VOV4.K’ho- Mờ jơnau kờñ ờ gŏ lời gơlik geh ală dơ̆ khih phan sa mờ ală bơta kòp bơtờp bơh phan ngui sa, tàm tơngai sa tềp Trung thu nam 2022, càr Dăk Lăk neh lam lơh broă rơndap lơh lòt sền ală anih lơh gơlik, kă bro ƀañ Trung thu tàm ù tiah càr dê.

Ală mpồl lòt sền geh tơrgùm tàm ală gah phan ngui sa

Jat hơ̆, bơh ngai 6 tus ngai 8 nhai 9, càr Dăk Lăk geh lơh 2 mpồl lòt sền ală gah tàm 6 kơnhoàl, thị xã mờ ƀòn dờng lòt sền broă lơh jat ală jơnau sồr adat boh lam dê bè ờdo ờdă phan ngui sa bơh ală anih lơh gơlik mờ kă bro tàm ù tiah càr dê. Mpồl lòt sền geh tơrgùm tàm ală gah phan ngui sa geh ngui uă tàm tơngai sa tềp Trung thu, bè: ƀañ, mư̆t, kèo, ƀièr, ơlak, poăc, phan lơh bơh poăc. Bal mờ broă lòt sền, Mpồl geh pơgồp bal mờ ală mpồl lơh broă bơh yau nàng sơlơ tơnguh broă mblàng yal ală jơnau sồr bè ờdo ờdă phan ngui sa tus ală anih mòn lơh, lơh gơlik mờ kă bro phan ngui sa mờ bơto pơlam làng bol in gĭt broă sac rơ wah, ngui sa phan ngui ờ do ờdă tàm tơngai sa tềp Trung thu.

Cau mblàng K’Hạnh