VOV4.K’ho- Rlau 10 nam lơh jăt broă rơndăp lơh ngui điện tử jơh ală phan đo was kờp ồs đèng ngui, Kông ty Ồs đèng càr Dăk Lăk sền bal neh lơh sir jơh broă ala kông tơ điện tử, lơh gơs bơnàng jă kơ̆ kơl jăp ai broă lơh tam gơl sồ tàm tŭ tơngai pa in. Do kung là jơnau pal geh nàng gah ồs đèng lơh jăt broă lơh bơ̆t bơtàu gùng che đèng ngac ngar tàm tơngai tơnơ̆ do.

Bơh nam 2011, Kông ty Ồs đèng Dăk Lăk (PC Dăk Lăk) sơnđờm ala kông tơ kơ khí mờ kông tơ điện tử. Kông tơ do dong gah lơh ồs đèng jăt sền khà ồs đèng măy mok lơh jơh is lơm, ờ duh càng pal geh kông ñân lòt cih sơñio khà ồs đèng ngui pah nhai bè lài. Mơkung bơh tàm internet, năc ngui đèng gơtùi sền swì is khà đèng neh ngui. Bi Nguyễn Xuân Thành ơm sồ hìu 225 gùng Y Moan, ƀòn dờng Buôn Ma Thuột, pà gĭt: bơh tŭ ngui kông tơ điện tử, bi pin dờn ngan tàm bơta song dơ pă loh làng đo was kờp đèng kung bè iang nùs bè bơta ờdo ờdă ngui đèng. Bơh phần mềm crăp tơmŭt tàm điện thoại ăt tê ngac ngar, bi gơtùi sền khà đèng ngui pah ngai bơh hìu bơnhă dê. Bi Nguyễn Xuân Thành, yal: Añ gŏ gơlơh ƀươn ngan: lài ngan là bơta dipal gơ dê uă ngan; dơ̆ bàr tai là ƀươn ngan jăt sền khà đèng ngui, dong he rơcăng lài tam gơl ală phan ngui đèng tàm hìu bơnhă. Pơnyơu bè là kàl do den geh bàr pe phan ngui đèng he gơtùi tơn chơ̆t ƀà đèng, halà tơrmù ƀà tŭ jiơ ngui, geh dong ai broă ngui đèng ờdo ờdă mờ tềm pềr rlau.

Cau ngui đèng gơtùi ƀươn ƀoài pờ sền yal tơngĭt jơnau ngui đèng bơh điện thoại ăt tê

Gơwèt mờ Kông ty Trăc ñiệm Hữu hạn Dawa, lơh broă tàm Tiah lơh sa mờ măy mok Tân An, pah nhai pal tơm priă đèng rlau 80 tơlak đong, mò Hồ Thị Lộc, Phó Kwang ătbồ Kông ty Dawa, pà gĭt: Bơh ngai ngui phần mềm bơh điện thoại ngac ngar bơh đah ồs đèng dê den añ gŏ uă ngan bơta niam, bè là pờ sền wơl tŭ tơngai neh ngui đèng pah nhai pah ngai; dơ̆ bàr là tìp bơta chơ̆t đèng den yal tơn bơh tàm anih hơ̆ ala tài pal hòi điện thoại ai sồ điện thoại ồs đèng in. Phần mềm hơ̆ kung ƀươn ngan sơl ai broă pờ sền wơl mờ lơh sră cih priă đèng ngui pal tơm, den là gơ kwơ ngan ai mpồl lơh sa kă bro in. Bơh phần mềm hơ̆, dilah gŏ khà ồs đèng ngui tàm ngai gơguh uă nisơna den añ geh hòi mpồl cau lơh măy mok in tus kờp sền wơl ală gùng che đèng mờ ală măy mok, dong kông ty gròi sền mờ tềm pềr đèng.

