VOV4.K’ho- Ală cau lơh broă càn ing lài rlau 2 rơbô tơmàn đong priă bơcri dà lơgar tàm càr Dăk Lăk mơya dùl ròt rơndap broă lơh lơyài lam mŭt lơh lơh bơnah priă càn ing lài uă ir tơngai pơrgongơguh tus mờr 1 rơbô tơmàn đong. Lùp wơl priă, Dăk Lăk geh jơnau sồr tơnguh ai priă tàm ală rơndap broă lơh geh lơh mhar. Mơya do là jơnau  kal ke tài bơh uă mpồl lơh sa kă bro gam gơtìp bơta ờ niam tàm broă lơh sa kă bro, priă càn ing lài gơ gơs dồs kal ke ngan lùp. Bơta ndai, Ủy ƀan Ñân zân càr kung kơlôi rcang là dilah ai wơl priă, dờp rơndap broă lơh gơtìp lơyài tŭ tơngai, den digơlan gơtìp dà lơgar ai wơl priă bơcri lơh.   

Rơndap broă lơh bơcri priă lơh gùng Hồ Chí Minh gơl gùng pleh tiah đah mat tơngai lik ƀòn dờng Buôn Ma Thuột, càr Dăk Lăk lam lơh jat tơngai bơh nam 2020-2023 geh kờp jơh khà priă bơcri 1 rơbô 509 tơmàn đong, tus tŭ do neh ai priă 1 rơbô 044 tơmàn đong. Mơya, tŭ tơngai lơh rơndap broă lơh lơyài ngan mờ bơnah broă mut lơh mìng lơh geh pơgap 8%, ndrờm mờ priă mut lơh pơgap 80 tơmàn đong. Tàm tŭ hơ̆, khà priă càn ing lài bơh ală cau bơcri priă dê gơguh tus rlau 220 tơmàn đong. 

Tơngai lơh rơndap broă lơh gùng Hồ Chí Minh gơl gùng pleh tiah đah mat tơngai lik ƀòn dờng Buôn Ma Thuột lơyài ngan, bơnah broă lơh mìng lơh geh pơgap 80 tơmàn đong, tàm tŭ priă càn ing lài bơh ală cau lơh broă dê gơguh tus rlau 220 tơmàn đong

Ồng Phan Xuân Bách, Phó Kwang atbồ drơng broă Mpồl atbồ rơndap broă lơh bơcri priă lơh broă lơh gùng lòt mờ lơh sa suơn sre bơtàu bơh ƀòn lơgar càr Dăk Lăk, cau tờm bơcri priă lơh rơndap broă lơh, pà gĭt, bàr pe cau lơh broă càn ing lài priă jền mơya gơ lơh bè ờ gŏ mŭt lơh ờ, priă càn ing lài gơ gơs “bơnah dồs kal ke ngan lùp”.

Mpờl gŏ ngan là jơnau bơh bè Kông ty TNHH Phương Đông, sồ hìu 47 gùng Thái Phiên, ƀòn dờng Buôn Ma Thuột, cau lơh broă bơh bơnah broă lơh sồ 03 gơwèt Rơndap broă lơh neh càn ing lài rlau 44 tơmàn đong mờ geh dùl ngân hàng dong kờl ai càn ờ duh plai geh ală bơta lơi. Mơya, kông ty do neh gơtìp bơta ờ niam mờ pal ala cau ala mat gah adat boh lam. Cau tờm bơcri priă neh sồr ngan uă dơ̆, mơya neh mờr 1 nam do, mpồl lơh sa kă bro do ờ gŏ lơh ală bơnah broă pal lơh jat tàm sră pơrgon. Cau tờm bơcri priă neh pal 2 dơ̆ lơh sră nggal ai wơl rlau 44 tơmàn đong do bơh đah Ngân hàng dê sồr ala mat dong kờl mơya ờ hềt bơsong jơh.

