VOV4.K’ho- Nam bơsram 2021- 2022, càr Dăk Lăk geh rlau 34 rbô 800 nă kơnòm bơsram ơdŭ 12 geh lòt pơrlòng dơ̆ pơrlòng jơh bơsram kâp pe, uă ngan tàm khà do geh pơn jăt tai pơrlòng halà lơh sră cih mat sền swì săc rwah nàng mŭt bơsram ală hìu bơsram Đại họk, kao đẳng.

Kơnòm bơsram ơdŭ 12 tàm kơnhoàl Krông Pack, càr Dăk Lăk

Nàng ai tơl bơta niam ngan rlau jơh ai kơnòm bơsram ơdŭ 12 in gĭt mhar mờ ală jơnau yal bè dơ̆ pơrlòng mŭt bơsram đại họk, kao đẳng, Sở Giáo zụk mờ Đào tạo càr Dăk Lăk neh sồr ală hìu bơsram sơlơ tàm lùp đah cau pơgru ătbồ ơdŭ mờ mè bèp kơnòm bơsram, kơnòm bơsram bơh uă broă lơh, bè: lơh tơn, pơyua jơnau cih yal, ngui internet mpồl bơtiàn bè zalo, facebook...Bal mờ hơ̆, ală hìu bơsram pal gàr tơl ală bơta bè măy mok nàng dong kờl ală oh tŭ lơh sră cih mat, tam gơl jơnau kơ̆p kờñ mŭt tàm ală hìu bơsram tơnơ̆ tŭ geh dờp cồng nha jơh bơsram kâp pe.

Cau mblàng Lơ Mu K’Yến