VOV4.K’ho- Drim ngai 12/10, Ngân hàng dà lơgar Việt Nam tàm càr Dăk Lăk bơyai lơh pơrjum tơrbŏ bal ngân hàng mờ mpồl lơh sa kă bro nàng kờñ sơlơ chồl pràn lam lơh broă lơh dong kờl priă cồng ai càn bơh kes priă dà lơgar gơ wèt mờ ală bơnah priă càn bơh mpồl lơh sa kă bro, hợp tak xã, hìu bơnhă kă bro dê jat Nghị địñ sồ 31 nam 2022 bơh Cíñ phủ dê.

Gùt anih pơrjum

Jat jơnau yal bơh Ngân hàng dà lơgar tàm càr Dăk Lăk dê, bơh 5 nhai lam lơh, ală ngân hàng kă bro neh ai tơlik jơnau sồr tàm dơlam is mpồl; bơyai lơh bơto pơlam jơh gùt anih tus tơl sơnĕ lơh broă, cơldŭ lơh sră càn priă; kờp sền cau gơ wèt ală gah, ală broă lơh geh dong kờl priă cồng ai càn, rơcang lài yal tơnggit, mblàng yal jơnau tus ală cau dùl nă să, mpồl lơh sa kă bro mờ hợp tak xã. Bulah bè hơ̆, cồng nha lam lơh kung ờ hềt lơh geh jat jơnau sồr.

Ồng Trần Ngọc Duy, Kwang atbồ Ngân hàng Thương mại kổ phần bơcri priă bơtàu tơnguh Việt Nnam tàm Dăk Lăk đơs tàm pơrjum

Tus ngai 30/9/2022, khà priă ai càn dong kờl priă cồng jat Nghị địñ sồ 31 tàm càr Dăk Lăk pa rơp geh rlau 50 tơmàn đông, khà priă neh dong kờl priă cồng rlau 13 tơlak đông. Tàm pơrjum, ala mat ală Ngân hàng kă bro mờ mpồl lơh sa kă bro neh tam pà ală kal ke tàm broă git nền bơta geh ngan, cau geh dờp bơnah dong kờl priă cồng, lơh gơbàn broă ờ hềt lơh geh cồng nha bè bơta kơp kờñ.

VOV Tây Nguyên- Cau mblàng K’Duẩn