VOV4.K’ho- Mho ngai 09/09, Mpồl lơh broă bơh Mpồl đơng lam Dà lơgar tơn jơh 10 nam lơh jăt Kơrnoăt sồ 09 nam 2011 bơh Ƀộ Cíñ trị dê bè bơ̆t bơtàu mờ ngui niam gơnoar broă bơh mpồl ală cau lơh sa kă bro Việt Nam tàm tơngai lơh pràn ngui măy mok tàm broă lơh sa, măy mok lơh jơh lơm mờ mŭt gơrờm bal mờ dunia neh geh dơ̆ lơh broă mờ càr Dăk Lăk bè broă lơh jăt Kơrnoăt sồ 09 nam 2011 bơh Ƀộ Cíñ trị dê tàm ù tiah càr.

Dăk Lăk tŭ do, geh rlau 11 rbô 100 mpồl lơh sa kă bro gam lơh broă, kờp jơh priă bơcri lơh geh cih tàm sră pơ àr là rlau 84 rbô tơmàn đong, gơguh 2,7 dơ̆ bè khà mờ 2,1 dơ̆ bè bơta uă priă bơcri tàm mpồl lơh sa kă bro pơndrờm mờ nam 2011. Tàm dơ̆ lơh broă, càr Dăk Lăk dan mờ ală Ƀộ, gah lơh broă dà lơgar kơlôi sơnơng, sồr geh ală broă lơh dong kờl, dong mpồl lơh sa kă bro tơnguh uă bơta pràn jak tàm pơrlòng, kwơmàng là gơwèt mờ ală mpồl lơh sa kă bro tàm ală tiah kal ke. Cih dờp ală jơnau đơs jơnau dan bơh càr dê, ồng Đỗ Ngọc An, Phó Kwang ătbồ Ƀan Lơh sa dà lơgar đơs là, Dăk Lăk kờñ pal lơh gơs mpồl ală cau lơh sa kă bro, bơtàu tơnguh mpồl lơh sa kă bro ngui niam geh ală bơta pràn, bơta ƀươn bơh tiah he dê.

Cau mblàng Lơ Mu K’Yến