VOV4.K’ho- Di tơngkah Sơn tờm Dà lơgar ngai 02/9, Mpồl cau lơh ƀău càr Dăk Lăk neh bơyai lơh jàu 2 nơm hìu nùs nhơm pà ală hìu bơnhă rƀah tàm kơnhoàl M’Drăk. Jat hơ̆, ală mpồl neh jàu pà hìu ai bi H’Biêr Byă, là mè dùl nă să is ròng kòn tàm ƀòn Aê Lai, xã Krông Jing mờ jàu pà hìu ai hìu bơnhă bi Lê Đức Tường, hìu bơnhă rƀah tàm thôn 3, xã Ea H’Mlay. Tơl hìu ơnàng mờr 80 thơk vuông, priă tă lơh rlau 100 tơlak đông; tàm hơ̆ Kông ty ồs đèng Dăk Lăk dong kờl 50 tơlak đông, khà priă gam wơl bơh Mpồl cau lơh ƀău Dăk Lăk, gơnoar atbồ, mpồl cau tàm ƀòn lơgar mờ hìu bơnhă tă pơgồp.

Tơnơ̆ mờr 4 nhai lơh, ală hìu neh lơh gơs mờ jàu 2 hìu bơnhă in di tàm dơ̆ tơngkah Sơn tờm Dà lơgar ngai 02/9 nam do. Rê ơm tàm hìu pa, bi H’Biêr Byă ngoh rơngac đơs: “Kơnờm geh priă dong kờl bơh mặt trận mờ ală mpồl geh nùs nhơm niam dong kờl den tàng hìu bơnhă añ neh geh hìu niam. Bơh tŭ do hìu bơnhă añ geh lơh ngan lơh broă uă rlau tai nàng geh tai priă jền pah ngai, ai rài is niam rlau”.

Cau mblàng K’Duẩn