VOV4.K’ho- Drim ngai 08/4, Phòng Giáo zụk mờ Đào tạo thị xã Buôn Hồ, càr Dăk Lăk pà git, tàm do pa gơlik geh broă dùl nă kơnòm bơsram ơdŭ 8 cih sră lời wơl hơ̆ sồng yồng ngko gơ sơt is să. Kơnòm bơsram gơ sơt is să là oh B.Đ.K ơdŭ 8A2, hìu bơsram kâp 2 Ngô Mây. Hìu bơnhă jòi bàn dùl pang sră cih lời wơl bơh oh K dê geh tơngume ai gŏ rài kis gơ lơh kơn jơ̆ ir.

Lài hơ̆, jat jơnau yal bơh Hìu bơsram kâp 2 Ngô mây dê, drim ngai 06/4, ơdŭ 8A2 ờ geh tơngai bơsram online. Tŭ do, oh K geh nhơl điện tử mờ gơtìp mè lah. Tơnơ̆ tŭ tơl nă cau tàm hìu lòt tàm suơn pik tiêu tus mờr 9 jơ ờ gŏ K lik den tàng mut jòi den gŏ K neh yổng ngko gơ sơt is să tàm hìu ƀềp. Tơnơ̆ tŭ git gŏ, cau tờm hìu bơnhă neh nggà hòi, jun K lòt kâp kứu mơya oh neh ờ gam kis tai. Tơnơ̆ tŭ gơlik geh broă do, kwang àng thị xã Buôn Hồ kung neh tus đal git. Jat jơnau đơs bơh Hìu bơsram kâp 2 Ngô Mây dê, K là kơnòm bơsram geh bơta git wă uă tàm broă bơsram mờ pơlam tàp, tryăng tryồng, gơ lòng sồr. Họk kỳ 1 nam bơsram 2021 – 2022, K geh sap sèng kơnòm bơsram jak, geh hạñ kiểm niam. K ờ gam bèp, tŭ do gam kis mờ mè.

Cau mblàng K’Duẩn