VOV4.K’ho - Mờ ală broă lơh mùl màl bè dong kờl lơh hìu ơm; dờp sền gàr, ròng siam cau mè Việt Nam khin cha jăk chài tus jơh rài, sùm còp să, lam sồr bè phan bơna bal mờ nùs nhơm... neh pơgồp bal bơnah lơi tơmù bơta moăt bơh rài lam lơh, dong kờl ală hoìu nhă geh sră dong kờl bơh dà lơgar, cau geh màng mờ dà lơgar tàm càr Dăk lăk geh rài kis ngai sơlơ niam bơnĕ rơlao.

                                Mò Vân (cau soh ào phồng) chờ hờp tŭ geh mŭt ơm tàm hìu pa
Tàm hìu nùs nhơm pa geh lơh gơs, mò Lê Thị Tường Vân kis tàm thị trấn Quảng Phú, kơnhoàl Cư̆ Mgar, càr Dăk Lăk chờ hờp pà git, nhai 3 lài do, geh thị trấn dong kờl 50 tơlăk đong, làng bol, oh mi hìu nhă tàm jơi nòi, cau geh uă pà uă, cau ờ geh uă pà ờ uă nàng hìu nhă lơh geh hìu pa. Tŭ do, klao bi gơtìp koĕt kơl te mò dê neh geh hìu ơm niam rơlao nàng sơm kòp, geh anih nàng duh khoai ƀồc bèp neh phi să tàm rài tam lơh mờ ling lơgar Mỹ sò tơm kung neh niam rơlao: “Hìu nhă kung kal ke. Lơh broă hơ̆ sồng ròng siam bi kung neh glar, kơnờm mờ dà lơgar dong kờl lơh geh hìu do kung chờ sơl. Dan ưn ngài Phòng Thương bi neh dong kờl bi añ dê”.

Bal mờ broă lơh hìu nùs nhơm, ală broă lơh drơng gàr rài kis ai hìu nhă cau geh sră dong kờl bơh dà lơgar, cau geh màng mờ dà lơgar kung neh geh kơnhoàl Cư̆ Mgar sền gròi lơh geh cồng nha. Ồng Bùi Đức Khương, cau ling sồt să khà 3 bơnah 4 kis tàm ƀòn 2B, xã Ea M’nang pà git, bơdìh mờ broă tơm priă di tŭ ală broă dong kờl bơh dà lơgar dê; Đảng ƀộ, gơnoar atbồ, bal mờ ală gah, mpồl lơh broă tàm do ndrờm sùm tus còp nền nòn, dong kờl, lam sồr bè phan bơna bal mờ nùs nhơm. “Đơs ngan ală oh kòn añ neh jơh dờng, geh bơsram sră tus gùng tus dà kung kơnờm bơh dà lơgar dong kờl ai oh kòn cau ling sồt să in, hơ̆ sồng tơnơ̆ do geh dờp tai broă dong kờl bơh cau gơtìp kŭp jàm tàm rài tam lơh. Đơs bal là ờ mìng hìu nhă añ, uă hìu cau ling sồt să, cau ling chơ̆t màng mờ hìu nhă cau geh màng mờ dà lơgar den Phòng Thương binh xã hội sền gròi uă ngan. Tŭ gơtìp kòp tê jê să, gơtìp rềs àr, tŭ hìu đan gơtìp mìu càl dờng, dà tih dà cò lơh den tus dong kờl di tŭ”.

      Cau ling sồt să Bùi Đức Khương chờ hờp tài rài kis neh ring niam, oh kòn bơsram tus gùng tus dà

Kơnhoàl Cư̆ Mgar tŭ do geh rơlao 3 rơbô nă cau geh màng mờ dà lơgar; 5 nă cau mè Việt Nam khin cha jăk chài gam kis. Ồng Nguyễn Hồng Minh, Kwang atbồ phòng Lao động, Thương binh Xã hội kơnhoàl Cư̆ Mgar pà git, kấp ủy, gơnoar atbồ ală kấp geh sền gròi ngan mờ đơng lam broă lơh jăt broă dong kờl gơwèt mờ cau geh màng mờ dà lơgar. “Tus tŭ do, jơh ală hìu geh sră dong kờl bơh dà lơgar tàm kơnhoàl ndrờm geh khà rài kis tơl ngui tơl sa ha là uă rơlao mờ khà tơl ngui tơl sa bal kơnhoàl dê, ală broă dong kờl gơwèt mờ cau geh màng mờ dà lơgar sùm geh lơh nền nòn ngan mờ di mờ kơrnoăt neh geh ai, tàm hơ̆ uă ngan là broă dong kờl bal mờ priă dong kờl geh ai di tŭ tus mờ cau geh màng mờ dà lơgar”.

Gùt càr Dăk Lăk geh rơlao 45 rơbô nă cau geh màng mờ dà lơgar. Broă drơng gàr rài kis phan bơna bal mờ nùs nhơm ai ală hìu nhă geh sră dong kờl bơh dà lơgar, cau geh màng mờ dà lơgar sùm geh ală kấp, ală gah lơh broă sền gròi ngan. Bal mờ broă lơh niam ală broă dong kờl bơh Đảng, Dà lơgar, tàm 5 nam pa do, ală tiah tàm càr Dăk Lăk neh lơh jăt broă sền gàr, dong kờl priă blơi phan lơh tơnpràn să jan, tơnguh wơl bơta pràn să jan; dong kờl lơh wơl, lơh pa hìu ơm ai ală cau in mờ kờp jơh khà priă rơlao 70 tơmàn đong.

Jăt ồng Nguyễn Quang Thuân, Phó kwang atbồ Sở Lao động, Thương binh mờ Xã hội càr Dăk Lăk yal, bŭ lah broă drơng gàr ai cau geh sră dong kờl bơh dà lơgar gam ờ hềt tus jơh. Tàm càr kung gam geh 165 hìu rơƀah gơwèt hìu geh sră dong kờl bơh dà lơgar, mờr 1 rơbô nă cau geh màng mờ dà lơgar gam gơtìp kal ke bè hìu ơm. Ồng Nguyễn Quang Thuân đơs tờm, ală broă lơh gam ờ pràn do geh bơsong tàm tơngai gờñ ngan. “Tus do geh ală broă sền wơl tus tơl hìu, tơl ƀòn nàng sền ờ tơl khà broă lơi, di lah hìu hơ̆ ờ gam tơl pràn lơh broă tai den dan mờ Ƀộ tam gơl gơs hìu geh broă dong kờl bơh mpồl bơtiàn nàng geh dờp broă dong kờl mờ lơh ngan tus lồi nam 2022 do den geh bơsong gơs 165 hìu rơƀah, tiah lơi ờ tơl khà priă lơi den geh dong kờl ai tơl bơta nàng klàs mờ rơƀah. Gơwèt mờ ală hìu kal ke bè hìu ơm, lơh ngan tus jơh nam 2023 geh bơsong jơh ai cau geh màng mờ dà lơgar tàm gùt càr in”.

Tàm Tây Nguyên gam uă kal ke, ală broă lơh mùl màl bơh ală kấp, ală gah lơh broă tàm càr Dăk Lăk tàm tơngai do neh pơgồp bal bơnah bơtàu tơnguh uă rài kis phan bơna, nùs nhơm ai ală hìu nhă geh sră dong kờl bơh dà lơgar in, cau geh màng mờ dà lơgar, lơh jăt bơhiàn “Hùc dà kah tô dà” bơh jơi bơtiàn he dê.

Cau cih Nam Trang-Cau mblàng Ndong Brawl