VOV4.K’ho - Mờ broă tus bal bơh ală mpồl lơh broă, ală cau dùl nă să lơh is, bơh broă lơh “mè ròng” geh Mpồl tam klăc cau ùr Việt Nam lam lơh, uă kơnòm dềt kòn đời, ờ geh cau ròng siam tàm càr Dăk Lăk neh dờp geh broă dong kờl, drơng gàr jơh bè phan bơna bal mờ nùs nhơm. Bơh tŭ hơ̆, ală kơnòm dềt geh tai anih kơnờm nàng sơrlèt mờ ală hoàc huơr, kal ke, tơnguh bơtàu tơl ală bơta rơlao.

Nam lài, mè bèp bơh bàr nă oh Đoàn Nhã Trúc mờ Đoàn Nhã Phương gơtìp chơ̆t tài bơh kòp Kovid-19, den tàng bàr nă oh rê kis mờ mò đah mè tàm ƀòn Kring, xã Ea Sin, kơnhoàl Krông Buk, càr Dăk Lăk. Mò Võ Thị Ngân, mò 2 nă oh mờ mi bol khi pà git, hìu nhă gơwèt tàm mpồl hìu rơƀah, broă lơh sa gơtìp uă ngan kal ke, mờ gơtìp kòp gơtờp tai den tàng sơlơ lơh mò mờ sao pal gơtìp kal ke ngan.

                Bàr nă oh Đoàn Nhã Trúc mờ Đoàn Nhã Phương geh bàr nă mè ròng pơn dờm pơn điang

Bơtoah ngan, 2 nă sao neh geh 2 nă cau ùr lơh sa kă bro dờp ròng siam, hơ geh tus bal mờ bol oh tàm 5 nam tus, mờ ală broă dong kờl jơh bè phan bơna bal mờ nùs nhơm. “Nam 2021 là bàr nă oh geh tơlik is măt dờp hìu rơƀah, tài mè bèp hìu rơƀah neh jơh hơ̆ sồng mè bèp gơtìp chơ̆t là bàr nă oh tơlik măt is dờp hìu rơƀah. Mơya tus nam 2022 là mò pal dan bàr nă sao tam gơl hìu nhă ơm rê mờ mò nàng ƀuơn tàm broă ròng siam. Đơs ngan là tàm tiah ngài den kung kal ke ngan. Mờ mò kung gơtìp kòp ờ niam kồ ntìng, mìng geh lòt di mơ, di lah lòt ngài là gơtìp jê ờ gơtùi lòt”.

Kung tàm bơta do sơl, mè gơtìp chơ̆t, bèp lòt lơh broă ngài, 2 nă oh mờ mi Lưu Hoàng Anh, 8 sơnam mờ Lưu Nguyễn Hà Vy 2 sơnam kis tàm thôn 3, xã Ea Kpam, kơnhoàl Cư̆ Mgar mìng geh mò đah bèp là cau ròng siam. Mò Nguyễn Thị Xuân, 64 sơnam, mò đah bèp bàr nă oh yal, tŭ mè gơtìp chơ̆t, oh Hà Vy ờ hềt tòm 7 nhai. Bàr nam do, mò pal lơh tơl ală broă, bơh broă ròng sur, còr kràng, pic tiêu, pic kơphe, rào bơngàn ơpah… nàng geh priă drơng gàr ală sao in. Tàm ală nhai do, rài kis 3 nă mò mờ sao neh ờ hoan kal ke rơlao tŭ geh Mpồl cau ùr kis tàm thôn 3, xã Ea Kpam dờp dong kờl sền gàr bàr nă oh jăt broă lơh “mè ròng”. “Kơnờm mờ broă dong kờl bơh mpồl cau ùr kis tàm thôn 3 geh ală phan pà nàng ròng sao pah ngai. Geh tŭ là Mpồl cau ùr tus pơn dờm pơn điang mò mờ sao nàng mò ròng sao tus dờng. Ưn ngài ală kấp, ală gah lơh broă, ală oh mi cau ùr neh dong kờl mò mờ sao bol añ”.

Ală oh mi cau ùr kis tàm thôn 3, xã Ea Kpăm còp, pà phan bàr nă oh mờ mi Lưu Hoàng Anh mờ Lưu Nguyễn Hà Vy

Jăt Mpồl tam klăc cau ùr càr Dăk Lăk yal, kòp Kovid-19 neh lơh 18 nă kơnòm dềt tàm càr gơtìp kòn đời mè, bèp. Bal mờ hơ̆, geh mờr 2 rơbô 300 nă kơnòm dềt kòn đời tài bơta ndai; tàm hơ̆ geh 679 nă kơnòm dềt kòn đời jơh mè mờ bèp. Lơh jăt broă “cau mè ròng” geh Mpồl tam klăc cau ùr dà lơgar lam sồr, mpồl tam klăc cau ùr càr Dăk Lăk ai jơnau kờñ jơh ală kấp, mpồl cau ùr lơh jăt broă do di pal mờ bơta mùl màl tàm tơl mpồl, tơl tiah dê. Sơn đờm lơh jăt bơh lồi nam 2021 tus tŭ do, broă lơh do neh dờp geh nùs nhơm ring bal, kờñ bal uă bơh ală kấp mpồl dê.

