VOV4.K’ho- Mho ngai 08/07, rlau 20 rơbô 400 nă kơnòm pơrlòng tàm Mpồl duh broă pơrlòng càr Dăk Lăk dê neh tơn jơh môn pơrlòng lồi dŭt lơh sir dơ̆ pơrlòng jơh bơsram kấp pe nam 2022. Dơ̆ pơrlòng geh đơs là ờdo ờdă, niam, song dơ pă mờ lơh geh ală jơnau kờñ mờ gah bơto bơtê dê neh ai tơlik.

Dăk Lăk: lơh sir dơ̆ pơrlòng jơh bơsram kấp pe nam 2022

Yal jơnau mhar tŭ jơh pơrlòng, ồng Phạm Đăng Khoa, Kwang atbồ Sở Giáo zục mờ Đào tạo càr Dăk Lăk, Phó Kwang atbồ Mpồl đơng lam kấp càr pơrlòng jơh bơsram kấp pe nam 2022 tàm Dăk Lăk pà gĭt: Nam do mờ bơta mut lơh bal uă ngan bơh jơh bal ală anih lơh broă cíñ trị, ală kấp, ală ngàñ, mpồl cau neh lơh jat niam broă lơh gàr niam sền gàr bơta lơngap lơngai, rơndap tap sèng mờ kung dong kờl di tŭ bè phan bơna, nùs nhơm dong kơnòm pơrlòng mờ mè bèp kơnòm pơrlòng in iang nùs tus bal dơ̆ pơrlòng. Khà kơnòm pơrlòng tus bal pơrlòng ală môn lơh geh 99,55% rlau hơ đang. Jơnau ai pơrlòng geh uă ngan ală kơnòm đơs là di mờ bơta chài, geh bơta tam cah uă. Mơya, bơta pơlai soh ngan là kung gam geh 3 nă kơnòm pơrlòng lơh tìs kơrnoat pơrlòng tài bơh cèng điện thoại at tê mut tàm cơldŭ pơrlòng.

Cau mblàng K’Hạnh