VOV4.K’ho - Dơ̆ pơrlòng jơh bơsram kâp 3 nam 2022 sơlơ ngai sơlơ mờr tus, kòp kovid-19 gam gơtìp kal ke, ală hìu bơsram kâp 3 tàm càr Dăk Lăk gam bơto mờ bơsram ndrờm bal nàng lơh gơs broă bơto mờ bơsram nam bơsram dê. Kwơ màng là broă bơtơl bơta ngăc ngar ai kơnòm bơsram lồi kấp in nàng rơcang ai dơ̆ pơrlòng jơh bơsram kấp 3 mờ pơrlòng mŭt bơsram đại họk, cao đẳng tus do.

         Dơ̆ bơsram tàm ơdŭ bơh hìu bơsram Nguyễn Bỉnh Khiêm, kơnhoàl Krông Păc, càr Dăk Lăk dê

Dùl nam bơsram kwơ màng mờ uă dơ̆ tam gơl broă bơsram, geh tŭ tus bơsram tơn tàm ơdŭ, geh tŭ bơsram pờ tơlik tàm internet neh lơh gơrềng tus mờ broă bơsram sră kung bè nùs nhơm bơh kơnòm bơsram, tàm hơ̆ uă ngan là gơwèt mờ kơnòm bơsram mpồl ơdŭ 12. Nàng ală oh iang nùs, hìu bơsram kấp 3 Nguyễn Bỉnh Khiêm, kơnhoàl Krông Păc, càr Dăk Lăk neh lơh jăt uă gùng dà broă bơto bơsram ndrờm bal, di pal mờ bơta kòp gơtờp. Tàm hơ̆, hìu bơsram tơnguh uă nùs nhơm geh kơnòl bơh tơl cau pơgru tŭ bơto tàm ơdŭ. Pơgru Nguyễn Thị Thuý, bơto môn Hoá họk, hìu bơsram kấp 3 Nguyễn Bỉnh Khiêm pà git: “Lơh ngan jòi sền nàng wă jơnau yal tàm internet, jơnau bơsram bal đah ală bơyô lơh broă bal bơh ală hìu bơsram nàng lơh gơs tơngai bơto mờ gàr niam bơta ngăc ngar tờm ngan. Tơnơ̆ mờ hơ̆, mờ ală broă lơh jăt mờ nùs nhơm bơh tơl nă cau pơgru nàng lam sồr ală kơnòm bơsram geh kờñ tàm broă bơsram sră rơlao mờ broă pơn jờng điểm, ha là tàm ală tơngai bơsram ală oh geh ală jơnau nhơl nàng ờ hoan gơtìp dil mờ gơboh tàm broă bơsram sră rơlao, nàng dơ̆ pơrlòng tus do ală oh geh ờ hoan gơtìp kal ke”.

Mờ kơnòm bơsram ơdŭ 12 hìu bơsram kấp 3 Lê Hữu Trác, kơnhoàl Cư̆ Mgar, bŭ lah tơngai ơm ờ lòt bơsram nàng rơcang sơndră mờ kòp kovid-19 jŏ ngan, mơya mờ broă geh kơnòl, tam gơl pa bơh cau pơgru neh dong kờl ală oh iang nùs rơlao. Oh Hoàng Thị Minh Châu, bơsram ơdŭ 12 A1 pà git: “Ală cau pơgru mờ hìu bơsram ai tơl bơta niam ngan ală bol oh in bè là hìu bơsram sùm sền gròi, còp să bè broă bơsram sră mờ broă rơcang sơndră mờ kòp gơtờp tai. Ală cau pơgru bơto môn bơsram mờ cau pơgru atbồ hìu bơsram ai geh uă tơngai bơdìh mờ broă bơto nàng mblàng ală jơnau lùp bơh bol oh, den tàng ờ geh jơnau lơi kal ke ir”.

Gùt càr Dăk Lăk geh 59 hìu bơsram kấp 3, tàm hơ̆ geh 48 hìu bơsram neh ai kơnòm bơsram tàm mpồl ơdŭ 12 tus lòt bơsram. Ală hìu bơsram gam tai gam bơsram jăt broă lơh pờ tơlik tàm internet, mìng là kơnòm bơsram tàm ƀòn dờng Buôn Ma Thuột mờ kơnhoàl Krông Bŭk. Ồng Phạm Đăng Khoa, Kwang atbồ Sở Giáo dục mờ Đào tạo càr Dăk Lăk pà git, ai bơh tàm bơta kòp gơtờp tàm càr, ală hìu bơsram bơyai lơh bơto mờ bơsram ndrờm bal, gàr niam tơngai, tơngu me tờm; mờ gàr niam bơta pràn kơl dang să jan ai kwang bàng, cau pơgru, cau lơh broă mờ kơnòm bơsram in. Mìng is gơwèt mờ kơnòm bơsram ơdŭ 12, ală hìu bơsram pal sền wơl bơta niam broă bơsram sră bơh kơnòm bơsram nàng geh tam pà broă bơto bơtơl ai ală kơnòm bơsram in mờ tơrgùm bơto bơtơl bơta tờm ngan ală môn pơrlòng jơh bơsram in. Ồng Phạm Đăng Khoa pà git: “Bol an neh bơto sồr ală hìu bơsram kấp 3 bơ̆t bơtàu ală tơngu me nàng sền gròi ală tơngu me bơh Sở Giáo dục mờ Đào tạo dê nàng bơyai lơh pơrlòng tơrlòng mờ sền wơl bơta niam bơh hìu bơsram. Mờ bơh cồng nha hơ̆, geh rơndăp broă bơyai lơh bơsram bơtơl wơl ai ală kơnòm bơsram in, nàng gàr niam ală kơnòm bơsram in git wă jơnau bơsram mờ tus bal mờ dơ̆ pơrlòng jơh bơsram kấp 3 tus do”.

Cau cih Hương Lý- Cau mblàng Ndong Brawl