VOV4.K’ho- Tềng đăp bơta gơbàn kal ke bơh kòp Kovid-19 dê tŭ khà cau bơtờp kòp là kơnòm dềt hơđơm 18 sơnam sùm gơguh uă tàm ală ngai do, drim ngai 23/02, ồng Nguyễn Đại Phong, Kwang ătbồ Hìu sơnơm dờng tiah Tây Nguyên pà gĭt, Hìu sơnơm gam jơh nùs rơcăng nàng dờp cau kòp là kơnòm dềt bơtờp kòp Kovid-19 kơn jơ̆ mŭt piam kòp tàm tiah hìu E bơh Hìu sơnơm dê.

Oh dềt sơm kòp Kovid-19 bal mờ mè tàm Hìu sơnơm dờng tiah Tây Nguyên

Jăt Ƀác sĩ Phong yal, lài do, Hìu sơnơm neh lơh dùl tiah sơm kòp ai cau kòp Kovid-19 kơn jơ̆ in tàm hìu jơnhoa cờñ G, tàm hơ̆ geh 10 nơm jơnờng piam kòp ai cau kòp là kơnòm dềt gơbàn kòp kơn jơ̆ in. Mơya, tŭ do, khà cau kòp là kơnòm dềt gơtìp bơtờp kòp Kovid-19 gơguh tai den tàng Sở Y tế càr Dăk Lăk neh sồr Hìu sơnơm lơh dùl tiah sơm kòp ai cau kòp là kơnòm dềt gơtìp kòp kơn jơ̆ in. Mìng kờp is bơh bồ nam tus tŭ do, càr Dăk Lăk neh gŏ 11 rbô 563 nă cau bơtờp kòp Kovid-19, tàm hơ̆ 6 rbô 941 nă cau là kơnòm dềt hơđơm 18 sơnam, geh tus mờr 30% tàm kờp jơh khà cau bơtờp kòp.

 Cau mblàng Lơ Mu K’Yến