Lam lơh dơ̆ lơh broă uă kơryan ală bơta cau tìs lài mờ tŭ, tàm tŭ mờ tơnơ̆ sa tềp dà lơgar Giáp Thìn 2024, bal mờ broă sơlơ tơnguh tai broă lơh lòt sền, gròi sền gàr niam lơngăp lơngai lòt rê tàm gùng, Mpồl kảñ sát gùng lòt càr Dăk Lăk lơh ngan kơryan, git gŏ, lơh glài ală cau lơh tìs adat boh lam tàm ală gơl gùng; kơryan ală bơta phan ờ ai, phan tìs adat boh lam.

Càr Dăk Lăk tŭ do geh 5 gơl gùng dờng lòt gan geh: 26, 27, 29, 14, 14C mờ uă gơl gùng càr, tơrbŏ mờ ală càr Dăk Nông, Lâm Đồng, Gia Lai, Phú Yên mờ Khánh Hòa. Tàm nam 2023, Kảñ sát gùng lòt Kwang àng càr Dăk Lăk neh git gŏ, jài ai mpồl lơh broă geh gơnoar in lùp khàu, lơhg lài 99 nă cau, 82 nơm rơndeh rơndồ gơ rềng tus ală broă lơh tìs adat boh lam tàm gùng. Kảñ sát gùng lòt neh kup mờr 1 tấn phău, 1 rô 540 kơldung jràu tìs adat boh lam, 10 tấn phơng sih ờ git loh anih lơh gơlik… Mìng is tàm 2 poh do, ală mpồl lòt sền neh git gŏ, kơryan 13 broă lơh tìs gơ rềng tus ma túy, pơndiang phău tìs adat boh lam, jràu chu tìs adat boh lam…