VOV4.K’ho- Bal mờ tam gơl bồ tơngoh kơlôi sơnơng tàm broă lơh sa suơn sre, uă cau lơh broă sa, hợp tak xã, mpồl lơh sa kă bro tàm càr Dăk Lăk neh mờ gam lơh jăt broă lơh ală anih lơh bal tàm broă lơh sa. Ală anih lơh bal do neh dong cau lơh broă sa iang nùs lơh gơlik phan bơna. Hợp tak xã khin cha rề ơnàng broă lơh. Mpồl lơh sa kă bro geh anih lơh gơlik phan sùm tăc tàm drà kă bro. Lơh bal đah tam phan- lơh gơlik phan mờ tăc bro phan lơh geh gam pà gŏ cồng nha tàm broă tơnguh uă bơta kwơ phan lơh geh bơh sươn sre, kơlôi tus rài lơh sa sươn sre kơ̆ kơl jăp tàm càr.

Ală nam rềp ndo, phan bơna “Phe sàng goh Thăng Bình HTB” bơh Hợp tak xã drơng broă tơrgùm bal Lơh broă sa sươn sre Thăng Bình tàm xã Cư Kty, kơnhoàl Krông Bông geh cau ngui sa đơs niam ngan. Nam 2020, phan bơna “Phe sàng goh Thăng Bình HTB” lơh geh sră cơng tàng tơl jơnau sồr phan bơna OCOP 4 sơrmañ kâp càr. Kwơmàng tàm bồ nam 2022, hợp tak xã neh kĭ sră tăc phe sàng goh tus lơgar New Zealand mờ phe bơh sơnrờp geh tăc tàm lơgar do là 6 tấn. Tŭ do, măt kă bro Phe sàng goh Thăng Bình HTB kung neh lơh geh 26 anih tăc phan tàm 12 càr mờ ƀòn dờng tàm gùt lơgar. Ồng Võ Văn Sơn, Kwang ătbồ Hợp tak xã drơng broă tơrgùm bal Lơh broă sa sươn sre Thăng Bình pà gĭt: Lài do, lơh bal nàng tă bơsong ală kal ke tàm tŭ lơh sa, mơya tơnơ̆ tŭ tă bơsong ală kal ke tàm broă lơh sa, cau lơh broă sa kờñ tai tă bơsong tai ală kal ke tàm broă tăc bro phan bơna den hơ̆ là marketing phan bơna. Cau lơh broă sa lài do mìng gĭt tam phan lơm mơya tŭ do kờñ ai phan bơna tăc tàm drà den pal lơh marketing, lơh broă yal tơngĭt phan den hơ̆ là ală broă mờ hợp tak xã dong kờl ca lơh broă sa nàng rơhời ai phan bơna tăc tàm drà dờng.

Mpồl lơh sa kă bro bơto pơlam cau lơh broă sa tam plai gơ àl tàm kơnhoàl Ea Kar broă ơn tàm kơldung nàng prăp gàr phan lơh geh bơh sươn sre niam rlau

 Broă lơh pràn lơh bal tàm broă tam phan mờ tăc bro phan bơna lơh gơlik geh ală anih lơh gơlik phan sa ờdo ờdă là kờñ ngan gơwèt mờ mpồl lơh sa kă bro. Tàm kông ty kổ phần Damaca Nguyên Phương, xã Phú Lộc, kơnhoàl Krông Năng, tŭ mŭt bal tàm ală anih lơh bal, kông ty hơ: cau lơh broă sa geh blơi phan bơna mờ giă niam sùm, ờdo ờdă, ờ huan rềs àr gơ aniai; geh mpồl lơh sa kă bro bơcri sơntìl, phơng sih sơnơm sền gàr phan tam nàng iang nùs tam phan. Mờ mpồl lơh sa kă bro kung rơcăng lài geh anih lơh gơlik phan bơna, bơta niam geh ătbồ. Mò Nguyễn Thị Thu Phương, Kwang ătbồ Kông ty Kổ phần Damaca Nguyên Phương pà gĭt: Tŭ do, làng bol lơh broă sa mìng tam phan jăt bơta tơl pràn mờ khi lơh geh. Dùl nă làng bol lơh broă sa lơh is lơh ờ gơtùi dùl ròt bal gơ ai phan bơna geh bơta niam ndrờm gơ̆p ờ. Den tàng bè hơ̆, mpồl lơh sa kă bro pal mŭt lơh bal mờ khi nàng lơh gơlik geh phan bơna niam ngan rlau jơh, bè: tơnhàu di tơngai kàl, di tơngai gơ ai cồng nha niam ngan rlau jơh. Kung bè sền gàr tờm phan tam bè lơi nàng gơ in niam den ờ mìng geh cau lơh broă sa khi lơh bơta do mờ să tờm ală mpồl lơh sa kă bro kung bè anih lơh broă geh gơnoar, gơnoar ătbồ kờñ pal dong kờl cau lơh broă sa den hơ̆ sồng cèng wơl geh cồng nha.