Tàm xã Ea Kpam, kơnhoàl Cư Mgar, bơh broă lơh do, Mpồl cau ùr neh tơrbŏ bal, lam sồr ală mpồl lơh broă, ală cau dờp ròng, sền gàr, ròng siam 6 nă kòn dềt kòn đời, geh rài kis gơtìp kal ke tàm xã tus tàm tŭ bol khi tòm 18 sơnam. Lŏ Trần Thị Thuyết, Củ tịc mpồl tam klăc cau ùr xã Ea Kpam yal, bŭ lah broă dong kờl bè phan bơna ờ hềt geh uă, mơya bơta kal ke rơlao là broă pơn dờm bè nùs nhơm ală kơnòm dềt. Bal mờ broă hòi jà ală cau geh nùs nhơm niam, Mpồl cau ùr gam hòi jà lơh broă “Cau ùr tơrgùm siồ siă” tàm cau tàm mpồl nàng tăc geh priă blơi phan pà ală kơnòm dềt geh “dờp ròng” in. “Mpồl cau ùr neh sùm tus còp să, sền gròi bơta pràn kơl dang să jan kung bè bơyai lơh còp să, pà phan ai ală kơnòm dềt in. Di gơlan là bơyai lơh còp să mờ priă ngan mờ kung di gơlan là mờ ală bơta phan, bè phan ngui sa, dà màn, boh mờ phe”.

Tus tŭ do, neh geh rơlao 500 nă kòn dềt kòn đời geh rài kis gơtìp kal ke tàm càr Dăk Lăk geh ală mpồl lơh broă, ală cau dờp ròng, hơ geh dong kờl mờ uă broă lơh bè pà priă bơsram, dong kờl priă tàm rài kis tus 18 sơnam mờ dong kờl lơh hìu nùs nhơm. Kờp jơh khà priă hơ geh dong kờl rơlao 5 tơmàn đong. Mò Tô Thị Tâm, Củ tịc mpồl tam klăc cau ùr càr Dăk Lăk đơs, do là broă lơh geh kwơ màng ngan, pơgồp bal tàm broă gàr niam rài kis lơh broă sa mpồl bơtiàn. Mpồl cau ùr ală kấp neh tus bal hòi jà tă pơgồp bal priă jền, tus bal tơn dong kờl ală kơnòm dềt mờ geh lơh broă sùm, lòt bal mờ ală kơnòm dềt do tàm tơngai pơn jăt tai. “Broă lơh do bol añ neh jào kơnòl ai ală mpồl cau ùr tàm ală tiah in 100% mpồl cau ùr ală kấp ndrờm dờp ròng dùl nă kòn dềt rơlao hờ đang jăt mờ tơl mpồl lơh broă. Broă kwơ màng ngan bol añ kờñ wèt tus là bơdìh mờ priă jền, priă tă mờ dong kờl phan bơna den pơn dờm pơn điang, tam pà bal nùs nhơm niam mờ di tŭ git ală nùs nhơm kơ̆p kờñ, bơta kal ke bơh ală kơnòm dềt dê, tơngai nùs nhơm bơh ală kơnòm dềt tus dờng tŭ ờ geh mè bèp, cau pròc mhàm. Di tàm ală dơ̆ satềp, ngai 1 nhai 6, satềp Trung thu ha là ală broă lơh kwơ màng ndai nàng ală kơnòm dềt ờ hoan gơtìp moăt tàm nùs nhơm”.

Mờ broă tus bal bơh ală “cau mè ròng”, uă kơnòm dềt kòn đời tàm càr Dăk Lăk geh bơnah lơi tơmù kal ke, geh tai bơta pràn nàng sơrlèt mờ ală bơta roh rui, jê moăt să jan. Ờ mìng là ală broă dong kờl bè phan bơna, bơh broă lơh do, ală kơnòm dềt geh tai ală broă pơn dờm pơn điang bè nùs nhơm, broă lòt bal mờ bơto pơlam bè bơta git wă tàm broă sền gàr bơta pràn kơl dang să jan nàng ală kơnòm dềt do geh tơnguh bơtàu tơl ală bơta rơlao, wèt tus rài tơnơ̆ do niam bơnĕ rơlao.

Cau mblàng Ndong Brawl