Tŭ do, broă blơi phan hơ̆ sồng ngui điện thoại ngac ngar (smartphone) quét mã QR nàng tơm priă halà pơyua priă neh gơ gơs mờng kwèng ngan tàm ală anih tac phan, drà ờs mờng tàm ƀòn dờng Buôn Ma Thuột. Mò Đinh Thị Thanh, 60 sơnam, ơm tàm sơnah ƀòn Tự An yal, nđờ nam lài do tŭ lòt drà halà siêu thị blơi phan sùm pal rơcang lài dùl bơnah priă mat nàng tă tơm. Bulah bè hơ̆, mờr 2 nam do, ală broă tac bro ndrờm bè mò ờ ngui priă mat tai, ala mờ hơ̆ là ngui điện thoại quét mã QR halà pơyua priă. Mò đơs là broă tơm priă bè do ngan ngồn ƀuơn ngan: “Añ dờp priă nhai jơh sơnam rê rlô lơh broă den bơh lài tus tŭ do ndrờm tơmut tàm tài khoản lơm, lài do lòt drà halà siêu thị den pal kơp kòn sau lòt tă priă tàm ATM. Mơya tŭ do tŭ blơi phan lơi tàm drà halà siêu thị kung tơm bơh broă quét mã QR lơm, ờ duh pal tă priă mat tai. Añ lòt drà Phan Chu Trinh, Tân An halà drà dờng Buôn Ma Thuột, jơh ală cau tac phan bơh tac biap, poac, ka, bơkàu, plai chi, àu mpha ndrờm geh mã QR lip gơs sră halà tàm điện thoại khi dê nàng cau lơi in quét mã tơm priă. Añ gŏ bơta do ƀuơn ngan, ờ rơngòt jơngkah priă, ờ tơl priă halà tìs”.

Mò Nguyễn Thị Liên, tơnơ̆ mờr 20 nam tac bơkàu plai chi tàm drà Tân An, ƀòn dờng Buôn Ma Thuột pà git, mò neh bơsram jat broă tơm priă ờ ngui priă mat bơh ală cau tac phan gùt dar dê. Broă tơm priă sồ neh gơtùi bơsong uă bơta ai jơh bal cau tac mờ cau blơi phan in: “Đơs bal nac khi blơi ờ tă tong priă mat den he dờp wơl priă jơngkah kung roh tŭ jơ. Geh uă tŭ cau blơi tơm 20 halà 30 rbô đông, hơ̆ sồng khi dờp priă 500 rbô đông mờ he ờ geh priă rài nàng dờp wơl den pal lòt tam gơl mờ cau ndai, gơ kal ke ngan. Broă quét mã QR tơm priă den ƀuơn rlau. He kờñ broă tơm priă bơh QR lam lơh uă rlau nàng làng bol in ƀuơn rlau mờ lài do. Tài lài do kung geh uă dơ̆ añ dờp wơl priă jơngkah cau in tìs, mờ quét mã QR den ờ gơtùi tìs mờ ƀuơn rlau mờ broă tong priă mat”.

Jat Ngân hàng dà lơgar Việt Nam sơnĕ tàm càr Dăk Lăk pà git, tơnơ̆ mờr 2 nam lam lơh jat “Rơndap broă bơtàu tơnguh broă tơm priă ờ ngui priă mat tàm lơgar Việt Nam tơngai bơh nam 2021 tus nam 2025”, tus tŭ do, ală ngân hàng tàm càr Dăk Lăk neh pờ rlau 2 tơlak 600 rbô tài khoản ai cau ngui in. Khà gơguh kờp bal ngui tài khoản bơh điện thoại ngac ngar geh bơh 50 tus 80% pah nam; khà cau dồ nă să, mpồl cau ngui phan tơm priă ờ ngui priă mat bơh ală gah điện tử geh 40%. Ală gah lơh sơnơm, bơto bơsram neh geh mờr nggùl cau dồ nă să, mpồl cau ngui broă tơm priă điện tử, tă tơm priă bic tàm hìu sơnơm, tă priă bơsram ờ ngui priă mat.

Mò Phùng Thị Thơm, Phó Kwang atbồ Cơldŭ măi mok yal tơnggit jơnau, Sở Thông tin mờ Truyền thông càr Dăk Lăk pà git, gùt càr neh lơh 1 rbô 426 mpồl măi mok sồ mpồl bơtiàn mờ 9 rbô 278 nă cau tus bal. Ală mpồl do rơp dong kờl broă tam gơl sồ; crap tơmut sồ yal mat làng bol điện tử VNeID; pơlam ală hìu bơnhă tac phan, làng bol tàm càr lơh sră mờ ngui tơm priă ờ ngui priă mat; pơlam lơh tài khoản mờ tong sră nggal broă drơng ala dà lơgar tàm internet,… Mò Phùng Thị Thơm đơs: “Ủy ƀan Ñân zân càr neh lơh ală mpồl măi mok sồ mpồl bơtiàn bơh càr mù tus kơnhoàl, xã mờ ală thôn, ƀòn halà tổ zân phố. Nam 2024, Sở rơp lam lơh broă ai tơlik lài gùng dà broă lơh mờ pơlam ală xã, sơnah ƀòn tàm ală mpồl măi mok sồ mpồl bơtiàn do tơnguh niam rlau tai broă pơlam làng bol tơm priă ờ ngui priă mat”.