Ồs đèng Dăk Lăk tŭ do gam atbồ 14 trạm ƀiến áp 110kV mờ rlau 1 rbô 200 phan bơna, măi mok gơ jat bal. Tàm nhai mìu, kông ty ồs đèng Dăk Lăk neh lơh 2 dơ̆ tơrlòng bơta lơngăp lơngai tàm ală trạm ƀiến áp, sền sơ wì broă gàr kloh niam, lơh niam phan bơna măi mok nàng gàr gùng che đèng geh pờ tơlik sùm mờ geh cồng nha. Broă tơrlòng tàm ală trạm ƀiến áp 110kV tơrgùm uă ngan tàm broă sền sơ wì bơta pràn pờ tơlik ồs đèng, van dră wơl kơ nàs, káp kong mờ bơta kơn jơ̆… tŭ geh mìu càl rbut dờng. Bal mờ hơ̆, ală mpồl gam tơnguh tai cau lơh broă gàr kloh niam, lơh niam phan bơna măi mok mờ bơsong ală bơta ờ niam tàm trạm ƀiến áp. Bơh ală dơ̆ tơrlòng, ồs đèng Dăk Lăk neh di tŭ git gŏ, bơsong 15 bơta ờ niam gơ rềng tus rơle lơh is, lơh sir ală măi mok nàng tơrmù ƀà bơta ờ niam, tơnguh uă bơta pin dờn pờ tơlik ồs đèng.