Nam bơsram 2023- 2024, Hìu bơsram kấp dùl, kấp bàr Lê Duẩn, xã Ea Puk, kơnhoàl Krông Năng geh 710 nă kơnòm bơsram tàm 2 kấp bơsram. Bơh nggùl nhai 8 do tơn, hìu bơsram neh lơh sir broă lơh sac rơwah kơnòm bơsram, bơto bơtê broă lơh ờs mờng ai mpồl cau pơgru tàm jơh ală khối ơdŭ in, ngan là cau pơgru tàm ơdŭ 4 mờ ơdŭ 8 jăt jơnau bơto bơtê pe kấp nam 2018. Mơkung blơi, bơtơl phan bơna măi mok bơto bơsram, lam pơs wàs, bơka ƀlàng nhơl hìu bơsram, cơldŭ bơsram, lơh geh ù tiah tơlir, sàng goh, niam ai nam bơsram pa in. Ồng Nguyễn Duy Nghĩa, Kwang atbồ Hìu bơsram dê pà gĭt: “Hìu bơsram neh lơh niam wơl phan bơna, hìu jă brê, pơs wàs sàng goh, ơn bong đèng pa mờ blơi phan bơna măi mok drơng broă ai jơnau bơsram pe kấp pa ơdŭ 4 mờ ơdŭ 8 in. Ai jơnau bơsram ơdŭ 5 mờ ơdŭ 9 kung gam là jơnau bơsram yau phan bơna hìu bơsram dê gam tơl làm đau sơl”.

Bal mờ broă lơh niam wơl bàr pe broă dềt, uă tiah tàm càr neh sền gròi ai priă jền gĭt nđờ jơ̆t tơmàn đong ai ală hìu bơsram in lơh pa cơldŭ bơsram, hìu ơm rlô ai cau pơgru hìu bơsram in, ƀlàng nhơl hìu bơsram dê jăt broă lơh kơ̆ kơl jăp, tơl jơnau kờñ. Pơnrơ ngan là tàm kơnhoàl Cư Mgar, nam bơsram do, kơnhoàl neh ai priă jền rlau 33 tơmàn 500 tơlak đong nàng bơcri priă lơh phan bơna mờ bơtơl phan bơna măi mok bơto bơsram ai ală hìu bơsram in. Tus tŭ do, phan bơna tàm ală hìu bơsram sền bal là neh lơh geh jơnau kờñ jơnau bơto bơtê pe kấp pa dê. Ồng Nguyễn Tự Do, Kwang atbồ Cơldŭ bơto bơtê kơnhoàl Cư Mgar yal:“Gah bơto bơtê kơnhoàl Cư Mgar neh đơng lam ală hìu bơsram tă pơgồp jơnau đơs mờ gơnoar atbồ ală tiah, Ủy ƀan Ñân zân kơnhoàl pơn jăt tai bơtơl, lơh niam wơl phan bơna, blơi phan bơna măi mok drơng ai kơnòl broă bơto mờ bơsram bơtơl tàm ntrờn cau pơgru gàr niam tơl khà jăt jơnau sồr bơh Ƀộ Giáo dục mờ Đào tạo dê nàng lơh jăt jơnau bơto bơtê pe kấp nam 2018 mờ jơnau bơto bơtê pe kấp gam ngui tŭ do, gàr niam ai ală hìu bơsram in mut tàm nam bơsram pa niam ngan”.

Nam bơsram 2023- 2024, càr Dăk Lăk geh rlau 1 rơbô hìu bơsram bơh Mầm non tus kấp pe. Tềng đap nam bơsram pa, càr Dăk Lăk neh đơng lam gah bơto bơtê pơlam tàp broă lơh ờs mờng ai mpồl cau pơgru in, tàm pơn ring cau pơgru bơh hìu bơsram jơng kah uă cau pơgru tus hìu bơsram ờ tơl cau pơgru. Hòi jà tơl priă jền nàng rcang bè phan bơna, măi mok drơng broă bơto mờ bơsram ai ală hìu bơsram in lơh geh jơnau sồr jơnau bơsram pe kấp nam 2018. Nam bơsram do, gùt gah bơto bơtê geh bơcri priă rlau 965 tơmàn đong nàng lơh pa, lơh niam wơl, blơi phan bơna măi mok bơto mờ bơsram. Mò Lê Thị Kim Oanh, Phó Kwang atbồ Sở Giáo dục mờ Đào tạo càr Dăk Lăk pà gĭt: “Sền bal là gơwèt mờ ală hìu bơsram gơwèt Sở Giáo dục dê tus tŭ do neh lơh geh ală jơnau sồr bè phan bơna kung bè phan bơna măi mok nàng gơtùi lam lơh bơto mờ bơsram ngan là tàm tơngai lam lơh jơnau bơsram nam 2018. Bơdìh hơ̆ gơwèt mờ ală hìu bơsram kấp mầm non, kấp dùl, kấp bàr neh tam pà kấp ai ală kơnhoàl in mơya Sở kung sồr ală Cơldŭ bơto bơtê rcang lài tàm broă kờp sền wơl ală bơta bè phan bơna, măi mok nàng jăt tàm ală bơta hơ̆ yal mờ Ủy ƀan Ñân zân kấp kơnhoàl in nàng geh jơnau dan ai ală priă jền nàng gàr tơl ală bơta lam bơto mờ bơsram ai nam bơsram pa in”.

Kung jăt jơnau yal bơh Sở Giáo dục mờ Đào tạo càr Dăk Lăk dê nam bơsram pa do, gùt càr geh pơgap 30 rơbô nă kơnòm bơsram jơh bơsram kấp bàr. Tàm hơ̆, rlau 21 rơbô 100 nă kơnòm bơsram gơ kờn sac rơwah bơsram mut ơdŭ 10 kấp pe, rlau 4 rơbô nă kơnòm bơsram gơ kờn sac rơwah bơsram tàm ală Anih tờm bơto bơtê sùm- bơto broă lơh. Khà gam wơl rlau 2 rơbô 400 nă kơnòm bơsram tŭ do kung gam ờ hềt geh hìu bơsram nàng bơsram. Nàng bơsong broă do, Ủy ƀan Ñân zân càr Dăk Lăk sồr Sở Giáo dục mờ Đào tạo pơn jăt tai kờp sền jơnau kờñ sac rơwah kơnòm bơsram tàm ală hìu bơsram kấp pe sac rơwah kơnòm bơsram tơl khà jăt jơnau sồr. Mơkung kờp sền di pal khà kơnòm bơsram ờ tơl hìu bơsram, cơldŭ bơsram tàm tơl tiah dê nàng tàm pơnring ai ală kơnòm bơsram mut bơsram tàm ală anih tờm bơto bơtê sùm. Ală tiah lài ngan ai bơtơl priă jền sơr băc mhar gàr tơl phan bơna, lơh sră pơgron mờ cau pơgru ai ală anih tờm bơto bơtê sùm, bơto broă lơh nàng di pal mờ jơnau kờñ bơsram sră bơh ală kơnòm bơsram dê.