Ồng Phan Xuân Bách đơs: Tàm sră pơrgon sồr ală khà lơh sir ai ing lài dơ̆ 1, dơ̆ 2, dơ̆ 3, mơya mờ tàm 3 nhai ờ lơh sir ai ing lài dùl bơta lơi ờ, hơ̆ là ờ geh mpồl broă nàng lơh sir ai ing lài den jat Nghị địñ sồ 99 nam 2021 den sồr pal ai wơl. Bơta do ờ pơyoa ai kông ty in ờ tài bơh Ngân hàng lơh nền, ờ gĭt mbè lơi mờ ngân hàng sồr càn priă ờ geh bơta lơi, den tŭ do pal lùp wơl.  Tŭ do ai wơl geh halà ờ den pal lùp ngân hàng.

Priă ai ing lài uă ir tơngai gơ gơs “dồs kal ke ngan lùp” kung là bơta bal tàm dùl ròt rơndap broă lơh tàm ù tiah càr Dăk Lăk dê. Jat jơnau yal bơh Ngân hàng dà lơgar càr Dăk Lăk, kờp tus tŭ do, tàm kờp jơh khà rlau 2 rơbô 115 tơmàn đong priă ai ing lài den geh tus mờr 1 rơbô tơmàn đong neh uă ir tơngai pơrgon. Ngân hàng dà lơgar neh sồr ală kấp, ngàñ bơh càr dê geh broă lơh ai wơl khà priă ai ing lài do. Ồng Phạm Ngọc Nghị, Củ tịc Ủy ƀan Ñân zân càr Dăk Lăk pà gĭt, càr kung neh ai tơlik sră nggal ai wơl priă pa đơs do, mơya kung sồr ală anih lơh broă bơh càr dê kơlôi sơnơng nền non ngan nàng pleh mờ bơta ai wơl jơh mơya gơtìp tơn jơh priă bơcri lơh.

Ồng Phạm Ngọc Nghị, đơs: Anih priă jền yal mờ sồr ai wơl jơh, mờ ai wơl den tus tơngai ờ geh priă tơm wơl ai làng bol in, pơn yơu bè tơm priă ai ù. Pơn yơu bè rơndap broă lơh Krông Pách Thượng, tŭ do gam pơgap 400 tơmàn đong nàng tơm wơl priă ai ù ai làng bol in mờ ai wơl bơta do, dà lơgar ai jơh ờ tă wơl priă jền den 400 tơmàn đong do càr ai bơh tiah lơi nàng tơm ai làng bol in. Den tŭ do ai wơl mờ broă lơh lơi, gơ ơm tàm bơnah lơi mờ lơh mbè lơi?

Nghị địñ sồ 99 nam 2021 bơh Cíñ phủ dê cih bè atbồ, tơm priă jền, kờp dŭ priă jền jơh rơndap broă lơh ngui priă bơcri dà lơgar dê neh cih nền nòn, ngan ngồn bè càn ing lài priă bơcri mờ ai wơl priă neh càn ing lài. Tàm hơ̆, sồr “priă càn ing lài uă ir tơngai pơrgon ai wơl tơnơ̆ 3 nhai kờp bơh tơngai pơrgon pal ai wơl priă càn ing lài jat jơnau cih bơh sră pơrgon dê mờ cau bơcri priă ờ hềt lơh jat halà tŭ sền gŏ cau bơcri priă ngui tìs jơnau kờñ, cau tờm bơcri priă geh kơnòl đơng lam, pơgồp bal mờ anih lơh broă sền sơ wì, tơm wơl nàng ai wơl tơm wơl priă neh càn ing lài ai kes priă dà lơgar in”. Mơya, tàm Dăk Lăk kung gam geh priă càn ing lài uă ir tơngai pơrgon dùl nam tơn. Bơta do gơlik jơnau lùp gơlik geh sơl broă, gĭt nđờ jơ̆t, gĭt nđờ rơhiang tơmàn đong priă dà lơgar gơtìp ală cau lơh broă, ală mpồl lơh sa kă bro ngui tàm jơnau kờñ ndai, sa kuề sa kuà halà ờ. Do là bơta mờ ală anih lơh broă geh gơnoar càr Dăk Lăk pal kơlôi sơnơng nàng ai tơlik ală broă lơh atbồ priă geh cồng nha rlau tai.

Cau mblàng K’Hạnh