyô kung khin cha ai ală phan bơna bơh he dê lòt tus bal tàm ală dơ̆ pơrlòng bơh huyện halà càr dê bơyai lơh. Bol añ pơn jăt tai pơlam gùng dà mờ yal tơngĭt di tŭ ai đoàn viên ơruh pơnu tàm ù tiah kơnhoàl in gĭt geh ală jơnau yal geh gơrềng tus ală gùng dà broă lơh bơh càr dê. Sac rwah ală cau pa mờ geh phan bơna dipal mờ pơlam gùng dà bal tàm bơtàu tơnguh lơh sa bơh tiah he dê nàng pơn jăt tai bơto pơlam, dong kờl ală bơyô nàng lơh gơs.

Bi Y Lê Pas Tơr, Phó Ƀí thư duh broă sùm Tỉñ đoàn, Kwang ătbồ Mpồl tam klăc ơruh pơnu Việt Nam càr Dăk Lăk đơs, tàm 04 nam rê hờ ndo, srơh sơnđờm mŭt lơh broă, jòi broă lơh broă sa tàm ơruh pơnu tàm càr Dăk Lăk dê ngai sơlơ bơtàu tơnguh mờ geh bơta tam gơl pa. Ală muh mat ơruh pơnu sơnđờm mŭt lơh broă geh cồng nha neh lơh gơlik bơta lơh gơrề, gơhòi gơ jà ală ơruh pơnu ndai geh bơta kơ̆p kờñ ngan brồ guh. Gĭt geh jơnau kờñ sơnđờm mŭt lơh broă, jòi broă lơh broă sa bơh ơruh pơnu dê, mpồl đơng lam đoàn ală kâp neh mờ gam pơgồp bal mờ ală ƀan, ngàñ tàm càr nàng ai tơl bơta, kơrnoăt boh lam ƀươn ƀoài dong kờl ơruh pơnu sơnđờm mŭt lơh broă, jòi broă lơh broă sa. Kwơmàng, bulah sơrlèt gan ală kal ke tài gơrềng bơh kòp bơtờp dê tàm tơngai lài mơya tàm ală kơnhoàl, thị xã mờ ƀòn dờng tàm càr, ală broă lơh pa, broă lơh jak kung gam geh ală bơyô kơnòm să jòi lùp is, tàm bơrbŏ bal mờ gơ̆p nàng dong kờl ală broă lơh sơnđờm mŭt lơh broă bơh tơl nă cau dê. Bi Y Lê Pas Tơr, đơs: Lài ngan là bè bơto bơtê, tề lam hơ̆ sồng bơto pơlam den kung pal kơlôi sơnơng ală broă lơh dipal, ngan là tàm tơngai kòp bơtờp. Bơta dơ̆ bàr là ală bơnah priă jền den bol añ kung kờñ tàm tơrbŏ, bơto pơlam ală bơyô in nàng geh càn geh ală priă jền uă rlau. Dơ̆ pe tai, den hơ̆ là bơta lơh ngan tàm tơrbŏ, pơgồp bal wơl mờ ală mpồl nàng lơh bè lơi mờ geh uă broă đah rơnàng mpồl lơh sa kă bro lài mờ ală rơnàng mpồl lơh sa kă bro tơnơ̆, hơ̆ sồng kung bè là tàm tơrbŏ, tăc bro ală phan bơna mờ tàm tơrbŏ wơl mờ ală cau mờng chài gah broă lơh do, ală cau lơh sa kă bro tiơng pơnrơ nàng khi in gơtùi tàm cribơyai bơta mờng chài, lơh gơlik bơta tàm gơdan ai ơruh pơnu in.

Mŭt bal tàm ală mpồl bè sơnđờm mŭt lơh broă, tàm tơrbŏ tăc bro phan bơna ai ơruh pơnu in là broă lơh bơh mpồl đơng lam đoàn dê nàng dong kờl ơruh pơnu sơnđờm mŭt lơh broă

Bal mờ ală bơta dong kờl bơh gơnoar ătbồ mờ ală mpồl cau dê, uă ơruh pơnu tàm càr Dăk Lăk neh khin cha sơrlèt gan ală kal ke nàng sơnđờm mŭt lơh broă, jòi broă lơh broă sa. Ală kal ke bè priă jền, sră pơ àr, drà tăc bro phan rơhời geh bơsong geh dong ală broă lơh sơnđờm mŭt lơh broă, jòi broă lơh broă sa bơh ơruh pơnu ƀòn lơgar dê gơ gơs ƀươn ƀoài rlau. Bơh hơ̆ lơh gơlik geh bơta gơn kơnờm nàng lơh gơrề srơh, ngui geh cồng nha geh kwơ ngan bơh tơl broă lơh sơnđờm mŭt lơh broă ơruh pơnu dê.

            Cau cih H’Xíu- Cau mblàng Lơ Mu K’Yến