Ală cau tờm mpồl lơh sa kă bro mblàng, geh bơta do là tài gơmù khà priă geh ai tăc, kă bro gơtìp hoàc huơr mờ khà ai xăng jờu ờ uă. Jăt dơ̆ tus sền mùl màl bơh cau ai tơngit jơnau đơs dê, ngai 31 nhai 1, hơ̆ là ngai 10 nhai 1 nam Quý Mão, mìng jăt gah gùng Hồ Chí Minh gơl gùng lòt gan thị xã Buôn Hồ, neh geh 02 Hìu tăc xăng jờu là “Appollo Oil sồ 08” gơwèt Kông ty TNHH Kă bro Hoàng Nam mờ Hìu tăc xăng jờu “Hồng Quý 1” yồng jơnau yal jơh xăng, jờu.

Jăt gah gùng 29, gơl lòt gan xã Tân Lập, kơnhoàl Krông Búk, geh Hìu tăc xăng jờu Rồng Vàng kung yồng jơnau yal neh jơh xăng jờu mờ ơm ing broă kă bro. Jăt Kụk Atbồ Drà kă bro càr Dăk Lăk yal, mpồl lơh broă do neh git jơnau yal geh ờ uă hìu tăc xăng jờu tàm kơnhoàl Krông Búk mờ thị xã Buôn Hồ neh jơh xăng jờu, yồng jơnau cih ơm ing broă kă bro.