VOV4.K’ho - Càr Dăk Lăk geh rơlao 1 rơbô hìu bơsram mờ uă hìu bơsram tàm khà hơ̆ sùm gơtìp kòl gùng lòt tềng mpồng hìu bơsram tŭ ală kơnòm mŭt bơsram mờ tŭ rê bơsram, bơta gơtìp ờ niam tàm gùng lòt uă ngan. Nam bơsram 2022-2023, kơnờm mờ broă kơrian broă kă bro ờ di tềng đăp mpồng hìu bơsram, broă lam sồr tơnguh jơnau git wă cau mè bèp mờ kơnòm bơsram, lơh gơguh phan bơna, bơta do neh gơmù uă ngan, geh uă hìu bơsram neh gơmù ngan bơta gơtìp kòl.

Hìu bơsram kấp 1 Nguyễn Bỉnh Khiêm tàm tòm ƀòn dờng Buôn Ma Thuột, tềng gah sơnĕ 4 gùng Nguyễn Đình Chiểu mờ Lê Thánh Tông. Tiah do lài do geh uă ngan hìu tăc phan sa drim, dà kơphe ha là ală rơndeh chồl tăc phan lòt tàm gùng, den tàng gùng lòt gơtìp kal ke, kòl. Mơya, bơta do nam do neh ờ gơtìp tai.

Tiah tềng đăp hìu bơsram kấp 1 Nguyễn Bỉnh Khiêm, ƀòn dờng Buôn Ma Thuột tŭ do ờ gam gơtìp kòl gùng bè lài do tai

Mò Nguyễn Thị Phương, geh hìu tam toh mờ hìu bơsram pà git: “Ală nam lài cau mè bèp kơnòm bơsram đì rơndeh Honda, rơndeh ôtô pơn diang kòn lòt bơsram mờng rò rê den ơm rơndeh nàng kòn mù; hơ̆ sồng cau năc tus sa tàm hìu sa, hùc dà kơphe kung tàm bơtềt bal tàm dơlam gùng, geh tŭ jăt gah gùng lòt ha là guh tơn hờ đang gùng mìng geh ai cau lòt jơng in; cau tăc phan mờ rơndeh chồl tàm dơlam gùng lòt ơm tăc phan. Tŭ geh gal cau den hăt ngan, kòl bơh 6 tus 7 jơ drim ha là bơh 4 jơ nggùl tus 5 jơ mho tàm ală ngai tàm poh. Mơya, nam do añ gŏ là bơta do neh ờ geh tai”.

Jăt pơgru Lê Mai Thanh, bơto tàm hìu bơsram kấp 1 Nguyễn Bỉnh Khiêm yal, lài mờ ngai sơn đờm mŭt nam bơsram pa 2022-2023, hìu bơsram neh pơrjum ală cau pơgru, kwang bàng cau lơh broă nàng lơh jăt ală kơnòl geh ai tàm nam bơsram dê, tàm hơ̆ geh broă lơh niam wơl gùng lòt tềng đăp mpồng hìu bơsram. Mpồl kwang atbồ atbồ hìu bơsram neh crơng gơs mpồl lam lài pơgồp bal mờ mpồl lơh broă geh gơnoar tam pà gùng lòt, bơto sồr cau mè bèp ơm rơndeh di mờ tiah geh ai. “Hìu bơsram neh crơng gơs 3 mpồl, tơl mpồl geh bơh 2 tus 4 nă cau nàng lơh jăt kơnòl tam pà gùng lòt, bơto sồr cau mè bèp kơnòm bơsram ơm rơndeh rò kòn di tàm tiah geh ai, pleh mờ kòl gùng tềng đăp mpồng hìu bơsram. Mờ rơndeh ôtô den mìng geh ơm rơndeh tàm ờ uă tŭ, ờ gơtùi ơm jŏ ir, di lah cau mè bèp kơnòm bơsram ờ geh tiah nàng ơm rơndeh den geh bơto sồr tus tàm tiah geh ơm di pal; gam rơndeh Honda kung geh bơto sồr ơm rơndeh di mờ tiah geh ai rơndeh Honda dê sơl. Hìu bơsram bơyai lơh tam gơl tŭ lik rê bơsram, bè mpồl kơnòm bơsram ơdŭ 1 lĭk rê lài 2, 3 jơ, tơnơ̆ mờ hơ̆, mpồl ală ơdŭ 2, 3, 4... geh jăt bal bè hơ̆. Tŭ rê den pờ jơh ală mpồng hìu bơsram, bơh mpồng dờng tus mờ 2 mpồng dềt”.