Rơcăng lài ătbồ ngui đèng pơgồp bơnah dong mpồl lơh sa kă bro gàr geh bơta ờdo ờdă mờ pơgồp bơnah tơnguh uă cồng nha lơh sa

Tus tŭ do, broă ngui ală phan ngui pờ sền ală jơnau yal khà sồ bè đèng nàng drơng broă đơng lam lơh sa, ơm kis neh gơ gơs là bơta mờng kwèng bơh uă cau mờ mpồl lơh sa kă bro tàm càr Dăk Lăk dê. Ală jơnau yal bè khà sồ do geh Kông ty Ồs đèng Dăk Lăk yal tàm pang web https://cskh.cpc.vn mờ bơh phần mền crăp tơmŭt tàm điện thoại ngăc ngar là dùl broă lơh tơngŏ bơta song dơ pă loh làng tàm broă tăc blơi ồs đèng mờ cau ngui đèng in. Ồng Nguyễn Văn Chương, Phó Kwang ătbồ Kông ty Ồs đèng Dăk Lăk pà gĭt, bơh rlau 10 nam ngui kông tơ điện tử mờ lam ngui ală phan ngui cih kờp khà sồ kông tơ bơh ngài neh pơgồp bơnah tơnguh uă broă lơh ătbồ kă bro mờ tơnguh uă bơta niam drơng cau ngui đèng tàm càr Dăk Lăk in. Do kung là bơta pal geh nàng gah lơh ồs đèng càr Dăk Lăk in lơh jăt broă lơh bơ̆t bơtàu gùng che đèng ngăc ngar tàm tơngai tus. Ồng Nguyễn Văn Chương, yal: Mờ jơnau kờñ gơ ai tơik là lơh sir jơh gùng che đèng ngăc ngar tàm ală nam tus tàm làm jơh gùt ù tiah càr Dăk Lăk dê den kông ty kung gam rơhời lơh jăt geh jơnau kờñ hơ̆. Bơh nam 2016, kông ty neh bơcri priă blơi ală măy kal tơn chơ̆t đèng bơh ngài (SCADA) lơh geh bơta dipal uă ngan, ờdo ờdă, tŭ jiơ gơtìp tơn chơ̆t đèng dùl êt ngan mờ bơta pin dờn gơguh tai. Nam 2014 den kông ty sơnđờm bơcri priă blơi ală rơndeh lơh niam wơl đèng tàm che đèng gam pờ tơn, jơh ală bơta gơ aniai ờ niam halà lơh niam wơl tàm gùng che đèng ờ duh kờñ pal tơn chơ̆t đèng halà koh đèng. Kông ty kung neh ngui sră cih priă ngui đèng pal tơm bơh tàm điện tử lơm bơh ngai 01/07/2022 nàng drơng broă lơh ătbồ sră cih priă pal tơm ngui đèng mờ dia gơlòt mŭt ngan ngồn tàm uă broă lơh, lơh geh jơnau kờñ tam gơl sồ bơh Cíñ phủ dê.

Tus nggùl nam do, Dăk Lăk neh crăp ơn kông tơ điện tử ai rlau 580 rbô nă cau ngui đèng in geh khà 96,5%. Kông ty Ồs đèng Dăk Lăk gam hòi là PC Dăk Lăk jơh nùs lơh ngan lơh sir jơh broă ala jơh kông tơ điện tử mờ cih tơrgùm ală khà sồ jơnau yal bơh măy mok lơh is jơh lơm tàm nam 2022 do. Bơh ală broă lơh măy mok pa, Kông ty pơnđơl pràn ai ală phan ngui phan bơna đo was kờp đèng tus mờ jơh tơl nă cau ngui đèng, tàm jơh ală tiah mờ tàm jơh ală rơndeh rơndồ phan ngui điện tử in. PC Dăk Lăk kung gam pơn jăt tai lơh ală phan ngui nàng drơng niam rlau, bè gơtùi yal lài ồs đèng ngui tàm broă ndai, măy mok yal tơngkah is ai cau ngui đèng in ală bơta ờ niam tàm ală tŭ ngui đèng...

Cau cih Phạm Minh Huệ- Cau mblàng Lơ Mu K’Yến