VOV4.K’ho - Ală ngai do, bŭ lah khà priă xăng, jờu neh gơmù uă, mơya khà priă pơn diang phan tàm càr Dăk Lăk kung gam “bè ờs”. Uă cau tờm mpồl lơh sa kă bro mblàng là, kờñ geh tơngai nàng kơ̆p broă gơguh gơmù khà priă xăng jờu ring niam rơlao hơ̆ sồng lơh jăt broă tơmù khà priă.

Ală mpồl lơh sa kă bro pơn diang phan tàm càr Dăk Lăk ờ hềt tơmù khà priă pơn diang, bŭ lah khà priă xăng jờu tàm tơngai pa do neh gơmù

Hợp ták xã (HTX) pơn diang phan 63 càr, ƀòn dờng càr Dăk Lăk geh di pơgăp 100 nơm rơndeh pơn diang phan ală bơta, lòt ală gơl gùng tus tàm ală càr, ƀòn dờng tàm gùt lơgar. Ồng Đặng Quang Điện, Kwang atbồ HTX yal, tŭ khà priă xăng jờu gơguh bơh 31 tus 32 rơbô đong tàm 1 lit tàm tŭ ală nhai 5, 6 mờ 7 nam 2022, mpồl lơh sa kă bro neh rơcang tơnguh khà priă pơn diang di pơgăp 15% pơn drờm mờ bồ nam. Bŭ lah tơnguh khà priă, mơya mpồl lơh sa kă bro kung gam gơtìp hoàc huơr tŭ lơh broă tàm tơngai do. Broă geh sùm ală rơndeh lòt mìng kờñ gàr cau năc. Bơh lồi nhai 7 nam 2022 tus tŭ do, khà priă xăng jờu gơmù sùm mờ gam tàm khà 26 rơbô 100 đong tàm 1 lit xăng mờ 24 rơbô 300 đơng tàm 1 lit jờu, den mpồl lơh sa kă bro kung gam ờ hềt gơtùi tơmù khà priă pơn diang sơl. Tài mờ khà priă xăng jờu bè tŭ do, mpồl lơh sa kă bro hơ̆ sồng geh bơtơl ing priă tă mờ ờ hềt geh priă cồng. Ồng Đặng Quang Điện mblàng: “Mờ khà priă xăng, jờu bè tŭ do di pơgăp bơh 25 tus 26 rơbô đong tàm 1 lit den gơwèt mờ mpồl lơh sa kă bro mìng rơ̆p bơtơl ing, rơndeh lòt den mìng tơl priă tă tuh xăng, jờu mờ ngai lơh broă cau măi rơndeh, cau tă phan in. Do là khà priă bè ờs mơ, ờ hềt di là gơmù ngan. Di lah khà priă xăng jờu gơmù bơh 22 tus 23 rơbô đong tàm 1 lit mờ geh sùm bơh 2 tus 3 nhai tơnơ̆ den bol añ geh kơlôi tus mờ broă tơmù khà priă pơn diang nàng gàr niam gơnoar kwơ ai cau năc in”.

Khà priă pơn diang kung ờ hềt geh mpồl lơh sa kă bro tàm càr Dăk Lăk tơmù bŭ lah khà priă xăng jờu neh gơmù uă

