VOV4.K’ho - Mờ broă geh dờp di pơgăp 500 nă cau kòp tàm 10 ngai sơnrờp bơh nhai 1 do, kơnhoàl Lăk neh gơs mìng kơnhoàl dùl lơm càr Dăk Lăk dê tàm tŭ do là tiah pơrhê-do là tiah di gơlan gơtìp kòp uă ngan. Tềng đăp mờ bơta kal ke bơh kòp Kovid-19, ală mpồl lơh broă geh gơnoar tàm kơnhoàl Lăk neh mhar wàng se, jòi mờ kơrian ală tiah gơrềng bal, mờ broă lơh ngan tơmù rơhời khà cau gơtìp kòp, tơmù ờ uă ngan broă gơtờp kòp, gàr niam làng bol wă rò satềp ờ do ờ dă.

Gơs cau F1 tŭ geh tìp rềp mờ cau kòp tàm xã Dăk Nuê, lŏ H’ Phil Nêung, kis tàm ƀòn Bàng, xã Dăk Liêng tŭ do gam lơh broă tàm xã Dăk Nuê pà git, lài ngan kung ngòt sơl, tơnơ̆ mờ hơ̆ lŏ hòi điện thoại tus hờ hìu sơnơm xã mờ geh y, bác sĩ lơh broă tàm hìu sơnơm do bơto sồr tàm broă tam cah is tàm hìu kung bè ală broă rơcang sơndră mờ kòp, lŏ neh lơh di jăt mờ să tờm bal mờ ală cau tàm hìu nhă in.

                   Kơnhoàl Lăk gam tơnguh cit bơtơl sơnơm vaccine rơcang sơndră mờ kòp Kovid-19 

Kơnờm mờ hơ̆, den tàng jơh ală cau tàm hìu neh ờ do ờ dă mờ sơrlèt mờ bơta kal ke lài ngan. Lŏ H’ Phil pà git tai, tơnơ̆ mờ dơ̆ mờng gơtìp gơs cau kòp, lŏ mờ ală cau tàm hìu nhă neh wă loh rơlao bè bơta ngòt rơngơ̆t bơh kòp gơtờp mờ kung git loh rơlao bè ală kơrnoăt tàm broă rơcang sơndră mờ kòp. “Tŭ git să tờm neh tìp mờ cau F0 bè hơ̆ den kung ờ sŭk ngan sơl, mơya geh blơi phan cèng rê lơh mơ, hồl să 1 ngai 2 dơ̆ tŭ drim mờ mho, hơ̆ sồng tỏi den he trŭ dà duh nàng rơhồp nhơm. Añ lơh jăt bè hơ̆ geh cồng nha, añ gŏ ală cau tàm hìu ndrờm niam ờ do ờ dă”.

Xã Dăk Nuê tŭ do gam là dùl tàm 2 tiah gơtìp kòp geh uă cau kòp tàm kơnhoàl Lăk dê. Dược sĩ Đặng Thị Mỹ Hạnh, Phó kwang atbồ hìu sơnơm xã Dăk Nuê pà git: bơh ngai 17 nhai 12 nam lài tus tŭ do bơta kòp tàm xã gơtìp kal ke ngan mờ uă tiah gơtìp kòp tàm mpồl bơtiàn, pal kah ngan là tiah kòp tàm ƀòn Pai Bi mờ 80 nă cau F0. Mờ tiah gơtìp kòp do, xã neh pal kơrian jơh gùt ƀòn mờ lơh jăt broă jòi cau tus jơh tàm gùt xã. Geh ală cau ờ bài lơh broă bal, Hìu sơnơm xã pal ai cau tus tàm suơn tàm mìr nàng xét nghiệm mờ lam sồr làng bol in. Lŏ Hạnh đơs là, broă ờ pơgồp bal bơh làng bol là bơta tờm di gơlan lơh gơtờp uă kòp tàm xã do: “Tàm do añ tìp kal ke ngan là tài bơhiàn bơh tàm tiah do dê, làng bol he geh bơhiàn ñô sa den ñô tơrgùm bal 1 nơm bồp, dơ̆ bàr tai là kis tơrgùm bal gal cau là uă ngan, lam sồr kung uă mơya tam gơl bơhiàn là jơh dùl broă lơh gơtìp kal ke ngan. Dơ̆ bàr là tŭ neh git cau F0 den cau ờ lòt, làng bol đơs là añ ờ gŏ kòp lơi, añ gam pràn, cau ờ bài lòt, Mpồl đơng lam geh bal Ƀí thư, Củ tịc tus tàm hìu lam sồr nàng làng bol lòt”.

