Trồ tơngai duh uă, trồ prang dờng jŏ jòng lơh jơnau kờñ ngui đèng tàm Dăk Lăk gơguh uă. Bồ nhai 04 nam 2024, bơta pràn ngui gùng che ồs đèng lơh geh 510 MW, gơguh 27% pơndrờm dùl tŭ bal mờ nam lài. Kơnờm gờñ rcang ală broă lơh rcang lài, ală gùng che ồs đèng càr Dăk Lăk ai ngui pin dờn, gàr niam broă pờ đèng lơngăp lơngai sùm ai cau ngui in.

Ală broă jàu tờm tàm broă atbồ bơta chài bơh sơnrờp là lơh sir lơh geh mờ sơr lèt gan khà broă rơndăp lơh geh jàu. Bơh bồ nam tus tŭ do, ală mpồl lơh broă ồs đèng tàm càr neh lòt sền, bơsong 158 bơta ờ niam tàm gùng che ồs đèng. Tàm pơrjum sền wơl broă lơh atbồ pa do, ồng Trần Tấn Phùng– Phó Kwang atbồ Kông ty ồs đèng Dăk Lăk sồr ală mpồl lơh broă pơn jat tai tơnguh uă nùs nhơm geh kơnòl, jat tàm ală bơta geh ngan nàng lam lơh jat niam ală kơnòl broă, gàr niam lơngăp lơngai gùng che ồs đèng drơng làng bol in.