VOV4.K’ho- Lơh jăt broă rơndăp lơh sèng lời dùl êt nă cau tàm mpồl cau lơh broă sa priă nhai dà lơgar dê, tơnguh uă cồng nha lơh broă bơh ală anih lơh broă cíñ trị dê jăt Kơrnoăt Dà lơgar 6 khoă XII, tus nam 2025, càr Dăk Lăk geh tơrmù rlau 3 rbô 800 nă cau lơh broă sa priă nhai dà lơgar là kông cưk, viên cưk gah sở, ngàñ kâp càr, ală anih lơh broă sră pơ àr broă ờs mờng.

Dăk Lăk geh tơrmù rlau 3 rbô 800 nă cau lơh broă sa priă nhai dà lơgar tàm 04 nam  

Jăt jơnau yal bơh Sở Nội vụ càr Dăk Lăk dê, tàm nam 2021, càr neh tơrmù rlau 10% khà cau lơh broă sa priă nhai dà lơgar, ndrờm mờ pơgăp 1 rbô 500 nă. Bơh tŭ do tus nam 2025, digơlan jơh gùt càr pơn jăt tai tơrmù rlau 3 rbô 800 nă kwang bàng, kông cưk, viên cưk gah sở ngàñ kâp càr mờ ală anih lơh broă sră pơ àr lơh broă ờs mờng. Ồng Bạch Văn Mạnh, Kwang ătbồ Sở Nội vụ càr Dăk Lăk pà gĭt: digơlan geh uă kal ke gơlik geh tŭ tơrmù ngan ngồn, ngan là gơwèt mờ gah lơh sơnơm mờ gah bơto bơtê. Bulah bè hơ̆, càr kung gam kràñ cê jơh nùs sơl lơh broă do jăt di tŭ tơngai rơndăp lơh. Tềng đăp măt, nam 2022 do tơrmù pơgăp 800 nă cau lơh broă sa priă nhai dà lơgar là viên cưk, pơn jăt hơ̆ geh tơrmù pơgăp 1 rbô nă viên cưk pah nam.

Cau mblàng Lơ Mu K’Yến