VOV4.K’ho- Mang ngai 30/08, Tỉñ đoàn Dăk Lăk bơyai lơh Dơ̆ tơrgùm să Pơrjum Ngai chờ Añ kờñ gơboh lơgar añ dê mờ Jờng rơ 69 nă cau, mpồl cau pơnrơ jak tàm ală broă lơh đoàn mờ mpồl ơruh pơnu dê. 69 nă cau mờ mpồl cau geh jờng rơ tàm 7 broă lơh, là: Kwang bàng Mpồl ơruh pơnu pơnrơ jak; Ơruh pơnu kis niam; Hìu bơnhă kơnòm să pơnrơ jak; Ơruh pơnu sơnđờm mŭt lơh broă pơnrơ jak; ală Câu lạk ƀộ, ală mpồl pơnrơ jak; ơruh pơnu kuĕt kơlte pơnrơ jak; ơruh pơnu kòn cau, ơruh pơnu dòn Yàng pơnrơ jak.

Dăk Lăk jờng rơ krơh ơruh pơnu kis niam

Do là ală krơh niam geh uă tă pơgồp tàm broă lơh đoàn mờ srơh ơruh pơnu tàm ală tiah, tơngŏ geh gơnoar broă lam lài mờ jơh nùs ngan bơh rơnàng kơnòm să dê tàm ală broă lơh, lơh krơh bè rài kis ơm niam dòn song, lơh krơh tàm đoàn viên, ơruh pơnu. Di tàm dơ̆ do, Mpồl tam klăc ơruh pơnu Việt Nam càr Dăk Lăk neh jàu 2 bơnah priă sơnđờm mŭt lơh broă, kờp priă 40 tơlak đong ai 2 nă ơruh pơnu in tàm kơnhoàl Lăk mờ Krông Năng; jàu khà jờng dơ̆ pơrlòng Mblàng yal jơnau đơs crih kăc màng, ơruh pơnu đơs jơnau pơnđik mờ nhơl đờng gòng kòn cau mờ tơn jơh Ngai chờ Añ kờñ gơboh dà lơgar añ càr Dăk Lăk nam 2022 mờ uă broă lơh geh kwơ ngan, ngan ngồn ngan.

Cau mblàng Lơ Mu K’Yến