VOV4.K’ho - Ngai òr (26/07), Mpồl đơng lam càr Dăk Lăk bè broă jòi rồ, tơrgùm mờ đal git măt sơn đan cau ling chơ̆t màng bơyai lơh pơrjum broă jòi rồ, tơrgùm ƀồc ntìng cau ling chơ̆t màng tus tam lơh mờ cau jăk chài lơgar Việt Nam phi să tàm ală rài tam lơh tàm lơgar Campuchia kàl prang nam 2021-2022.

                    Ală đoàn viên ơruh pơnu chu jrềng bal ñàng tàm ală bơtô ƀồc cau ling chơ̆t màng

Jăt jơnau yal tàm pơrjum, tơnơ̆ mờ rơlao 4 nhai ai mpồl ling tus càr Mondulkiri, lơgar Campuchia, kwang bàng, cau ling tàm mpồl ling K51 neh jòi rồ, tơrgùm geh 15 ƀồc ntìng cau ling chơ̆t màng ờ hềt git đal măt sơnđan, tàm hơ̆ geh 1 phan lời wơl là gai cih kim tinh geh cih jơnau “Ngọc Chút-27-9-66). Tàm tơngai jòi rồ, Mpồl ling K51 neh nền nòn, tă sền rơlĕ di ală phan lời wơl bơh cau ling lơgar Việt Nam dê, mờ ai mẫu siñ phẩm ală ƀồc ntìng cau ling chơ̆t màng jào Sở Lao động-Thương binh mờ Xã hội càr Dăk Lăk in di mờ kơrnoăt neh geh ai. Tơnơ̆ mờ tŭ jào 15 ƀồc ntìng cau ling chơ̆t màng rê, Tỉñ ủy, UɃÑZ càr Dăk Lăk neh bơyai lơh ies, tơ̆p ƀồc ntìng 15 nă cau ling chơ̆t màng tàm ƀlàng tơ̆p ƀồc cau ling chơ̆t màng càr.

Tàm pơrjum, UɃÑZ càr Dăk Lăk kung neh ring bal broă rơndăp lơh, jơnau kờñ, pơn jăt tai lơh geh cồng nha broă jòi rồ, tơrgùm, tơnrê ƀồc ntìng cau ling chơ̆t màng bal mờ cau jăk chài lơgar Việt Nam neh phi să tàm ală rài tam lơh tàm lơgar Campuchia.

Cau mblàng Ndong Brawl