Mờ tơngume “Cau Việt Nam lòt nhơl Việt Nam - Việt Nam añ kờñ”, tàm tơngai lòt nhơl kàl rlô bơkang nam do, gah lòt nhơl càr Dăk Lăk sơlơ tơnguh tai mblàng yal jơnau, yal tơnggit rùp hin “Dăk Lăk – Anih tus lơngăp lơngai, đềt mềr, bềng lìu bơta niam chài Tây Nguyên” tus mờ nac lòt nhơl. Ngui ală pang mạng xã hội, ală dơ̆ lơh drà ràng tơlik bè lòt nhơl nàng sơlơ tơnguh tai drà nac lòt nhơl geh bơta pràn. Càr kung tơrgùm lam lơh uă broă lơh niam chài, lơh chờ kâp càr mờ jat tơngai pơrgon bè: broă lơh dròng cing jañ mồng Mpong ntas ù tiah kơh bơnơm; dơ̆ lơh chờ sầu riêng Krông Păk dơ̆ 2. Bơyai lơh ală dơ̆ pơrlòng tàp pràn să jan gùt lơgar dunia; lơh ală phan lòt nhơl tiơng pơn rơ krơi is, lòt sền git niam chài phan lời wơl, lòt nhơl mpồl bơtiàn, lòt nhơl ƀòn niam chài brê bơnơm, ală phan lòt nhơl tơlir, tour lòt sền lòt nhơl lơh sa suơn sre, sền suơn kơphe, sầu riêng, mắc ca, chi sa plai mờ sền git phan sa tàm do.