Nam 2022, lơh sa- mpồl bơtiàn bơh càr Dăk Lăk dê lơh geh uă cồng nha niam. Kờp jơh tă dia tàm càr kờp dŭ geh rlau 9 rbô 100 tơmàn đông, jơnhua ngan rlau jơh bơh lài tus tŭ do, sơrlèt rlau 37% khà kờp dŭ dà lơgar jàu. Do là bơnàng jă nàng Dăk Lăk lơh ngan tă dia nam 2023 tàm càr geh rlau 10 rbô tơmàn đông.

Jat ồng Bùi Văn Yên, Kwang atbồ Sở Tài cíñ Dăk Lăk đơs, jơnau kờñ tă dia 10 rbô tơmàn đông gơtùi lơh geh tŭ ală rơndap broă bè năng lượng lơh geh wơl tàm Dăk Lăk neh hời rơhời lơh broă. Bulah bè hơ̆, nàng lơh geh jơnau kờñ do, bơh bồ nam 2023, jơh gùt anih lơh broă cíñ trị bal mờ ală mpồl lơh sa kă bro, làng bol pal lơh ngan uă tàm broă lơh jat ală kơnòl broă, broă lơh bơtàu tơnguh lơh sa- mpồl bơtiàn jat jơnau pơn dut bơh Tỉñ ủy, Nghị quyết bơh Hội đồng Ñân zân càr dê mờ ală tơngume jơnau đơng lam bơh Cíñ phủ, Thủ tướng Cíñ phủ dê.