VOV4.K’ho- Rơndăp broă lơh lơh niam wơl gùng rơndeh càr 1, tơngai dơ̆ 2 (bơh kơi sồ 49 tus kơi sồ 62 tàm tơrbŏ bal 2 kơnhoàl Ea Súp mờ Buôn Đôn) geh priă bơcri lơh mờr 84 tơmàn đong. Do là rơndăp broă lơh gùng lòt geh ai lài bơcri priă lơh nàng kờñ bơtàu tơnguh lơh sa- mpồl bơtiàn tiah nhàr lơgar, mơya ală mpồl pơrlòng geh gơnoar lơh rơndăp broă lơh do ờ gŏ geh tơl ală bơta bè ờdo ờdă gùng lòt, geh sùm jơnau pơhìn gơtìp rềs àr, bơta niam bàr pe broă ờ gŏ geh.

Bi Hoàng Thị Tiến, geh hìu ơm rềp kềng gah gùng rơndeh càr 1, xã Cư Mlan, kơnhoàl Ea Súp yal, bơh tŭ ală mpồl lơh gùng tus lơh gùng tềng đăp hìu den tiah do gơlik geh jơnau lòt rê ờ lơngăp lơngai. Ală cau lơh gùng, lơh rbòng dà nàng pơrdô dà ờ gŏ sơntơ̆p kƀàng ntrờn làm bă tiah nàng dang che kơryan halà ơn kƀàng yal lài sơbơng roh. Den tàng bè hơ̆, tiah do neh gơlik geh uă dơ̆ rềs àr gùng lòt. Dơ̆ pa ngan rlau jơh pơgăp mờ do bàr pe ngai lơh dùl nă cau klau mong chơ̆t tơn. Bi Hoàng Thị Tiến yal: Bơh gơl gùng tềng nđăp hìu añ lòt tus rềp thị trấn neh gơlik geh 4, 5 dơ̆ rềs àr rao, mìng is tềng đăp mpồng hìu añ là neh 3 dơ̆ rao. Đơs bal là dan mờ gơnoar ătbồ tiah do sồr cau lơh gùng lơh mhar rlau, kơrhia rlau, mờ dilah lời gùng, rbòng dà bè do den là sơbơng roh ngan.

Kông ty Trác ñiệm Hữu hạn Hoài Ân lơh broă lơh tàm gùng lòt mơya ờ lơh geh ală jơnau sồr bè ờdo ờdă gùng lòt

Ai ồng Trương Kim Hoàn, hìu kung rềp kềng gah gùng rơndeh càr 1 sơl, gơl gùng lòt gan thị trấn Ea Súp, pà gĭt: ờ mìng lơh ờ geh tơl bơta niam lòt rê lơngăp lơngai mờ bơta niam bàr pe broă lơh dê kung geh jơnau sơl. Pơnyơu bè ală phan ndơl ngui nàng ndơl ală brong pơrdô dà bàr gah gùng pa ơn den cau mờ rơndeh rơndồ lòt rê jă tềng phan ndơl hơ̆ den tàng uă phan ndơl hơ̆ neh gơtìp lề jơh. Lòt sền mờ măt bè ờs den kung gŏ sơl bơta gơ nđềr đah lòs mờ ƀê tông dê ờ gŏ niam ờ gŏ kơl jăp ờ. Ồng Trương Kim Hoàn đơs: Ală phan ndơl do den đah lơh gùng khi kuă tus ơn nàng ndơl brong pơrdô dà tềng đăp hìu, he lòt rơndeh măy lòt gan là gơ bơcah tơn.

