Drim ngai 18/05, Ƀan Tuyên zăo Tỉñ ủy Dăk Lăk bơyai lơh jàu khà jờng cih, mờ yal tơngĭt jơnau cih văn họk, bơta chài niam, sră ƀăo bè tơngume “Bơsram mờ lơh jăt bồ tơngoh, nùs nhơm, broă lơh mờ rài kis Hồ Chí Minh”, dơ̆ I  tơngai bơh nam 2021- 2023. Geh 28 jơnau cih jak ngan lơh geh khà jờng tàm dơ̆ do.

Tơnơ̆ 2 nam lam lơh, Khà jờng bơceh cih, yal tơngĭt jơnau cih văn họk, bơta chài niam, sră ƀăo bè tơngume Bơsram mờ lơh jăt bồ tơngoh, nùs nhơm, broă lơh mờ rài kis Hồ Chí Minh càr Dăk Lăk dơ̆ 01 neh dờp geh mờr 100 jơnau cih mŭt tàm dar pơrlòng dŭt ndơl. Ală jơnau cih geh tam pà jăt 3 bơta: là văn họk (geh yal yau lơyah, jơnau nrĭ, jơnau cih lời kir, jơnau cih sền gŏ ngan ngồn), bơta chài niam (geh lơh lèu- lơh lơma, gùng đơs crih, wăc mòn rùp) mờ sră ƀăo (geh ƀăo lĭp, ƀăo hiñ, ƀăo rùp). Jăt jơnau đơs bơh Mpồl bơyai lơh dê, uă ngan ală jơnau cih tus bal pơrlòng ndrờm geh bơta niam uă, tơngŏ li la, tơngume rơ̆ ru, geh bơta bơto bơtê uă. Mpồl bơyai lơh neh săc rwah mờ jàu khà jờng ai 28 jơnau cih jak ngan rlau jơh in, tàm hơ̆ geh 1 khà A, 5 khà B, 10 khà C mờ 12 khà pơn jờng.