Tŭ kơnòm lòt bơsram, rê bơsram, kwang àng ƀòn dờng Buôn Ma Thuột ndrờm geh ai mpồl cau lơh broă nàng tam pà gùng lòt, pơgồp bal broă tơmù kòl gùng tàm ală tiah geh mpồng hìu bơsram

Tàm ƀòn dờng Buôn Ma Thuột, broă gơtìp ờ niam tàm gùng lòt tiah mpồng hìu bơsram bè: Hìu bơsram Mầm non Hoạ Mi, hìu bơsram kấp 1 Nguyễn Đức Cảnh tềng gùng Phan Chu Trinh, hìu bơsram kấp 2 Tân Lợi tềng gùng Ngô Quyền, hìu bơsram kấp 1 Võ Thị Sáu tàm gùng Bà Triệu, hìu bơsram kấp 1 Lê Thị Hồng Gấm tàm gùng Lý Thường Kiệt, ha là hìu bơsram kấp 1 Nguyễn Bỉnh Khiêm tàm gùng Nguyễn Đình Chiểu... neh gơtìp uă ngan tàm ală nam do.

Trung tá Thái Văn Thìn, Phó Kwang atbồ kwang àng ƀòn dờng Buôn Ma Thuột pà git, tơnơ̆ mờ broă sền wơl ală hìu bơsram sùm gơtìp kòl gùng. Mpồl kảñ sát sền gàr gùng lòt neh dan mờ UɃÑZ ƀòn dờng Buôn Ma Thuột tă sờr ală phan pơrgan nàng tam pà gùng lòt tềng sơnĕ 3, sơnĕ 4 gùng rềp mờ hìu bơsram ala mờ broă treh gùng, lơh geh gùng lòt ơnàng niam nàng rơndeh ƀuơn tơrwơl. Bal mờ hơ̆, bơyai lơh pà sră lam sồr cau mè bèp, kơnòm bơsram in nàng tơnguh jơnau git wă tŭ lòt tàm gùng; sồr ală hìu kă bro dềt lơh jăt di pal mờ kơrnoăt geh ai bè bơta niam ờ do ờ dă tàm gùng lòt; tàm hơ̆ uă ngan là ai mpồl cau sền gròi, tam pà gùng lòt tàm ală gơl gùng rềp mờ hìu bơsram, lơh glài nền nòn ală cau lơi tìs... Trung tá Thái Văn Thìn pà git: “Kwang àng ƀòn dờng Buôn Ma Thuột neh pà 3 rơbô 400 pang sră lam sồr ai 9 rơbô 20 nă kơnòm bơsram bal mờ cau pơgru in bè adăt gùng lòt. Jào rơlao 400 nă kwang bàng, cau ling, tàm hơ̆ geh: Kảñ sát sền gàr gùng lòt, Kảñ sát sên gàr lơngăp lơngai lòt rê tàm gùng mờ Kảñ sát tàm tiah do tus bal lam sồr ală cau mè bèp lòt rò kơnòm bơsram ơm rơndeh di tiah geh ai, pleh mờ gơtìp kòl tàm gùng lòt mờ tam pà gùng lòt tàm ală tiah rềp mờ mpồng hìu bơsram”.

Gùt càr Dăk Lăk tŭ do geh mờr 500 rơbô nă kơnòm bơsram bơsram tàm 1 rơbô 71 hìu bơsram. Jăt ồng Đỗ Trường Hiệp, Phó Kwang atbồ Sở Giáo dục mờ Đào tạo càr Dăk Lăk yal, broă gơtìp ờ niam, hăt tàm gùng lòt tềng ală mpồng hìu bơsram ờ mìng gơtìp tàm ƀòn dờng Buôn Ma Thuột mờ gơtìp jơh tàm ală kơnhoàl, thị xã, ƀòn dờng tàm gùt càr ală nam do. Bŭ lah ờ hềt gơtìp ală dơ̆ rềs àr, mơya bơta kòl gùng, hăt gùng tàm tŭ geh gal kơnòm bơsram lòt bơsram ha là lik rê bơsram neh lơh ờ niam tàm ƀòn lơgar, lơh ờ sŭk tus mờ làng bol. Tềng đăp mờ bơta mùl màl do, mŭt tàm nam bơsram pa nam do, Sở neh pơgồp bal mờ mpồl lơh broă geh gơnoar lơh jăt ală broă lơh niam wơl, lài ngan pà gŏ neh geh cồng nha niam. “Tàm tơngai pa do, gah bơto bơtê mờ bơsram càr Dăk Lăk neh geh ală sră nggal pơyoa tus ală hìu bơsram nàng tơnguh uă jơnau git wă ai kơnòm bơsram in, nàng ală kơnòm bơsram git wă loh làng ală kơrnoăt neh geh ai tŭ tus tềng mpồng hìu bơsram pal gàr bơta niam ờ do ờ dă tàm gùng lòt. Lam sồr, yal tus mờ ală cau mè bèp kơnòm bơsram in, ală mpồl cau mè bèp kơnòm bơsram in git mờ wă loh broă do. Tàm hơ̆ uă ngan, ală hìu bơsram pơgồp bal mờ gơnoar atbồ ƀòn lơgar, mpồl kwang àng, mpồl sền gàr bơta lơngăp lơngai ha là Đoàn ơruh pơnu lơh broă nùs nhơm tàm ƀòn lơgar dong kờl lơh jăt kơnòl gàr niam lơngăp lơngai lòt rê tàm gùng tềng đăp ală mpồng hìu bơsram”.

Cau cih Tuấn Long-Cau mblàng Ndong Brawl