Gam mpồl lơh sa kă bro pơn diang năc Trần Toàn tàm ƀòn dờng Buôn Ma Thuột den geh 6 nơm rơndeh lòt gơl gùng bơh càr Dăk Lăk tus Hà Nội. Ồng Trần Trung, cau tờm mpồl lơh sa kă bro pà git, tŭ khà priă xăng jờu tàm khà di pơgăp  20 rơbô đong tàm 1 lit, priă tă blơi xăng jờu ai dùl dơ̆ lòt mờ rê bơh càr Dăk Lăk tus Hà Nội jơh di pơgăp bơh 22 tus 23 tơlăk đong. Khà priă vé tàm tŭ hơ̆ là 650 rơbô đong tàm 1 nă cau, phan là 3 tơlăk tàm 1 tấn. Mơya, tŭ khà priă xăng jờu gơguh tam 32 rơbô đong tàm 1 lit, priă tă pah dơ̆ lòt pal roh bơh 35 tus 36 tơlăk đong, hơ̆ là gơguh 1 dơ̆ nggùl den mpồl lơh sa kă bro pal tơnguh khà priă pơn diang tus 800 rơbô đong tàm 1 vé. Khà priă tơnguh do ndrờm bal di pơgăp 15% pơn drờm mờ bồ nam 2022. Tŭ do, khà priă xăng jờu neh gơmù mờ gam tàm khà bơh 25 tus 26 rơbô đong tàm 1 lit, tơl dơ̆ rơndeh lòt kung gam roh di pơgăp bơh 30 tus 32 tơlăk đong, mờ khà priă do mìng rơ̆p tơl priă tă, ờ hềt geh priă cồng nàng gơtùi tơmù khà priă pơn diang ha là khà priă vé. Ồng Trần Trung đơs: “Priă tă lài den bi neh git, tơl dơ̆ rơndeh lòt mờ rê pal roh rơlao 35 tơlăk đong priă jờu, tŭ do neh gơmù den kung mìng geh bơh 2 tus 3 tơlăk đong, kung gam roh bơh 32 tus 33 tơlăk đong. Đơs ngan là khà priă xăng jờu bè tŭ do kung gam kas, bol añ gam kơ̆p kờñ gơmù tai. Di lah gơmù tàm khà 22 rơbô đong tàm 1 lit den mpồl lơh sa kă bro geh tơmù khà priă vé mơ tàm khà 650 rơbô đong tàm 1 vé mờ 3 tơlăk đong tàm 1 tấn phan pơn diang”.

Jăt khà kờp bơh Sở Giao thông Vận tải càr Dăk Lăk pà gŏ, gùt càr tŭ do geh rơlao 17 rơbô nơm rơndeh pơn diang ală bơta. Tàm hơ̆ geh 14 rơbô nơm rơndeh pơn diang phan, 500 nơm rơndeh pơn diang năc lòt ndrờm bal, 250 nơm rơndeh hợp đồng, 350 nơm rơndeh buýt mờ di pơgăp rơlao 2 rơbô 500 nơm rơndeh taxi. Jăt ồng Lê Đình Minh, Phó kwang atbồ Sở Giao thông Vận tải càr Dăk Lăk yal, tài ờ geh kơrnoăt sồr ală mpồl lơh sa kă bro pal lơh di pal khà priă pơn diang tŭ khà priă xăng jờu gơguh uă ha là gơmù, den tàng tŭ geh tam gơl bè khà priă den jơh ală mpồl lơh sa kă bro ndrờm rơcang lài tơnguh ha là tơmù khà priă pơn diang, sở ha là gah lơh broă geh gơnoar kal ke ngan kờñ tus bal mờ broă lơh do. Mơya, tŭ khà priă xăng jờu tơmù uă bè tŭ do, sở neh lơh sră lam sồr ală mpồl lơh sa kă bro tơmù di pal khà priă pơn diang, nàng gàr niam bơta kwơ di pal đah ală gah in. “Bè broă atbồ Dà lơgar, Sở Giao thông Vận tải neh lơh sră nggal lam sồr tus mờ ală mpồl lơh sa kă bro pơn diang, cau tờm rơndeh rơcang tơmù khà priă pơn diang nàng ring niam khà priă, gàr niam phan kă bro geh pơn diang kung bè cau năc geh drơng tàm broă lòt rê mờ khà priă di pal. Bơta do kung pal geh mpồl lơh sa kă bro lơh is, tơmù nàng geh tàm pơrlòng niam mờ gàr cau năc, mờ tŭ khà priă xăng jờu gơmù tai den khà priă pơn diang geh tơmù nàng cau năc in geh tus bal mờ mpồl lơh sa kă bro dê”.

Cau cih Tuấn Long-Cau mblàng Ndong Brawl