Ngai bồ nhai 9, tàm hìu tac phan bơh ồng Nguyễn Quốc Lập dê ơm rềp gùng càr 1. Thôn 5, xã Ea Wer, kơnhoàl Buôn Đôn, càr Dăk Lăk, kwang àng xã lòt sền jat tơngai pơrgon phan bơna rơcang lài kơryan mờ crùh ồs sa. Ồng Lập pà git, tơnơ̆ tŭ geh mblàng yal, pơlam, rlau 1 nam lài neh tus bal is Mpồl ală hìu bơnhă lơngăp lơngai rơcang lài kơryan mờ crùh ồs sa. Hìu tac phan ồng dê geh crăp phan lơngăp lơngai rơcang lài kơryan ồs sa bơrtoh geh: ƀình crùh ồs sa, mut. Mìng is, tiang liang yal ồs sa neh tàm tơrbŏ bal đah ală hìu bơnhă. Ồng Lập yal bè jơnau pal jat broă lơh mpồl ală hìu bơnhă lơngăp lơngai rơcang lài kơryan mờ crùh ồs sa tàm hìu tac phan hìu bơnhă dê: “Tàm mpồl do geh 10 hìu bơnhă ndrờm geh rơcang lài phan yal ồs sa mờ tàm bơrkuăt bal mờ gơp. Tŭ gơlik geh ồs sa mờ tơlềt tiang liang yal ồs sa, jơh 10 hìu bơnhă rơp klo tiang liang yal ồs sa rơnggô, hơ̆ sồng đal git anih ồs sa tềng lơi den tơl nă cau rơp tơrgùm wơl nàng lam lơh broă lơh crùh ồs sa”.

Mpồl ală hìu bơnhă lơngăp lơngai rơcang lài kơryan mờ crùh ồs sa geh lơh tàm xã Ea Wer geh ală hìu bơnhă tac phan, phơng sih, sơnơm sền gàr phan tam, hìu lơh niam wơl rơndeh măi… ơm rềp bal. Bi Trần Văn Nam, cau tàm mpồl ală hìu bơnhă geh hìu lơh niam wơl rơndeh măi pà git, ală hìu bơnhă ndrờm tus bal jat bơta kờñ is. Broă do nàng kờñ hòi jà tơl nă cau pơgồp bal mờ geh sền bè ală tê tơrbŏ jòng bơh mpồl rơcang lài kơryan mờ crùh ồs sa mờ dong kờl rềs àr dê. Jat bi Nam yal, broă lơh dong ală cau tàm mpồl geh jơnau git wă, bơta chài mờ geh tơn phan bơna nàng rơcang lài kơryan mờ crùh ồs sa tàm tơngai ồs sa sơn đờm gơlik geh: “Bol hi geh mblàng yal wil tơl bè rơcang lài kơryan, crùh ồs sa mờ dong kờl rềs àr tàm tiah gơlik geh ồs sa tơn. Bơdìh hơ̆ tai, gam crăp tiang liang tơngkah lài, ƀìñ crùh ồs sa, dà, bràs… ală phan ƀuơn ồs sa bơrtoh den pal lời is, tŭ lik bơdìh halà ờ pờ hìu lơh niam rơndeh măi den gơ sơt đèng nàng gàr niam lơngăp lơngai rơcang lài kơryan ồs sa”.

Bơh ală broă lơh lam lơh lài geh lơh tàm kơnhoàl Buôn Đôn mờ ală kơnhoàl, ƀòn drà dềt, ƀòn dờng, tus tŭ do, càr Dăk Lăk neh lơh geh 303 “Mpồl ală hìu bơnhă lơngăp lơngai rơcang lài kơryan mờ crùh ồs sa”, 71 “Anih crùh ồs sa bal” mờ 17 “Broă lơh srơh jơh gùt làng bol rơcang lài kơryan mờ crùh ồs sa tàm hìu lơh broă ală anih lơh broă, mpồl lơh broă mờ ƀòn làng bol ơm kis”.

Trung tá ồng Phùng Việt Đức, Phó Kwang atbồ Cơldŭ lơh broă Kảñ sát rơcang lài kơryan mờ crùh ồs sa mờ dong kờl rềs àr Kwang àng càr Dăk Lăk pà git, bơh ală broă lơh, mpồl lơh broă geh gơnoar sùm bơyai lơh pơlam tàp ală broă rơndap lơh rơcang lài kơryan mờ crùh ồs sa digơlan gơlik geh ngan ngồn nàng ală cau tàm mpồl in tus bal. Bơh hơ̆ ală cau tus bal rơp geh pơlam tàp sùm, tơnguh bơta chài rơcang lài drơng tŭ gơlik geh ồs sa, bơrtoh. Trung tá ồng Phùng Việt Đức pà git: “Tơngai tus, bol hi kơp kờñ là, làng bol pơn jat tai ring bal, tus bal lơh tai uă broă lơh “Mpồl ală hìu bơnhă lơngăp lơngai rơcang lài kơryan mờ crùh ồs sa”. Jơnau đơs bol hi dê là broă lơh rơcang lài kơryan mờ crùh ồs sa là bơh làng bol dê, mpồl lơh broă, phan bơna dong kờl ndrờm neh geh tàm làng bol. Lơh bè lơi tŭ gơlik geh ồs sa, tơl nă làng bol là dùl nă cau ling rơcang lài kơryan mờ crùh ồs sa, nàng ờ lời ồs sa gơ rề, ồs sa dờng gơmù ƀà hoàc huơr bè kòn bơnus mờ phan bơna”.

Broă lam lơh uă ală broă lơh “Mpồl ală hìu bơnhă lơngăp lơngai rơcang lài kơryan mờ crùh ồs sa” mờ “Anih crùh ồs sa bal” tàm càr Dăk Lăk là broă lơh ngan ngồn, pơgồp bơnah sơlơ tơnguh tai srơh jơh gùt làng bol tus bal rơcang lài kơryan mờ crùh ồs sa jat jơnau sồr lơh bơh Ƀộ Kwang àng dê, ngan là tàm tŭ tơngai bơta ồs sa, bơrtoh gơlik geh kal ke, ờ gơtùi git lài. Bơh hơ̆, tơrmù ƀà hoàc huơr bè kòn bơnus mờ phan bơna tài ồs sa lơh gơbàn.