Lòt sền tàm 2, 3 drà tàm ƀòn dờng Buôn Ma Thuột bè drà Tân An, drà tiah tờm Buôn Ma Thuột, nùs nhơm blơi phan sa tềp neh sơn đờm duh hồl. Duh hồl gờñ ngan rlau jơh là gah pah soh, khŏ zep. Ală phan ƀañ, kèu, mứt kung neh geh ràng tac mờ uă bơta phan. Bi Lê Thị Diểm Huyền, cau tac àu mpha tàm drà Buôn Ma Thuột pà git, tŭ do khà blơi phan neh gơguh dùl êt, mơya bi kung gam kơrhia tàm broă blơi phan nàng tac: “Nam do kung prap dùl êt phan niam, nam do Noel mờ sa tềp rềp ngan den tàng cau tac phan kung ờ huan blơi uă phan nàng tac. Broă tac bro nam do den kung tac đau bè hơ̆, ờ huan yòm ir”.

Jat bi Nguyễn Thị Nga ơm tàm sơnah ƀòn Tân Hòa, ƀòn dờng Buôn Ma Thuột yal, ală anih tac bro kơrhia ngan tàm broă ai phan tac là di mờ bơta geh ngan. Tài bè hìu bơnhă bi dê, bulah gŏ drà sa tềp li la phan bơna, mơya bi ờ blơi uă bè pah nam: “Añ gŏ phan nam do wil tơl ală bơta, giă den gơguh dùl êt pơn drờm mờ nam lài. Mìng is să tờm añ den añ blơi ală phan pal geh, ai phan sa ris den tus rềp ngai sa tềp añ blơi lài ai ală ngai 30 mờ ngai 1 sa tềp in, ai ală ngai 2, 3, 4, 5 sa tềp den jơh ală drà neh tac wil tơl jơh lơm den tàng añ ờ blơi prap lài halà ơn tàm tùh lơh mrềt”.

Tàm siêu thị Co.opmart Buôn Ma Thuột, tŭ do phan drơng sa tềp neh tac uă; tàm hơ̆ khà phan Việt Nam geh 95%. Mò Trần Thị Thành Nhân, Phó Kwang atbồ Siêu thị pà git, nam do, bơdìh mờ lam lơh broă lơh gàr kơ̆ kơljap giă den siêu thị gam geh uă broă lơh pơn jờng blơi phan gam geh ngui sùm bơh tŭ do tus sa tềp: “Siêu thị neh geh broă rơndap lơh prap rơcang lài phan bơna mờ khà gơguh rlau mờ nam lài là 15%, siêu thị kung pơgồp bal mờ ală mpồl tac phan, geh broă rơndap lơh lơh gơlik kung bè tơnguh khà phan prap rơcang lài nàng gàr wil tơl phan bơna mờ li la bơta phan. Siêu thị Co.opmart sùm hơ pơrgon gàr giă kơ̆ kơljap mờ lơyah rlau pơndrờm mờ drà kă bro bơh 5 tus 10% mờ kung lam lơh uă broă lơh pơn jờng blơi phan bè giă nàng tơnguh tai gơnoar kuơ ai cau blơi phan in”.

Dăk Lăk tŭ do geh 148 drà, 1 drà bơh sơn rờp, 8 anih tờm kă bro, diêu thị mờ rlau 60 anih tac phan mờ 2, 3 hìu tac phan dềt. Jat ồng Lưu Văn Khôi, Kwang atbồ Sở Kông thương càr Dăk Lăk yal, bơnah phan prap rơcang gàr lài sa tềp nam do gơguh pơgap 56% pơndrờm mờ nam lài: “Sở Kông thương bol hi neh lơh broă mờ ală mpồl lơh gơlik, tac bro phan, ală anih tac phan, ală siêu thị, anih tờm kă bro nàng sồr ală mpồl do sơlơ tơnguh broă lơh gơlik, tac bro phan, hơ̆ sồng geh broă rơndap lơh ngui ală bơta phan mờ rơcang lài prap phan bơna nàng gàr tơl phan tac cau ngui sa in tàm tơngai lồi nam kung bè tàm dơ̆ sa tềp bơhiàn yau Qúy Mão 2023”.

Càr Dăk Lăk geh rlau 1 tơlak 800 rbô nă làng bol. Anih lơh broă geh gơnoar đơs lài jơnau kờñ ngui sa tàm nhai sa tềp digơlan gơguh 20% pơndrờm mờ ngai ờs. Den tàng, Ủy ƀan Ñân zân càr Dăk Lăk tă rlau 1 rbô 510 tơmàn đông nàng rơcang gàr lài phan bơna pal geh. Mpồl phan geh càr Dăk Lăk git nền pal gàr kơ̆ kơljap drà kă bro mờ prap rơcang gàr lài là phe, phan sa (geh poac sur, poac iar ơda, tap iar ơda, tơngi, sơdàng, ƀòk ngòk mờ ală phan sa lơh gơlik, biap, kơnuh, plai đo), xăng zờu. Tŭ do neh geh 10 mpồl lơh sa kă bro dờng bơt bơtàu broă rơndap lơh rơcang lài phan, prap lài phan ngui sa, xăng zờu mờ pơgap rlau 420 tơmàn đông.

Bơh tŭ do tus tơngai lài mờ tŭ mờ tơnơ̆ tŭ sa tềp bơhiàn yau Qúy Mão 2023, mpồl lơh broă geh gơnoar càr Dăk Lăk geh gròi sền nền nòn drà kă bro nàng di tŭ git gŏ, lơh glài kràñ ală broă lơh lơh tìs adat boh lam bè prap phan tơnguh giă tac, tac bro phan ờ ai tac, phan blơi tìs mờ adat boh lam bơh lơgar ndai, phan ờ git loh anih lơh gơlik, ờ geh top mat sơn đan, blac pơr lồm kă bro…

Kwang đơng lam bồ Kụk atbồ drà kă bro càr Dăk Lăk pà git, gam lam lơh broă rơndap lơh lơh broă uă rơcang sơndră kă bro phan tìs mờ adat boh lam, blac pơrlồm kă bro mờ phan ờ ngan ală nhai lồi nam 2022 bal mờ lài mờ tŭ, tơnơ̆ tŭ sa tềp bơhiàn yau Qúy Mão. Bơdìh hơ̆ tai, mpồl atbồ drà kă bro lam lơh sền sơ wì rlau 70 mpồl, geh ală anih prap phan, anih tơrgùm phan, ală anih tờm kă bro, diêu thị, drà bơh sơn rờp, kờp bal mờ ală cau geh broă tac bro phan tàm mạng xã hội… nàng kờñ lơh glài kràñ ală broă lơh lơh tìs adat boh lam bè kă bro, sơmờm tơngai lồi nam, rềp ngai sa tềp nàng tơnguh giă priă ờ dipal.