Đơs bè broă lơh jăt kơnòl broă nam 2022, ală kwang bàng đơs là, pang rùp lơh sa- mpồl bơtiàn jơh gùt càr Dăk Lăk dê nam do geh uă bơta àng. Bulah bè hơ̆, ai priă bơcri dà lơgar dê dùl êt ir (mìng geh 29,5%), pơn jăt bal mờ hơ̆ là broă lơh jăt tam gơl bơtơl rơndăp broă lơh uă dơ̆, bơta niam ală broă bơ̆t bơtàu ờ hềt geh lơh niam neh lơh gơrềng tus bơta pin dờn bơh làng bol dê kung bè broă bơtàu tơnguh wơl lơh sa tơnơ̆ tơngai gơbàn kòp dờng Kovid-19.

Gơwèt mờ broă lơh broă sa sươn sre, ală kwang bàng Hội đồng Ñân zân càr Dăk Lăk sồr pal geh uă gùng dà broă lơh loh làng nàng kờñ dong kờl cau lơh broă sa bơtàu tơnguh lơh broă sa sươn sre măy mok jak chài pa, lơh geh bơta lơh bal tơn đah mpồl lơh sa kă bro mờ cau lơh broă sa. Bal mờ hơ̆, pal rơndăp ù tiah loh làng, lơh mã sồ tiah tam ai ală bơta chi sa plai in nàng kờñ pleh jơnau tam uă ur ar ir, plai chi lơh uă rlau mờ jơnau kờñ ngui sa. Bal mờ hơ̆, ală kwang bàng kung yal ală broă kal ke bơh càr Dăk Lăk dê, bè bơsong broă lơh ai cau lơh broă in; lơh gùng dà broă lơh, bơta dong kờl ai mpồl kwang bàng tàm kâp xã in; tơnguh uă priă lơh geh, rài kis nàng cau pơgru iang nùs lơh broă.