                                     Cau lơh sơnơm tus xét nghiệm ală cau geh tơngŏ mờ kòp

Jăt ồng Nguyễn Thanh Hưng, Ƀí thư đảng ủy xã Dăk Nuê, kơnhoàl Lăk yal, tus tŭ do xã neh gŏ geh rơlao 250 nă cau F0. Kờp dŭ broă di gơlan gơtờp kòp gam uă di lah gơnoar atbồ xã ờ lơh pràn ală broă rơcang sơndră mờ kòp gơtờp, den tàng tơnơ̆ mờ tŭ pơn jăt tơn geh gŏ ală tiah gơtìp kòp tàm tơngai pa do, Mpồl đơng lam rơcang sơndră mờ kòp xã neh pơrjum mờ nền nòn sền wơl tài bè lơi gơtìp mờ ai geh ală broă rơcang sơndră mờ kòp di pal nàng gờñ kơrian kòp gơtờp. “Bol añ sùm bơyai lơh jăt ai mpồl đơng lam ală ƀòn in pơn jăt tai lam sồr làng bol, tàm hơ̆ uă ngan tàm dơ̆ satềp tus do pal lơh jăt niam 5K. Bơh broă rơcang sơndră mờ kòp tàm xã den bol añ gŏ broă lam sồr 5K là broă kuơ màng ngan, tàm hơ̆ uă ngan là chèo, den tàng bol añ tơnguh broă lam sồr làng bol sùm pal pơn cheo mờ gàr bơta ơm ngài, bañ tơrgùm gal cau nàng pleh mờ broă di gơlan gơtờp kòp. Tàm satềp pal lơh ngan sền gròi nàng git bơta kòp tàm xã nàng lơh bè lơi jơnau git wă làng bol rơhời geh mŭt tàm rài kis mờ broă pơn chèo nàng rơcang sơndră mờ kòp gơtờp”.

Ồng Phạm Phú Anh, Phó kwang atbồ hìu sơnơm kơnhoàl Lăk pà git, tềng đăp mờ bơta kal ke bơh kòp gơtờp, kơnhoàl neh ai geh ală broă lơh bè chồl pràn broă lam sồr nàng làng bol lơh jăt niam broă 5K, chồl pràn broă cit sơnơm vaccine, gàr niam jơh nhai 1 gùt kơnhoàl geh rơlao 90% khà cau rơlao 18 sơnam geh cit tơl 2 ding sơnơm vaccine mờ bal mờ hơ̆ geh cit bơtơl ding dơ̆ 3 ai ală cau di gơlan gơtờp uă in, mờ cit sơnơm vaccine ai kơnờm bơsram bơh 12 tus 17 sơnam in. Kơnhoàl kung crơng gơs tiah nàng sơm kòp cau F0 tàm hìu sơnơm kơnhoàl lài do mờ bơta pràn 50 nơm jơnờng piam kòp nàng sơm kòp cau ờ geh tơngŏ mờ kòp bal mờ cau geh tơngŏ ờ jroă. Mơya, tŭ do tàm tiah do ờ hềt geh lơh broă mờ gam là tiah kơ̆p bơh ală cau F0 dê nàng jun tus ală hìu sơnơm sơm kòp Kovid-19. Broă wàng se tàm ală tiah di gơlan gơtờp uă kung geh xã tơrgùm bơyai lơh uă. “Lài ngan lơh wơl ală broă rơcang sơndră mờ kòp gơtờp bơh gùt kơnhoàl tàm tơngu me jơh ală gah lơh broă tus bal tàm broă do, bơh mpồl đơng lam kơnhoàl tus mờ xã bal mờ ală ƀòn, mờ tàm xã neh crơng gơs ală hìu sơnơm ntờn. Bè phan bơna neh geh rơcang tơl, hìu sơnơm lơi kung geh khàr oxy, geh măi Sensor nàng was bơta ndrờm bal oxy tàm mhàm, ding was bơta duh, hơ̆ sồng bè sơnơm kung neh geh prăp gàr kung geh bơsaram tàp lơh sơnơm ai ală mpồl sền gàr mpồl bơtìan in hơ̆ sồng bơsram tàp ai ală cau tàm ƀòn in, geh bal broă bơaram tàp ai broă xét nghiệm tàm mpồl bơtiàn nàng geh gŏ ală cau F0”.

Tus is lơh pràn ală anih lơh broă geh gơnoar bal mờ gơnoar atbồ tàm kơnhoàl Lăk neh cèng wơl ală bơta tơngŏ niam tŭ ală ngai pa do, khà cau gơtìp kòp pa neh gơmù uă ngan. Do là bơta tơngŏ chờ ngan nàng kơnhoàl Lăk gờñ tam gơl dà sơng bè bơta pràn gơtờp kòp gơmù gam dà rơmit mờ wèt tus gơs tiah tơlir.

Cau cih Nam Trang- Cau mblàng Ndong Brawl