Ngai 20/3, Kwang atbồ Anih cah rơña làng bol dờng ngan rlau jơh dà lơgar ồng Nguyễn Hòa Bình mờ Kwang atbồ Viện Kiểm sát làng bol dờng ngan rlau jơh dà lơgar ồng Lê Minh Trí hơ jơnau lùp tàm pơrjum dơ̆ 21 bơh Ủy ƀan Thường vụ Quôk hội khoă 15 dê. Dơ̆ lùp mờ hơ jơnau lùp geh tơrbŏ sơñio rùp tơn mờ 62 Mpồl kwang bàng Quôk hội gơ wèt ală càr, ƀòn dờng gơ wèt dà lơgar.

Tus bal dơ̆ lùp mờ hơ jơnau lùp tàm anih pờ tơlik tơn tàm Dăk Lăk, mò Nguyễn Thị Thu Nguyệt, Mpồl kwang bàng Quôk hội càr Dăk Lăk pà git: Tàm dơ̆ lùp mờ hơ jơnau lùp, mpồl kwang bàng Quôk hội càr Dăk Lăk neh sồr lơh loh ală broă lơh nàng kờñ bơsong bơta geh broă Anih cah rơña làng bol ală kâp cah rơña ờ di tìs gơ wèt mờ broă lơh tìs; ngui ờ di sèng, bơnah bơh bơta adat boh lam dê; ngui ờ tơl cơng tàng nàng lơh nền khà lơh glài, tơnguh bơta kơn jơ̆ kơnòl hìñ sự lơh gơbàn bơta tơlik kơrnuat lơh glài mờ khà lơh glài lơyah rlau khà lơh glài geh cih tàm adat boh lam halà nggờc ir; broă lơh nàng bơsong bơta ờ niam tàm broă rơndap kwang bàng mờ broă lơh bơh anih cah rơña dê tŭ do kung bè ală bơsong ală kal ke, kòl yan tàm broă tơrgùm ală sră nggal, cơng tàng bơh ală broă lơh tìs hàñ cíñ dê…

Đơs bè bơnah hơ jơnau lùp bơh 2 nă kwang đơng lam bồ Anih cah rơña dờng ngan rlau jơh dà lơgar mờ Viện Kiểm sát dờng ngan rlau jơh dà lơgar dê, mò Nguyễn Thị Thu Nguyệt đơs là, 2 nă kwang đơng lam bồ 2 gah do neh hơ jơnau lùp dùl bă song dơpă mờ geh kơnòl.