Bơta gơ nđềr bal bơh ƀê tông mờ lòs dê tàm ală phan ndơl brong dà ờ kơl jăp ngan, ƀươn ngan bơcah

Jăt ồng Nguyễn Xuân Hà, Củ tịc Ủy ƀan Ñân zân xã Cư Mlan yal, rơndăp broă lơh pờ ơnàng, lơh niam wơl gùng rơndeh càr 1 gơl gùng lòt gan xã Cư Mlan jòng rlau dùl kơi sồ, geh lơh bơh bồ nam 2021. Gơl gùng do bơh Kông ty Trác ñiệm Hữu hạn Hoài Ân geh anih lơh broă tàm ƀòn dờng Buôn Ma Thuột lơh. Tus tơngai do, bơnah măt gùng geh dă cài jơh, ală broă gam wơl bè ală brong pơrdô dà, jrong sơntơp, kƀàng yal...kung gam tàm ală tŭ lơh sơl.

Ồng Nguyễn Xuân Hà pà gĭt, kwang đơng lam bồ Ủy ƀan Ñân zân xã geh dờp geh uă jơnau đơs wơl bơh làng bol dê bè broă cau lơh gùng ờ lơh jăt ală jơnau sồr bè rơndăp tăp sèng lơngăp lơngai gùng lòt. Ủy ƀan Ñân zân xã neh tơrgùm jơh jơnau đơs wơl bơh làng bol dê mờ pơyua tus kâp hơđang in sồr lơh jăt wil tơl ală broă lơh gàr niam lơngăp lơngai lòt rê tàm gùng kung bè bơta niam broă lơh dê. Ồng Nguyễn Xuân Hà, đơs: Bơh jăt sền den ală tŭ lơh, kông ty Hoài Ân lơh bơnah brong dà nàng pơrdô dà halà jrong sơntơp, kƀàng yal ờ gŏ lơh jăt di jơnau sồr lòt rê lơngăp lơngai, pơhìn gơtìp rềs àr. Ủy ƀan Ñân zân neh dan mờ cơldŭ lơh sa phan bơna kơnhoàl dê, Mpồl ătbồ rơndăp broă lơh càr sồr cau lơh gùng pal lơh geh ală bơta tàm tŭ lơh rbàng gùng nàng gàr niam ai làng bol in lòt rê niam ờdo ờdă.

Uă phan ndơl gùng brong pơrdô dà pa ơn hơđang neh gơtìp cau mờ rơndeh rơndồ lòt rê jă mờ neh bơcah lề tơn

Rơndăp broă lơh pờ ơnàng mờ lơh niam wơl gùng rơndeh càr 1 tơngai dơ̆ 2 (bơh kơi sồ 49 tus kơi sồ 62 tàm tơrbŏ bal 2 kơnhoàl: Ea Súp mờ Buôn Đôn) geh priă bơcri lơh kờp jơh là mờr 84 tơmàn đong. Broă lơh do bơh Ală mpồl lơh bal, hơ̆ là: Kông ty Trác ñiệm Hữu hạn Hoài Ân, Kông ty Trác ñiệm Hữu hạn rbàng gùng Việt Đức, Kông ty Trác ñiệm Hữu hạn lơh rbàng gùng Đức Nguyên mờ Kông ty Kổ phần Bơtàu tơnguh Đại Việt lơh, ala măt cau tờm bơcri priă lơh là Mpồl ătbồ Rơndăp broă lơh Bơcri priă lơh broă gùng lòt mờ lơh broă sa sươn sre mờ bơtàu tơnguh ƀòn lơgar càr Dăk Lăk. Tus tơngai do, ală cau tờm lơh gùng neh lơh geh 80% ală bơnah broă rơndăp broă lơh dê. Do là rơndăp broă lơh ai lài bơcri priă lơh nàng kờñ bơtàu tơnguh lơh sa- mpồl bơtiàn tàm tiah nhàr lơgar càr dê mờ geh khà priă bơcri gơguh tus gĭt nđờ jơ̆t tơmàn đong. Cau tờm bơcri priă lơh pal lơh glài krañ ală cau tờm lơh gùng “ờ lơh niam” kung bè jăt sền kràn, jơh nùs sồr ngan cau lơh gùng nàng kờñ gàr niam lơngăp lơngai broă lòt rê tàm gùng, pleh rềs àr digơlan gơlik geh kung bè bơta niam ală broă rơndăp broă lơh dê.

            Cau cih Tuấn Long- Cau mblàng Lơ Mu K’Yến