Bulah bè hơ̆, mùl màl pà gŏ: Tàm càr Dăk Lăk ală anih lơh bal tàm broă lơh gơlik phan lơh geh bơh sươn sre gam dùl êt, broă lơh ờ hềt dờng; bơcri priă ai măy mok lơh gơlik phan in kung gam ờ hềt uă sơl den tàng ờ hềt tơnguh uă geh bơta kwơ phan lơh geh bơh sươn sre bơh ală anih lơh bal. Bơta ndai, bàr pe mpồl lơh sa kă bro, hợp tak xã ờ hềt jòi bàn geh drà tăc kơ̆ kơl jăp den tàng kal ke pờ ơnàng ală anih lơh bal...Mùl màl, bè bơta phan  ka kau, càr Dăk Lăk geh tiah tam tờm ka kau gơguh tus 1 rbô 200 lồ, mơya pràn jak lơh bal tŭ do rơ̆p mìng ơm wơl tàm khà dùl êt ngan hơ̆ là pơgăp 200 hìu lơh bal bơh ală hợp tak xã, mpồl lơh broă bal dềt rah rài. Bơta do neh bơnah lơi tơrmù anih lơh gơlik phan geh bơta niam tŭ ai tăc tàm drà. Ồng Trương Ngọc Quang, Kwang ătbồ Kông ty Trác ñiệm Hữu hạn Ka Kau Nam Trường Sơn, đơs là: Rề ơnàng tiah tam phan tŭ do tàm Dăk Lăk di pơgăp 1rbô 200 lồ den kờñ pal geh broă lơh tơrgùm rlau nàng bơtàu tơnguh li la rlau. Bơh hơ̆, dong kờl ai làng bol lơh broă sa in halà ală hợp tak xã in dùl bă pràn kơldang rlau nàng khi in gĭt geh là, broă lơh bal là dùl tàm ală jơnau kờñ jal mhar mờ kwơmàng ngan mờ kờñ ngan tàm broă lơh ală anih lơh gơlik bơta kwơ nàng wèt tus lơh sa dùl bă kơ̆ kơl jăp jŏ jòng.

Hợp tak xã tàm tơrbŏ blơi phan bơna bơh cau lơh broă sa dê mờ jòi drà tăc ai phan bơna in

Jăt ồng Nguyễn Hoài Dương, Kwang ătbồ Sở Nông nghiệp mờ Phát triển Nông thôn càr Dăk Lăk đơs, tàm bơta tŭ do, lơh gơs ală anih lơh bal là broă lơh kwơmàng nàng gàr geh drà tăc phan ƀươn ƀoài ai phan bơna lơh geh bơh sươn sre in. Nàng dong kờl bơtàu tơnguh ală anih lơh bal, Dăk Lăk neh mờ gam jơh nùs lam lơh jăt ală Kơrnoăt bơh Cíñ phủ dê bè broă dong kờl hòi jà bơtàu tơnguh hợp tak xã, lơh bal tàm broă tam phan mờ tăc bro phan bơna lơh geh bơh sươn sre. Tàm hơ̆, tơrgùm dong tơnguh uă ală broă lơh dong kờl tơnơ̆ tŭ bơcri priă lơh, bè: lơh niam dùl êt bơh sơnrờp, lơh gơlik phan, lơh măt kă bro mờ jòi gĭt anih tờm lơh gơlik phan lơh geh bơh sươn sre. Ồng Nguyễn Hoài Dương, Kwang ătbồ Sở Nông nghiệp mờ Phát triển Nông thôn, đơs: Mblàng yal, dong kờl, ai tơl bơta uă ngan rlau jơh ai ală tiah, ală ƀòn lơgar tàm càr in. Kwơmàng là ală tiah geh uă bơta pràn bè ală phan bơkah pơnrơ is den ală broă tàm tơrbŏ tăc bro phan bơna là broă kwơmàng ngan rlau jơh tàm broă lơh gơs ală anih lơh gơlik bơta kwơ phan bơna in. Gĭt nền broă do, sở neh yal mờ Ủy ƀan Ñân zân càr in dan kĭ ring bal rơndăp broă lơh dong kờl phan bơna, bơh hơ̆ tàm tơrbŏ mờ ală tiah, ală ƀòn lơgar tàm jơh gùt lơgar nàng tăc bro phan bơna tàm tơngai tus.

Dăk Lăk tŭ do geh rlau 380 hợp tak xã lơh broă sa sươn sre mờ rlau 90 mpồl lơh sa kă bro tăc blơi phan mờ lơgar ndai. Phan bơna kă bro phan lơh geh bơh sươn sre bơh càr dê neh geh tăc tus 68 dà lơgar mờ kơnhoàl ù tiah tàm dunia, kwơmàng neh tăc geh tàm ală drà dờng, bè: Mỹ, Nhờk, Anh, Tây...Do là ală bơnàng jă kwơmàng tàm broă lơh jăt broă lơh bal ală anih tàm broă lơh broă sa sươn sre. Dilah càr Dăk Lăk ngui niam bơta ƀươn lơh jăt broă lơh bal ală anih lơh gơlik bơta kwơ phan lơh geh bơh sươn sre geh pơgồp bơnah kwơmàng tàm broă bơsong jơnau kal ke bè bơta niam phan lơh geh bơh sươn sre, tơnguh uă geh bơta kwơ gơguh tai mờ bơtàu tơnguh lơh broă sa sươn sre dùl bă kơ̆ kơl jăp jŏ jòng tềng đăp ală bơta tam gơl bơh drà kă bro dê.

            Cau cih Vũ Hương Lý- Cau mblàng Lơ Mu K’Yến