VOV4.K’ho- Mho ngai 06/05, Ủy ƀan Ñân zân càr Dăk Lăk bơyai lơh Pơrjum ƀăo nhai 04 nam 2022, yal bè broă lơh sa- mpồl bơtiàn tàm nhai 04 mờ yal wơl tơngume ală anih lơh broă sră ƀăo đơs, geh mpồl bơtiàn sền gròi.

Anih tờm gròi sền kòp tê jê să càr Dăk Lăk

Gơrềng tus broă lơh lùp khàu, gĭt nền broă lơh tìs tàm broă blơi siñ phẩm xét nghiệm virus Sars KoV-2 bơh Anih tờm gròi sền kòp tê jê să càr Dăk Lăk dê, Đại tá ồng Nguyễn Văn Quy, Kwang ătbồ Cơldŭ dong broă, Kwang àng càr Dăk Lăk pà gĭt, dơ̆ broă do gơrềng tus dơ̆ lơh tìs blơi siñ phẩm xét nghiệm virus Sars KoV-2 bơh Kông ty Kổ phần Kông nghệ Việt Á dê gơbàn tàm jơh gùt lơgar tàm tơngai lài. Tus tŭ do, anih lơh broă kảñ sát lùp khàu, Kwang àng càr Dăk Lăk neh gĭt nền Anih tờm gròi sền kòp tê jê să càr neh blơi rlau 63 rbô ƀộ siñ phẩm xét nghiệm, mờ kờp jơh priă rlau 10 tơmàn đong.

Bơh lùp khàu, lùp sền, tơrgùm să pơ àr, anih lơh broă geh gơnoar neh gĭt nền geh dơ̆ broă geh tềl tơngŏ lơh tìs kơrnoăt boh lam. Gơrềng tus broă pa yal, Lùp sền càr Dăk Lăk kung gam lùp sền tơngume is broă blơi phan bơna măy mok gah lơh sơnơm, siñ phẩm xét nghiệm, vaccine mờ sơnơm rơcăng sơndră kòp Kovid-19 tàm ù tiah càr dê.

Cau mblàng Lơ Mu K’Yến