VOV4.K’ho- Bal mờ kơnòm bơsram tàm jơh gùt càr Dăk Lăk dê, ngai do 29/08, rlau 15 rbô 200 nă kơnòm bơsram bơh kơnhoàl tiah nhàr lơgar Buôn Đôn geh ngan ngồn lòt bơsram mŭt tàm nam bơsram pa 2022- 2023. Tơngai do, ală hìu bơsram gam jơh nùs rơcăng lài wil tơl ală bơta bè phan bơna, mpồl cau pơgru, lơh geh nùs nhơm chờ hờp chờ hờñ ngan rơcăng wă rò ngai sơnđờm mŭt nam bơsram pa.

Nam bơsram pa nam do, Hìu bơsram Mầm non Họa Mi, xã Krông Na, kơnhoàl Buôn Đôn geh 12 ơdŭ bal mờ 360 nă kơnòm bơsram, bơsram tàm dùl anih bơsram tờm mờ 2 anih bơsram dềt ndai. Ală ngai do, ală ùr pơgru bơh hìu bơsram dê gam jơh nùs ngan pơs wàs, rơndăp tăp sèng, bơka ƀlàng hìu bơsram, cơldŭ bơsram, lơh geh ù tiah tơlir, sàng goh, niam rơcăng wă rò kơnòm lòt bơsram. Ùr pơgru Lê Thị Chúc, Phó Kwang ătbồ Hìu bơsram, pà gĭt: Hìu bơsram neh lam lơh broă pơs wàs, rơndăp tăp sèng tàm jơh ală anih hìu bơsram sàng goh ngan. Bè phan bơna, hìu bơsram neh cribơyai mờ ală kâp tàm tiah do neh dong kờl. Jơh ală cau pơgru neh geh jàu ơdŭ, ală ùr pơgru neh rê hờ ơdŭ rơcăng bơka cơldŭ nàng ngai do 29/08 wă rò ală oh lòt bơsram.

Pơgru mầm non jùt ràu phan nhơl ai kơnòm bơsram in lài mờ tŭ mŭt tàm nam bơsram pa

Bal mờ rơcăng lài bè phan bơna, bơcri priă blơi măy mok phan ngui bơto bơtê, ală hìu bơsram gam sền gròi uă ngan tus broă lơh bơto tai bơta gĭt wă ờs mờng tàm broă lơh ai cau pơgru in. Tài bơh kơnhoàl Buôn Đôn ờ mìng kal ke lơm tài bơh tiah nhàr lơgar mờ gam geh tus 50% khà kơnòm bơsram bơh kơnhoàl dê là kòn hìu bơnhă làng bol kòn cau dùl êt nă cau dê. Ngan tài bơh bơta mùl gŏ is bè jơi bơtiàn, dà đơs den tàng gơ sồr cau pơgru pal geh bơta kơ̆ nùs, kong ơ̆t, ngac ngar rơcăng lài tàm tŭ bơto kơnòm, ngan là tŭ lam lơh jăt broă lơh bơto bơtê bal pa tàm ală ơdŭ 1, 2 mờ 3. Ồng Hồ Sĩ Lâm, Kwang ătbồ Hìu bơsram Kâp dùl Y Jút, xã Krông Na, kơnhoàl Buôn Đôn là tiah geh tus 80% kơnòm bơsram là kòn bơh jơi bơtiàn kòn cau dùl êt nă cau dê, đơs bè do: Mŭt tàm nam bơsram pa, hìu bơsram kơlôi sơnơng broă geh ngan, ngan là gơwèt mờ ală ơdŭ 1, ơdŭ 2, hìu bơsram jàu ai ală pơgru in gĭt wă geh uă dà đơs nàng mŭt bơto ală ơdŭ, ngan là ơdŭ 1. Tàm ală tŭ kơnòm bơsram lòt bơsram ờ hềt gĭt wă uă bè dà yoan den jăt tàm bơta kơnòm bơsram hơ̆ là cau kòn cau lơi den pơgru geh đơs mờ dà hơ̆ mờ mblàng lơh loh ai kơnòm bơsram in gĭt wă ƀươn ƀoài rlau.

Pơgru Hìu bơsram kâp dùl Y Jút, kơnhoàl Buôn Đôn pơs wàs sàng goh cơldŭ bơsram nàng wă rò kơnòm bơsram tàm nam bơsram pa

Jăt ồng Đỗ Ngọc Anh, Kwang ătbồ Phòng Giáo zụk mờ Đào tạo kơnhoàl Buôn Đôn dê yal, tus tơngai do, ală hìu bơsram sền bal lơh jăt niam jơnau sồr bè phan bơna phan ngui măy mok, mpồl cau pơgru. Jơh gùt kơnhoàl tŭ do geh 34 hìu bơsram, bơh kâp mầm non tus kâp pe mờ bơto bơtê sùm. Nam bơsram 2022- 2023, ală hìu bơsram geh rlau 15 rbô 200 nă kơnòm bơsram, 50% khà kơnòm bơsram là oh kòn bơh jơi bơtiàn kòn cau dùl êt nă cau dê. Tàm hơ̆, mìng là kòn cau M’nông, Rơđê mờ Jrai lơm...Rài kis làng bol dê gam tìp uă ngan kal ke. Den tàng bè hơ̆, nàng ală oh lòt bơsram wil tơl, Phòng Giáo zụk mờ Đào tạo neh sồr ală hìu bơsram sền gròi lùp nàng gĭt, hòi jà, dong kờl ală oh, ờ lời oh lơi tài bơh rài kis kal ke mờ pal sơrbì bơsram. Ồng Đỗ Ngọc Anh, pà gĭt: Phòng Giáo zụk sồr ală hìu bơsram geh broă rơndăp lơh pơgồp bal mờ gơnoar ătbồ tàm tiah hơ̆ là thôn, ƀòn nàng tus mờ mè bèp kơnòm bơsram, tus tơl hìu nàng mblàng yal, hòi jà ai ală oh in lòt bơsram wơl.

Bulah gam uă kal ke, mơya mờ bơta rơcăng lài wil tơl, gĭt nđờ jơ̆t rbô nă kơnòm bơsram mờ cau pơgru tàm kơnhoàl tiah nhàr lơgar Buôn Đôn, càr Dăk Lăk neh rơcăng lài ai nam bơsram pa in bal mờ cồng nha niam ngan rlau jơh.

Cau cih Vũ Hương Lý- Cau mblàng Lơ Mu K’Yến