VOV4.K’ho- Tơngai do, drà kă bro ƀañ Trung thu tàm ù tiah càr Dăk Lăk neh sơnđờm duh hồl. Ală cơldŭ ràng tăc ƀañ Trung thu lila niam ngan mờ uă ƀañ krơi is hơ pơrgon dùl kàl Trung thu duh hồl tơnơ̆ 1 nam ờ duh hồl tài bơh kòp Kovid-19.

Rlau 1 poh do, tàm ală gơl gùng drà tờm bơh ƀòn dờng Buôn Ma Thuột dê bè Lê Thánh Tông, Lê Hồng Phong, Phan Bội Châu, Phan Chu Trinh... uă cơldŭ ràng tăc ƀañ Trung thu neh geh lơh, bơka niam ngan. Gam sac rơwah ƀañ Trung thu nàng lơh phan pà ai cau pròc mhàm in, ồng Bùi Minh Chánh, ơm tàm sơnah ƀòn Tân Lợi, ƀòn dờng Buôn Ma Thuột, càr Dăk Lăk pà gĭt, ală bơta ƀañ geh mat kă bro tàm drà kă bro là bơta sac rơwah bơh hìu bơnhă ồng dê. Ồng Bùi Minh Chánh đơs: Pah nam añ sùm sac rơwah gah ƀañ Trung thu geh mat kă bro tàm drà kă bro dê, geh bơta bơkah, ờdo ờdă, geh tiah tờm lơh gơlik. Añ gŏ nam do ƀañ geh uă rlau dùl ết pơndrờm mờ tơl nam, rùp ƀañ niam rlau mờ lila.

Mpồl lơh broă atbồ drà kă bro lòt sền ƀañ Trung thu tàm anih lơh sa kă bro tàm ù tiah ƀòn dờng Buôn Ma Thuột

Nam do, ală cơldŭ ràng tăc ƀañ tơn bơh ală mat kă bro dờng bè Kiñ Đô, Yến Sào Khánh Hòa, Bibica... mờ ƀañ bơh ală anih bè Hà Nội, Thành Phát geh uă rlau bơnah bañ Trung thu tàm tơngai do. Ală bơta ƀañ lila bè rùp ƀañ, ală bơta. Bơdìh mờ 2 mpồl ƀañ tờm ngan là ƀañ lơbơn lơiang mờ ƀañ buh den geh ƀañ lời ai cau sa ờ sa poăc sa ka mờ cau sa wèr in mờ tơl làm ală bơta bơkah bè gar sen, khoah xañ, bùm trau, mè đen gar rơpung kài, phan tàm dơlam lơbơn, bañ sa tàm bơrlŭ bal, gar hạñ ñân, poăc sur buh, vi ka jambon, iar buh jambon tăp boh...

Ờ mình kờñ bè bơta bơkah bơh tơl nơm ƀañ dê lơm, cau ngui sa ngai sơlơ sac rơwah tàm broă sền tàm bơdìh pơ àr bơh hộp ƀañ dê nàng lơh phan pà tàm tơngai do. Bi Nguyễn Thị Bích Phương, atbồ Anih ràng tăc phan Ngọc Khánh, gùng Phan Ƀội Châu, sơnah ƀòn Tân Tiến, ƀòn dờng Buôn Ma Thuột pà gĭt: Bàr nam lài den gơbàn kòp aniai den bol añ geh tăc ƀañ dùl ết, mơya nam do kòp kung neh geh gròi sền đau sơl den bol añ kung neh blơi ƀañ bơh ală gah geh mat kă bro geh pơngă pin dờn rê nàng drơng broă ai làng bol in, bè ƀañ Kiñ Dô, Bibica mờ Đồng Khánh dê tai.

Dùl anih tăc ƀañ Trung thu tàm gùng Lê Thánh Tông, ƀòn dờng Buôn Ma Thuột

Uă cau tờm cơdŭ ràng tăc ƀañ pà gĭt, ƀañ Trung thu nam do geh gơguh pơgap bơh 3 rơbô tus 5 rơbô đồng dùl nơm pơndrờm mờ pah năm. Jat jơnau khi  dờp geh bơh cau lơh gơlik ƀañ dê den tài bơh giă blơi phan lơh ƀañ bơh sơnrờp gơ tam gơl gơguh priă den ƀañ tăc bơdìh kung pal gơguh giă priă sơl. Bi Phạm Thị Chúc Giang, cau tờm anih lơh sa kă bro ƀañ kèo Phương Hoa, ơm tàm gùng Y Jŭt, ƀòn dờng Buôn Ma Thuột pà gĭt, kờp bal dùl nơm ƀañ Trung thu geh giă bơh 60 tus 75 rơbô đồng dùl nơm. Gơwèt mờ ală ƀañ neh geh mat kă bro den geh giă gơguh tus rlau 3 tơlak đong dùl hộp (4 nơm ƀañ). Kung jat bi Giang, tàm tơngai do, cau blơi gam dùl ết. Bi Phạm Thị Chúc Giang đơs:Anih ràng tăc phan bol añ neh kă bro rlau 10 nam do, pơndrờm mờ nam lài den nam do bàr pe gah phan gơguh priă dùl ết, tus tŭ do khà blơi ƀañ kung ờ hềt uă sơl, kơ̆p kờñ là gam bàr pe ngai tai geh cau blơi ƀañ uă rlau tai.

Nàng sền gàr cau ngui sa in tàm tơngai blơi phan mờ ală mpồl cau, cau dùl nă să is lơh sa kă bro tờm ngan, Kụk Atbồ drà kă bro Dăk Lăk gam pờ dơ̆ lòt sền tơngume lài mờ tŭ, tam tŭ mờ tơnơ̆ tŭ sa Tềp Trung thu nam 2022. Bal mờ hơ̆, tus bồ nhai 9 càr Dăk Lăk geh lam 2 mpồl lòt sền ală gah tàm 6 kơnhoàl, thị xã mờ ƀòn dờng lòt sền broă lơh jat ală jơnau sồr bơh adat boh lam dê bè ờdo ờdă phan ngui sa bơh ală anih lơh sa kă bro tàm ù tiah càr dê.

Ồng Trần Văn Tiết, Phó Ci kụk Ờdo ờdă kloh niam phan ngui sa càr Dăk Lăk dê, pà gĭt: Bol añ geh tơrgùm lòt sền gơwèt mờ ală gah geh ngui uă tàm dơ̆ sa tềp Trung thu bè, ƀañ, mư̆t, kèo, bièr ơlak, dà lơngồt. Jat tơl tơngume mờ geh broă lơh lơh glài krơi is jat jơnau sồr. Gơwèt mờ anih lơh gơlik phan ờ geh sră tơl ală bơta den lơh glài jat broă lơh ờ geh sră ai gơnoar, den hơ̆ sồng anih lơh gơlik phan geh sră ai gơnoar geh tơl ală bơta ờdo ờdă phan ngui sa mơya ờ yal is phan bơna den kung lơh tìs mờ gơtìp lơh glài sơl. Tàm tŭ lơh gơlik phan dilah he geh ngui ală phan, phan tĕ ai phan bơna in mờ ờ gŏ geh tơl bơta niam den geh tơrgùm bal tàm broă lơh glài mờ ală broă lơh tìs. 

Cau cih Nam Trang- Cau mblàng K’Hạnh